Ezekiele 19
19
Chitenje cha paku Yisraele
1Ndipo iwe, samphuskiya mafumu ghaku Yisraele chitenje, ukambe kuti:
2Nadi, anyoko ŵenga nkharamu yinthukazi
mukati mu zinkharamu!
Yingugona pasi mukati mu zinkharamu za mpupuka,
yaleranga ŵana ŵake.
3Yingukuzga yumoza wa ŵana ŵake;
wanguŵa nkharamu ya mpupuka,
yingusambira kuko nyama;
yinguparuwa ŵanthu.
4Mitundu ya ŵanthu yingusoka kumikana nayo;
yingukoreka mu mbuna yawo;
ŵanguza nayo ndi zimbeja
kucharu cha Egipiti.
5Po yinguwona kuti yasunjizgika,
ndi kuti chigomezgu chathaŵa,
yinguto mwana wake munyake
kumusanduska nkharamu ya mpupuka.
6Yingwendayenda mukati mu zinkharamu;
yinguŵa nkharamu ya mpupuka,
yingusambira kuko nyama;
yarghanga ŵanthu.
7Ndipo yingupankhuwa malinga ghawo ghakukho,
kupasuwa misumba yawo;
charu chingutenthema ndi wose ŵakuŵamo
pa mazu gha kubangura kwake.
8Sono mitundu yinguyithyiya viŵana kosekose;
ŵanguyizinga ndi mkwawu;
yingukoreka mu mbuna yawo.
9Ŵanguyiŵika mu chipanga ndi zimbeja,
ŵanguza nayo ku karonga wa Babiloni;
ŵanguyitore mu nyumba ya ulinda,
mwakuti mazu ghake ghareke kuvwika so
pa mapiri gha Yisraele.
10Anyoko ŵanguŵa nge ndi mphereska mu munda wa mphereska,
ŵanguwokeka pafupi ndi maji,
ŵakupasa vinandi, ŵakuŵa ndi mphanda zinandi,
chifukwa cha unandi wa maji.
11Muti wake wanthazi ukongwa unguŵa ndodo ya wakweruzga;
ungukwere kuchanya ukongwa mukati mu mphanda zakunyekezgana;
wunguwoneka mu utali wake pamoza ndi unandi wa mphanda zake.
12Kweni mphereska yinguzuwika mu ukari,
yingupong'eka pasi;
mphepo yakutuwa ku vuma yinguyimizga;
chipasi chake chingupurutuka, muti wake wanthazi ungufota;
moto unguwupirizga.
13Sono ukuwokeka mu bozwa,
mu charu cha kumira ndi chachiparamba.
14Ndipo moto watuwa mu liŵavu lake,
wapirizga mphanda ndi vipasi vyake,
mwakuti kuti wajamo so muti wanthazi cha,
ndodo ya chifumu ya wakweruzga mulivi.
Ichi nchitenje, ndipo chaŵa chitenje mbwenu.
Currently Selected:
Ezekiele 19: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
