Hoseya 10
10
Cheruzgu chaku Chiuta paku Yisraele
1Yisraele ndi mphereska yakukuwa umampha,
yo yipasa vipasi vyake.
Mo waliri ndi vipasi vinandi ndimo wazenge majochero ghanandi;
mo charu chake chiŵiya chamampha,
ndimo wachitiya vikozgo vyamampha.
2Mtima wawo ngutesi,
sono ŵatenere kusanirika ndi kafukwa.
Ambuya agumuliyenge pasi majochero ghawo,
ndi kubwanganduwa vikozgo vyawo.
3Chifukwa sono ŵakatinge:
“Tilive karonga,
chifukwa tiŵawopa cha Ambuya,
ndipo karonga watichitiyenge kanthu uli?”
4Ŵakamba mazu ghaŵaka;
ndi ŵarapa ŵaka pakuchita mapanganu
viyo cheruzgu chibuka nge ndi uteka wakuŵaŵa mu migando yamu munda.
5Ŵakuja mu Samaria ŵatenthema
chifukwa cha thole laku Betavene.
Ŵanthu ŵake ŵamuliriyenge,
ndi ŵazukuru ŵake wo ŵasopa ŵangoza ŵamutenjeriyenge,
chifukwa cha unkhankhu wake wo watuwapo.
6Inya, chikozgu chitolekiyenge ku Asiriya,
kuŵa munthulu ku karonga mukuru.
Efraimu walengeskekenge,
ndipo Yisraele walengenge soni chifukwa cha ngoza wake.
7Karonga wa Samaria wabwangandukenge,
nge nching'ombe pa maji.
8Malo gha pachanya ghaku Avene,
ndi kwananga kwaku Yisraele,
vyose vimarenge.
Minya ndi nthula vikamenga pa majochero ghawo;
ndipo ŵakatinge ku mapiri, “Wiyani paku ifwe”;
ndi mitunthu, “Tivunikiriyeni.”
Ambuya ateruzga Yisraele
9O! Yisraele wananga kwamba mu mazuŵa ghaku Gibeya;
ndipo kwenikuwa ŵarutiriya.
Kumbi nkhondo kuti yiŵasaniyenge cha mu Gibeya?
10Nkhazanga kumikana ndi ŵanthu ŵakuwere vuli kuŵaranga;
ndipo mitundu yiwunjikanenge kumikana nawo po ŵarangika,
chifukwa cha kwananga kwawo kuŵi.
11Efraimu wenga ng'ombe yinthukazi
yakusambizgika yo yingwanja kupepeta trigu,
ndipo ndengavi kumanga khosi lake lamampha;
kweni nkhamumanganga Efraimu mu matangaja,
Yuda walimenge,
Yakobe wakaswanga mawongolomwa ghake.
12Jipandiyeni urunji, vunani chipasi cha lisungu;
swani mawongolomwa;
chifukwa sono ndi nyengo yakupenje Ambuya,
mwakuti ŵaze ndi kung'iska utaski paku imwe.
13Mwalima ubendezi,
ndipo mwavuna uwura urunji,
mwargha chipasi cha mautesi.
Chifukwa mwagomezga mu magareta ghinu,
ndi mu unandi wa ŵankhondo ŵinu.
14Chifukwa ichi, mphomo ya nkhondo
yiyukenge mukati mu ŵanthu ŵinu,
ndipo malinga ghinu ghose ghapasulikenge,
nge ndimo Shalamani wangupasuliya Betarabele mu zuŵa la nkhondo;
ŵanyinawo ŵangutikinyika pamoza ndi ŵana ŵawo.
15Viyo ndimo kuchitikiyenge kwaku imwe, ŵanyumba yaku Yisraele,
chifukwa cha uheni winu ukuru.
Mu chimphunga karonga wa ŵaYisraele wazamudumulika.
Currently Selected:
Hoseya 10: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
