Yesaya 26
26
Gomezgu la ŵaYuda
1Mu zuŵa liya sumu iyi yikambikanga mu charu chaku Yuda:
“Tendi muzi wakukho;
wamika utaski
nge ndi malinge ndi lisitu.
2Jurani malikomo,
mwakuti mtundu wakurunjika
wo usunga chivwanu useremo.
3Mutimusunga iyo mu chimangu cheneko,
mweniyo mtima wake ukula pinu,
chifukwa wagomekezga mwaku imwe.
4Gomekezgani mu Ambuya muyaya,
pakuti Ambuya Chiuta ndi jarawe la muyaya.
5Pakuti ŵasiskiya pasi
ŵakuja pachanya mu muzi wa pachanya.
Ŵausiskiya pasi, kuusiskiya pasi pa dongo,
ŵaupong'a pa fuvu.
6Rundi lipwatapo,
marundi gha ŵasauchi,
nthangara za ŵakavu.”
7Nthowa ya ŵarunji njakutambara,
ndimwe munyoroska nthowa ya ŵakurunjika.
8Mu nthowa ya vyeruzgu vinu,
Ambuya, titumulindizgani,
zina linu lakukumbukika
ndilo linweka la mzimu widu.
9Mzimu wangu unweka imwe ndi usiku,
mzimu mukati mwangu upenja imwe ndi linweka.
Pakuti asani vyeruzgu vinu vye mu charu chapasi,
ŵakuja mu charu ŵasambira urunji.
10Asani mwaŵi upaskika ku muheni
kuti wasambira urunji cha,
mu charu cha ŵakutowa mu mtima
iyo wachita utimbanizi
ndipo kuti watiuwona cha unkhankhu wa Ambuya.
11Ambuya, janja linu lasoskeka,
kweni kuti ŵatiliwona cha.
Ŵarekeni ŵawone mwamphu winu
pa ŵanthu ŵinu ndi ŵachiti soni.
Moto ŵakupindikana ŵinu uŵamare.
12Ambuya mwe, mukatichitiyanga chimangu ifwe,
mwatilongosole ifwe nchitu zidu.
13Ambuya Chiuta widu, ambuya ŵanyake ŵatiusa ifwe,
kweni zina linu pe ndilo ifwe tizomera.
14Iwo ŵakufwa, kuti ŵakaŵanga ŵamoyo cha;
ndi mizguka, kuti ŵakayukanga so cha,
chifukwa ichi imwe munguchezga nawo ndi phasulu
ndipo mungusisita chinkhumbu chawo chose.
15Kweni imwe mwakuzga mtundu, Ambuya,
mwa ndaniska mtundu;
mwakankhuskika imwe,
mwakuzga mphaka zose za charu.
16Ambuya mwe, mu suzgu
ŵangukupenjani, ŵangupereka rombu,
penipo likhwechu linu lenga paku iwo.
17Uli ndi munthukazi wa paluŵavu,
yo wagadabuka-gadabuka ndi kuliya
mu urwirwi wake, po waŵandika ku nyengo yake,
viyo ndimu tinguŵiya ifwe chifukwa chinu, Ambuya,
18tenga ndi pa liŵavu tingugadabuka,
gadabuka, taŵa ulaka tapapa mphepo.
Tilivi kuchitamo utaski mu charu,
ndipo ŵakuja mu charu ŵalivi kuwa.
19Ŵakufwa ŵinu ŵakaŵanga ŵamoyo,
maliŵavu ghawo ghakayukanga.
Okwe mwa ŵakuja mu fuvu imwe!
Yukani, mbani gha chimwemwe!
Pakuti dungwi linu ndi dungwi la ukweru,
ndipo charu chikatoriyanga so ku umoyo
mizimu yaku wo ŵakufwa kale.
20Zaninga, mwa ŵanthu ŵangu, sereni muvipinda vinu,
jarani visasa kuvuli kwinu,
bisamani kwa nyengo yimanavi
mpaka penipo ukari wakapo.
21Pakuti ehe, Ambuya atuza kutuwa mu malo ghawo,
kuzachilanga ŵakuja mu charu
pa chifukwa cha kwananga kwawo,
ndipo charu chazamvumbuwa
ndopa zakudikiya paku cho,
ndipo kuti chikabisanga so ŵakubayika ŵake cha.
Bible Society of Malawi