ŴaHebere 13

Mo tingakondweske Chiuta

1Kwanja ŵabali kwinu kujaririyenge. 2Mungaruwirizga kwanja ŵalendo nako; chifukwa viyo ndimo ŵanyake ŵangurondere ŵangelo ŵakuseŵe nawo kwambura kuŵaziŵa. 3Kumbukani ŵamagoŵa wo ulimba kumangikiya pamoza nawo; kumbukani wo mbakuchitikiya uheni, pakuti namwe so mwe muliŵavu lo. 4Nthengwa yiŵe yaulemu mwaku wose, ndipo chita chiŵe chikhovu: chifukwa ŵareŵi ndi ŵarowozi waŵeruzgenge Chiuta. 5Nkharu yinu yingaŵanga yakwanja ndrama cha; mukhorwe ndi vyo mwe navyo; chifukwa wanguti mweneko, “Kuti ndamleka iwe cha, chingana nkhuti ndamsiya iwe cha kosekose.” 6Viyo ifwe taŵakuchintha mtima tititi,

“Mbuya ndi Movya kwaku ine;

kuti ndopenge cha:

munthu wandichitiyenge chine?”

7Kumbukani ŵarongozgi ŵinu, ŵeniwo ŵangukamba namwe mazu ghaku Chiuta, ghanaghanani ndi vipasi vya umoyo wawo, mwezge chivwanu chawo. 8Yesu Kristu zana ndi le ndi mweniyo pe, ndi so ku muyaya. 9Mungalongozgeka ndi visambizgu vyamtundumtundu ndi vilendo: chifukwa nkhwamampha kuti mtima ukhozgeke ndi wezi; ndi vyakurgha cha, mwenimo ŵakutangwanikamo kuti ŵangawovyeka kanthu cha. 10Te nacho chisoperu, paku chenicho ŵalive mtufu kurghapo ŵeniwo ŵachiteŵete chihema. 11Chifukwa vitocheke kubwaro ku ugoŵi vitanda vya vinyamandopa zaku vyo zitoleke mu malo Ghakupaturika ndi mzukuru mura nge ndi sembe yapa ulakwi. 12Viyo so Yesu nayo, alinga kuti wapaturiye khamu mu ndopa zaku yija, wangukomwa kubwaro ku ugoŵi. 13Viyo nafwe tituliye kubwaro ku ugoŵi ŵakupinga tozu lake. 14Chifukwa panu tirive muzi wakujaririya, kweni tiupenja wo utuza. 15Viyo mwaku iyo tipereke kwaku Chiuta rutaruta sembe yakuthamikiya, ndiyo chipasi cha milomo yakuzomerezga Zina lake. 16Ndipo kuchita umampha ndi kusangana kwawezi mungaruwanga cha: pakuti ndi visopu vyaviyo Chiuta wakondwereskeka ukongwa.

17Vwiyani ŵarongozgi ŵinu, ndipo ŵatheriyeni: chifukwa iwo ŵalindiya pa chifwa cha mizimu yinu, uli mbeniwo ŵamkamba likonkhoska; alinga ŵalichite ndi chimwemwe, ndipo ndi kudinginika cha: chifukwa chenichi chingaŵiya imwe chambura chanduku.

18Rombani pa chifwa chidu: pakuti tikopeka kuti te nayo njuŵi yamampha, taŵakukhumba mwaku vyose kuja umampha. 19Ndipo ukongwa viŵi ndikuchiskani kuchita chenichi alinga kuti ndiwezgeke ruŵiruŵi kwaku imwe.

Rombo lakujariya

20Ndipo Chiuta iyo wa chimangu, mweniyo wangumyuska ku ŵakufwa Mliska yo Mura wa mberere mu ndopa za chipanganu chamuyaya, ndiyo Ambuyafwe Yesu, 21wakongoreske imwe ku mlimu wose wamampha, kwachichita khumbu lake, ndi watataliye mwaku imwe cho nchakukondweska paurongo pake, mwakuYesu Kristu; kwaku mweniyo kuŵiyenge unkhankhu muyaya-muyaya, Ameni.

Mazu ghakumariya

22Kweni ndikuchiskani, mwa ŵabali, junthiyanipo mazu gha chichiska cho; pakuti ndakulembiyani ndi mazu ghakuŵerengeka. 23Ziŵani kuti mbali widu Timote wafwatulika; pamoza ndi mweniyo, asani wazenge ruŵi, ndazamkumuwonani. 24Tauzgani ŵarongaozi ŵinu wose, ndi wose ŵakupaturika wo. Wo ŵaku Italia ŵakutauzgani. 25Wezi uŵe ndi imwe mose, Ameni.

Currently Selected:

ŴaHebere 13: TongaMw

Highlight

Copy

Compare