ŴaHebere 2

Utaski ukuru

1Chifukwa chenichi kutenere kwakuruska kuphwere vyo vinguvwika, vinu tingadeukako. 2Chifukwa asani mazu gho ghangukambika ndi ŵangelo ghanguŵa ghakukho, ndipo ubudi wose ndi mtafu unguronde chilambula mphotu chakurunjika; 3tikapozomokanga uli ifwe taŵakujowo utaski weniukuru wo? Weniwo, pakukambika danga ndi Ambuya, ungukhozgeke kwaku ifwe ndi ŵeniwo ŵanguvwa; 4Chiuta nayo wakusimikizgiyapo ndi visimikizgundi so ndi minthondwi, ndi nthazi zamitundumitundu, ndipo ndi mipasku ya Mzimu Wakupaturika, kwakulingana ndi khumbo lake.

Yo watitirongozge ku utaske

5Chifukwa kuti nkhu ŵangelo cha kuti wanguthereska ujazi wo utuza, vyaku weniwo tikamba. 6Kweni yumoza wasimikizga pakuti,

“Nkhane munthu, kuti mumkumbuke?

Pamwenga mwana wa munthu kuti mumlingizga?

7Mwamchefyako kamanavi ku ŵangelo;

mwamvwalika unkhankhu ndi thamu,

ndipo mwamjarika pachanya pa nchitu za manja ghinu:

8nwaŵika vyose kusi ku marundi ghake.”

Chifukwa mukuŵika vinthu vyose pasi paku iyo, walive kusiyapo kanthu kambura kuŵikika pasi pake. Kweni ndasono tindawone vyose kuŵikika pasi pake. 9Kweni yo ngwakuchefyeka kamanavi ku ŵangelo timwona, ndiyo Yesu, wakuvwalikika unkhankhu ndi ulemu pa chifwa cha chikomwa cha nyifwa, viyo kuti mu wezi waku Chiuta wesiyepo nyifwa chifukwa cha munthu yose. 10Chifukwa kunguyiyamu iyo, kwaku mweniyo vye vyose, ndi mwaku mweniyo vye vyose, pakutoliyamu ŵana ŵanandi mu unkhankhu, kufiskiya ndi vikomwa nduna ya utaski wawo. 11Chifukwa yo wapatuwa ndiso ŵeniwo mbakupaturika wose mba ku yumoza. Chifukwa chenichi kuti walenga soni cha kuŵatamula ŵabali, 12wakuti,

“Nditauliyenge zina linu ku ŵabali ŵangu,

mukati mu mpingu ndimurumbeninge.”

13Ndipo so,

“Ine nkhaŵanga wakugomezga mwaku iyo.”

Ndipo so,

“Awonani, ine ndi ŵana ŵeniwo Chiuta wandipaska.”

14Pakuti ŵana, nge ndimo watuŵadaniya, mbanthu ŵa kaŵiro ka liŵavu, Yesu nayo wanguŵa nge ndiwo, ndi wangusangana kaŵiro ka unthu; kuti mu nyifwa wangamuwayuwayo wenga ndi nthazi ya nyifwa, ndiyo diabolo; 15ndi wangadomo wose ŵeniwo mu chopu cha nyifwa mu umoyo wawo wose ŵanguŵa ŵakuzighirika ku uŵanda. 16Chifukwa nadi kuti watovyako ŵangelo cha, kweni watovya mbeu yaku Abrahamu. 17Viyo na wangwenere mwaku vyose kulinganizgika ku ŵabali ŵake, alinga kuti waŵiye kuchiri kwaku Chiuta mzukuru mura walisungu ndi wamagomekezgeka, kwachipepeske pa vilakwa vya ŵanthu. 18Chifukwa po wakomwe pakweseka, ngwanthazi kuwovya wo ŵateseka.

Currently Selected:

ŴaHebere 2: TongaMw

Highlight

Copy

Compare