Ezekiele 5

1“Ndipo iwe, mwana wa munthu, uto lipanga lakuthwa; ulichite nge ndi lwembe lakumete lijumphiske pachanya pa mutu wako ndi pa mwembe wako; ndipo uto chakupimiya uzitu, upatuwe sisi. 2Chigaŵa chimoza cha vigaŵa vitatu uwoche pa moto mukati mu msumba, asani mazuŵa ghakuwujarizgiya ghafiskika; chigaŵa chinyake uchipume-pume ndi lipanga kuzunguliya msumba; ndipo chigaŵa cha chitatu uchimbininiske ku mphepo, ndipo ine ndikasoronga lipanga pavuli pawo. 3Utoko so sisi limanavi ulimange pa raya lako. 4Kwakulenili nako utoko limanavi, ulitaye pa moto, uloche pa moto; ndipo kutuwa penipa moto ukafikanga mu nyumba yose yaku Yisraele.

Kubwanganduka kwa msumba

5“Viyo atiti Ambuya, Chiuta: Uyu ndi Yerusalemu; ndamujarika pakati pa mitundu, ndi vyaru vyakumuzunguliya. 6Kweni wagarukiya vyeruzgu vyangu kwa ukazuzi kuruska ŵamitundu, ndi virunguchizgu vyangu kwakuruska vyaru vyakumuzunguliya, pakukana vyeruzgu vyangu ndi kureka kwenda mu virunguchizgu vyangu. 7Viyo atiti Ambuya Chiuta: Chifukwa mwaŵa ŵa mtafu ukongwa kuruska mitundu yo yamuzingirizgani imwe, ndipo kuti mwayendamu virunguchizgu vyangu pamwenga kusunga vyeruzgu vyangu cha, kweni mwayenda kwakuyana ndi vyeruzgu vya mitundu yo yamuzingirizgani imwe; 8mu chifukwa cho Ambuya Chiuta: atiti, Awona, ine, inya, ine ndamikana nawe; ndipo ndikachitanga cheruzgu mukati mwako pa maso pa mitundu. 9Chifukwa cha unyakazi wako wose ndikakuchitiyanga chenicho kuti ndachitapo cha kali kose, nanga nkhuti chaviyo kuti ndikachichitanga so cha. 10Mu chifukwa cho auskeu ŵakarghanga ŵana ŵawo mukati mwinu, ndipo ŵana ŵakarghanga auskeu; ndikaŵikanga cheruzgu paku imwe, ndipo we yose wakujapo mwaku imwe ndikamdikiskiyanga ku mphepo zose. 11Viyo, mo ndiliri wamoyo, atiti Ambuya Chiuta, kwakuneneska, pakuti mwakazuzga malo ghangu ghakupaturika ndi vinthu vinu vyose vyakuchitiska soni ndi maunyakazi ghinu ghose, nadi ndikakudumuliyaninga pasi; jiso langu kuti lisiyengepo cha, ndikaŵangavi lisungu. 12Chigaŵa chimoza cha vigaŵa vitatu vyaku imwe ŵakafwanga ndi chiwowota ndi kumara ndi chilala mukati mwinu; chigaŵa cha chitatu ŵakabayikanga ndi lipanga lakumuzingirizgani imwe ndipo chigaŵa cha chitatu ndimbininiskiyenge ku mphepo zose ndipo ndikasoronga lipanga pavuli pawo. 13“Viyo ndimo ukari wangu ukamariyanga, ndikajikhorweskanga pakupunguliya kukwiya kwangu paku iwo; sono ŵakaziŵanga kuti ine, Ambuya, musanji yangu ndarongoro, po ndifiska kukara kwangu paku iwo. 14Ndipo so ndikakuchitaninga phasulu ndi chinthu chakuwereka mukati mu mitundu yakumuzingirizgani ndi mu maso ghaku wose ŵakujumphapo. 15Mukaŵanga chakuwereka, ndi chakunyozeka, sunjizgu ndi chakuyeyeka, ku mitundu yakumuzingirizgani, penipo ndiŵika cheruzgu paku imwe mu ukari ndi kandundu kangu, ndi kulengika kwakofya ine, Ambuya, ndakamba; 16po ndipong'e paku imwe mivwi yangu ya kubaya, ya chilala, mivwi ya phasulu, yo ndikatumanga ku kuparghang'ani ndi penipo nditore paku imwe chilala pa chilala, ndi kufyo nchirikizgu yinu ya chiŵande. 17Ndikatumanga chilala ndi vikoko vya mudondo paku imwe, vikakuphanganinga ŵana ŵinu; chiwowota ndi ndopa vikaporotanga mukati mwino; ndipo ndi kazanga ndi lipanga paku imwe. Ine, Ambuya, ndarongoro.”

Currently Selected:

Ezekiele 5: TongaMw

Highlight

Copy

Compare