ŴaHebere 3

Yesu ndi mura kuruska Mosese

1Viyo na, mwa ŵabali ŵakupaturika, ŵasambazi ŵa mdanu wakuchanya, pimani wakutumika yo ndi Mzukuru Mura wachizomerezgu chidu, Yesu; 2yo wenga wamagomekezgeka kwaku yo wangumsankha, uli ndimo Mosese nayo waŵiyanga mu nyumba yake yose. 3Chifukwa mwenuyu wapimika wakwenere unkhankhu wakuruska ukongwaku kwaku Mosese, uli ndimo yo wazenga nyumba waliri ndi thamu likuruku ku nyumba. 4Chifukwa nyumba yose yizengeka ndi munthu wakuti: kweni wakuzenga vyose ndi Chiuta. 5Ndipo Mosese nadi wenga wamagomekezgeka mu nyumba yake yose nge ngwakuteŵeta, kuti waŵe kaboni waku vyo vitakambikanga; 6kweni Kristu nge ndi mwana, pa nyumba yake; nyumba yaku mweniyo ndifwe, asani tikoreska chiganga chidu ndi chitumbwa cha chigomekezgu chidu gwa mpaka umari.

Chipumulu cha ŵanthu ŵaku Chiuta

7Viyo na, uli ndimo wanene Mzimu Wakupaturika,

“Le asani muvwenge liu lake,

8mungangangamiskanga mitima yinu, uli ndi mu chigaruka cho,

nge ndi mu zuŵa la kesedu ko mu bozwa,

9keniko auskemwe ŵangundesa,

ndipo ŵanguwona machitidu ghangu virimika machumi ghanayi.

10Viyo na ndingukaraliskika nayo mphapu yeniyi,

ndipo ndinguti, ‘Rutaruta ŵarandiyarandiya mu mitima yawo:

kweni iwo kuti ŵanguziŵa cha nthowa zangu.’

11Uli ndimo ndingurapiya mukandundu kangu,

kuti ‘Wamsere cha mu chipumulu changu.’ ”

12Cheŵani, mwa ŵabali vinu kokuli mu yumoza waku imwe uŵenge mtima uheni wambura chivwanu, mu kudezukako kwaku Chiuta wamoyo. 13Kweni chiskanani zuŵa ndi zuŵa kweche kuzumbulika “Le,” vinu yumoza waku imwe wangangangamiskika ndi fuvyu la ulakwi: 14chifukwa taŵa ŵasangazi ŵaku Kristu, asani tikoreska chandiru cha chigomekezgu chidu nganganga mpaka umari; 15po kweche kukambika kuti,

“Le, asani muvwenge liu lake,

mungangangamiskanga mitima yinu,

uli ndi mu chigaruka cho.”

16Kumbi mbayani wo, ŵanguti ŵavwa ŵangugaruka? Asi ndi wose wo ŵangutuwa ku Egipiti ndi Mosese? 17Ndipo mbayani wo ŵanguŵatundiriya virimika machumi ghanayi? Asi mbakulakwa wo, vyaku ŵeniwo vitanda vinguwa mu buzwa lo? 18Ndipo mbayani wanguŵarapiya kuti ŵangasere cha muchipumulu chake, kweni ku ŵamtafu wo? 19Ndipo tiwona kuti ŵanguwuravi nthazi kwachisere chifukwa chakuŵavi chivwanu.

Currently Selected:

ŴaHebere 3: TongaMw

Highlight

Copy

Compare