Estere 7
7
Hamani wasumulika ndi wapayikika
1Viyo karonga ndi Hamani ŵanguza ku dghera ndi fumukazi, Estere. 2Ndipo pa zuŵa lachiŵi ŵachimwa vinyo karonga wangukamba so ndi Estere pa dghera lo kuti, “Kumbi pemphu lako ndakutinji, fumukazi Estere? Kupaskikenge kwaku iwe; ndipo khumbo lako ndine? Ndipo likachitikanga chingana nkhu chigaŵa chimoza cha vigaŵa viŵi vya ufumu.” 3Ndipo fumukazi Estere wanguwamuka wanguti, “Asani ndasaniya wezi mu maso ghino, imwe karonga, ndipo asani chakondweska karonga, umoyo wangu upaskike kwangu ndi ŵanthu ŵangu paku cho ndipempha. 4Chifukwa taguliskika, ine ndi ŵanthu ŵamtundu ŵangu kuti timalike, tibayike ndi timare teteti. Asani tiguliskikenge nge mbaŵanda ŵanthurumi ndi ŵaŵanda ŵanthukazi mphanyi ndaja chete; chifukwa kukomwa kwidu kuti kungalinganizgika ndi suzgu ya karonga cha.” 5Penipo karonga Ahaswerusi wangwamuka wanguti kwaku Estere, “Kumbi ndiyani, ndipo we pani, mweniyo wendi chiganga mu mtima wake kuchita viyo?” 6Estere wanguti, “Chimphindikwa ndi murwani, ndi uyu Hamani muheni!” Ndipo Hamani wangutenthema ukongwa paurongo pa karonga ndi fumukazi. 7Karonga wangusoka pa dghera ndi ukari, wanguruta ku munda wa maluŵa wa nyumba ya ufumu kweni Hamani wangusoka wakuŵeyerere umoyo wake ku fumukazi Estere, pakuti wanguwona kuti karonga wangutundiya ndi wakhumbanga kumuchitiya chiheni. 8Ndipo karonga wanguwe ku munda wa nyumba ya ufumu wangusere mu nyumba mo mwenga dghera la vinyo, wanguwona Hamani wawa pa chakujapo cho wangujapo Estere. Karonga wanguti, “Kumbi wachichizga so fumukazi pa maso ghangu mu nyumba?” Pakutuwa mazu mu mlomo wa karonga ghangumubenekere Hamani chisku. 9Ndipo Harbona yumoza wa ŵateŵeti ŵakaronga, wanguti, “Awonani muti wo msinkhu wake we mikono machumi ghankhonde, wo Hamani wanguchitiya Mordikayi yo mazu ghake ghangupozomoska karonga, wemu nyumba yaku Hamani.” 10Karonga wanguti, “Mpayikeni paku weniwo!” Viyo ŵangumpayika Hamani pa muti wo iyo wangulongosore Mordikayi. Ndipo kandundu ka karonga kangutuna.
Bible Society of Malawi