Yesaya 41
41
Ambuya ndiyo Chiuta Yisraele wagomezge Ambuya
1Tegherezgani chisisi kwangu,
mwa vyaru vya malikumba,
ŵanthu ŵawerezgiyemo mthazi zawo
ŵandere pafupi, ndipo ŵarongoro,
tiyeni tose tindere pafupi ku cheruzgu.
2Njani wanguyuska munyake kutuwa ku vuma
mweniyo kupunda kukumana nayo pa mchapu wose?
Wapereka mitundu paurongo pake,
viyo kuti waphwata akaronga ndi rundi lake;
wati ŵachita nge ndi fuvu ndi lipanga lake,
uli ndi mbuwa yakuputiskika ndi uta wake.
3Wati ŵandondoloska ndi walutiriyapo umamphavi,
mu nthowa zo marundi ghake ghalivi kwendamo.
4Njani yo wafiska ndi kuchita ichi,
kudana migonezi kutuliya pa mtendeko?
Ine, Ambuya, wakudanga yo, ndi waumari, ndine pe.
5Vyaru vya malikumba vyawona ndipo vitopa,
vigoti vya charu chapasi vinjenjeme;
vyendere pafupi, vyaza.
6We yose watovya ŵakuzengezgana nayo,
ndipo watiti ku mwanamunyake, “Khwima mtima!”
7Wakusula wakhwimiska wakwenga golide,
yo wasililiska ndi nyundo ndi yo wadina mwa wa livumbu,
wakamba gha kusongono, “Chanozga,”
ndipo ŵatichikhozga ndi mizumali kuti chireke kusukunika.
Pempho laku ŵamkoli
8Kweni iwe, Yisraele, muŵanda wangu,
Yakobe, yo ndatondo,
mphapu yaku Abrahamu, bwezi langu;
9iwe ndingukuto ku vigoti vya charu chapasi
kukudana ku visongo vyake vya kunthazi limu, po ndinguti kwaku iwe, “Ndiwe muŵanda wangu, ndakusankha ndipo ndilivi kukutaya kuwa”;
10ungopanga cha, pakuti ndenawe pamoza,
ungatenthemanga cha pakuti ndine Chiuta wako;
ndikakukhomeskan'ga, ndikakovyanga,
ndikakusunganga ndi janja langu, lakurghiya la upundi.
11Ehe, wose wo ŵatikuyukiya ŵakalengeskekanga ndi kutimbanizgika,
wo ŵalimbana nawe kuti ŵakaŵanga kanthu cha, ŵakamaranga.
12Ukaŵapenjanga ŵakubayana nawe,
kweni kuti ukaŵasaniyanga cha;
wakuchita nkhondo ndi iwe,
wakaŵanga nge nkhanthu cha.
13Pakuti ine, Ambuya Chiuta wako,
ndiko janja lako lakurghiya;
ndine ndititi kwaku iwe, “Ungopanga cha,
ndikakovyanga.”
14Ungopanga cha, owe fusi Yakobe,
imwe mwa ŵanthu ŵaku Yisraele!
Ndikovyeninge, atiti Ambuya;
muwobozi winu ndi Mtuŵa Yumoza yo waku Yisraele.
15Ehe, ndikakuchitanga kuŵa mbuli ufya,
wakuthwa ndi wakuŵa ndi minyu;
iwe ukabulanga mapiri ndi kughaswa,
ndipo mitunthu ukayichitanga kuŵa mwere.
16Ukayipepetanga ndipo mphepo
yikayitolenga kutali, ndipo lirondo likayiparghang'anga.
Ndipo iwe ukakondwanga mu Ambuya;
mu Mtuŵa Yumoza yo waku Yisraele, ukatumbwanga.
17Penipo ŵasauchi ndi ŵasokwa ŵapenja maji,
ndipo palivi,
ndipo lilime lawo lomilwa ndi nyota,
ine Ambuya ndiŵamukenge,
ine Chiuta waku Yisraele kuti ndikaŵajowonga cha.
18Ndikabanuwanga misinji pa
mitunthu yiyumu, ndi visima mukati mu madambo.
Ndikasanduskanga bozwa lo chisima cha maji,
ndi charu chiyumu maji ghakubwibwituka.
19Ndikaŵikangamo mu bozwa miti ya
masidara, akashia, ndi miritili ndi olive;
ndikaŵikangamo mu bozwa mu lombwa,
mkuyu, ndi nyaphini pamoza;
20alinga kuti ŵanthu ŵawone ndi kuziŵa,
ŵaghanaghane ndi kuwamo pamoza
kuti janja la Ambuya lachita ichi,
Mtuŵa Yumoza yo waku Yisraele wachita ichi.
21Rongoni mulandu winu, atiti
Ambuya; tuzgani vifukwa vinu, watiti Karonga waku Yakobe.
22Wavituzge, ndipo watinene cho chikaŵangako.
Tineniyeni vinthu vya kale, kuti vine,
kuti tivighanaghane,
kuti tiziŵe ko vituliya,
pamwenga titauliyeni vinthu vyo vikazanga.
23Tineniyeni vyo vikazanga pavuli pasono,
kuti tiziŵe kuti mwe ŵachiuta;
chitani umampha pamwenga chitani urwani alinga kuti tope ndi kutenthemeskeka.
24Ehe, kuti mwe kanthu cha,
ndi nchitu yinu nayo njawakawaka;
waukazuzi ndi mweniyo wasankha imwe.
25Ndinguyuska yumoza ku nkhonde,
ndipo waza, kutuliya ko lituwa lumwi,
ndipo wakadananga pa zina langu;
wakendanga pa ŵakutuduliya uli mpha thuli,
uli ndimo muumbi wadiniya dongo.
26Kumbi njani wanguziŵiska ichi
kutuliya pa chiyambo, kuti tiziŵe,
ndi paurongo pa nyengo yo alinga kuti tinene, “Warunjika”?
Pengavi nanga njumoza wanguchiziŵiska, nanga njumoza wangumemeza
nanga njumoza wanguvwa mazu ghinu.
27Ndadanga kuchimemeza ku Zioni,
ndipo ndipereka kwaku Yerusalemu wakumemeza uthanga wamampha.
28Kweni ndichilereska palivi yumoza,
mukati mwaku yaŵa palivi
nduna yimoza mweniyo ndichifumba, watamuka.
29Ehe, wose mbatesi; nchitu zawo zawaka ŵangoza ŵawo
ŵakwenguwa ndi mphepo yiyumu.
Bible Society of Malawi