Hoseya 11
11
Chanju chaku Chiuta pa ŵanthu ŵakumugarukiya
1Po Yisraele wenga mwana ndingumwanja,
ndipo ndingumudana mwana wangu kutuwa mu Egipiti.
2Mo ndinguŵadaniya,
ndimu so ŵangutuwiyako kwaku ine;
ŵangurutiriya kupereka sembe ku ŵaBala,
ndi kuŵawoche vyakununkhira ŵangoza.
3Ndipuuli ndine ndingusambizga
Efraimu kwenda.
Ndinguŵato ndi kuŵavumbatiya mu manja ghangu,
kweni kuti ŵanguziŵa cha kuti ndine ndinguŵachizga.
4Ndinguŵaguza ndi vingwe vya
lisungu, ndi maruzi gha chanju.
Ndinguŵa kwaku iwo,
nge ndi munthu yo watuzgamo matangaja mu matakama ghawo,
ndipo ndingukotamiya kwaku iwo, ndi kuŵapaska kurgha.
5Ŵakawerenga ku charu cha Egipiti,
ndipo Asiriya wakaŵanga karonga wawo,
chifukwa ŵakana kuwere kwaku ine.
6Lipanga likaŵanga pa misumba yawo,
kudumuwa mipiringizgu ya malikomo ghawo
ndi kuŵamara mu malinga ghawo.
7Ŵanthu ŵangu ŵaŵika mitima yawo pakutuwako kwaku ine;
viyo ŵarongozgeke ku goŵa,
ndipo palivi yumoza walituzgengeko.
8Kumbi ndingakujowo uli Efraimu!
Kumbi ndingakupereka uli Yisraele!
Kumbi ndingakusanduska uli nge ndi Adama!
Kumbi ndingakusanduska uli nge ndi Zeboyimu!
Mtima wangu ung'anamuka mukati mwangu, nde nawe ndilisungu likuru.
9Nkhafiskanga cha ukari wangu ukuru,
kuti nkhaparghang'anga so Efraimu cha;
chifukwa ndine Chiuta munthu cha, Mtuŵa mukati mwinu, ndipo kuti ndizenge kuzachiparghang'a cha.
10Ŵakarondonga Ambuya,
Ambuya akoromenge nge ndi nkharamu,
inya akoromenge,
ndipo ŵana ŵake ŵakazanga ndi chitenje kutuwa ku zambwe.
11Wakazanga ŵakutenthema nge nthuyuni twakutuwa ku Egipiti,
nge ndi nkhunda zakutuwa ku Asiriya,
ndipo nkhaŵawezgiyanga ku mizi yawo,
atiti Ambuya.
12Efraimu wandizingirizga ndi mautesi,
ndipo nyumba yaku Yisraele ndi chinyengo;
kweni Yuda weche kuziŵikwa ndi Chiuta,
ndipo ngwamagomezgeka ndi Mtuŵa Yumoza.
Currently Selected:
Hoseya 11: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
