Estere 3
3
Mordikayi wakana kulambiya Hamani
1Pavuli pa vinthu ivi karonga Ahaswerusi wangumtumphuwa Hamani mwana waku Hamedata mu Agagi, wanguŵika chitengo chake pachanya pa vitengo vya ŵakaronga wose wo wenga nawo. 2Ndipo ŵateŵeti wose ŵa karonga ŵapa likomo la karonga ŵangukotama ndi kumlambiya Hamani, chifukwa karonga wangulangula viyo paku iyo. 3Kweni Mordikayi kuti wangukotama chingana nkhumlambiya cha. Viyo ŵateŵeti ŵakaronga wo ŵenga mu likomo la karonga ŵangunena ndi Mordikayi, kuti, “Kumbi ulekiyanji kuvwiya dangu la karonga?” 4Pakukamba nayo mazuŵa ghose kuti wanguŵavwiya cha, ndipo wangumunene Hamani kuti waziŵi vinu chifukwa chaku Mordikayi chenga chamampha; chifukwa iyo wanguŵanene kuti iyo ndi mu Yuda. 5Hamani wanguti wawona kuti Mordikayi wareka kukotama ndi kumlambiya wanguzazika ndi ukari. 6Kweni wanguti nkhuyuyu kuŵika janja paku Mordikayi yija chifukwa ŵanthu ŵangumukonkhome mtundu ndi khamu laku Mordikayi ndipo Hamani wangunweka kunanga ŵaYuda wose, mtundu waku Mordikayi wose wo wenga mcharu chose chaku Ahaswerusi.
7Mu mwezi wakudanga, wo ndi mwezi wa Nisani,#3.7 Nisani: ndi zina linyake la mwezi wa Abibi. Ndi nyengo yo ye pakati pa mwezi wa Marichi ndi Epulayelo. chirimika cha chumi ndi viŵi cha karonga Ahaswerusi, ŵanguwombeza Puri (uwu ndi ula.) Zuŵa ndi zuŵa, maso ghaku Hamani ndiso mwezi ndi mwezi mpaka mwezi wa chumi ndi yiŵi, mwezi wa Adara.#3.7 Adara: ndi nyengo yo ye pakati pa mwezi iwa Feburuware ndi Marichi. 8Ndipo Hamani wanguti ku karonga Ahaswerusi, “Uliko mtundu unyake wa ŵanthu ŵakuparangikiya ku bwalo kwa charu ndi wakuchapariya mukati mu ŵanthu mu vigaŵa vya ufumu winu, ndipo marangu ghawo ghapambana ndi gha ŵanthu wose chingana nkhuti ŵasunga marangu gha karonga cha, viyo chitumwanduliya kanthu cha karonga kuti walereskepo ŵaka. 9Asani karonga wakondweskeka nacho, iku kulembeke kuti ŵabayike ndipo ine ndi paskenge matalente gha siliva vikwi chumi mu manja gha zinduna za nchitu ya karonga, kuti ŵaze nagho kughaŵika mu nyumba za usambasi wa karonga.” 10Viyo karonga wanguzuwa mphete ku janja lake, ndikupaska Hamani mwana waku Hamedata mu Agagi, murwani wa ŵaYuda. 11Ndipo karonga wanguti kwaku Hamani, “Siliva ndako, ndi ŵanthu viyo kuti uchite nawo nge ndimo ungakhumbiya.”
12Viyo ŵalembi ŵa karonga ŵangudanika pa zuŵa la chumi ndi ghatatu la mwezi wakudanga, ndipo vingulembeka vyose vyo Hamani wangulanguliya ŵalembi ku zinduna za karonga ndi ŵeruzgi ŵakutufuliya ndi ŵakuwusa ŵanthu mu vigaŵa vyose kwaku wose mukarongololedu ka mazu ghawo, kungulembeka mu zina la karonga Ahaswerusi ndi kudidimizgapo mphete ya karonga. 13Ŵakalata ŵangutumika ku vyaru vyose vya karonga kuti kuŵenge kubaya ndi kumara ŵaYuda wose, ŵamana ndi ŵara, ŵana ndi ŵanthukazi, mu zuŵa limoza, pa zuŵa la chumi ndi ghatatu la mwezi chumi ndi yiŵi, mwezi wa Adara, ndi kuskoŵa vyawo. 14Makani gho ghangulembeka gha langulu ku vigaŵa vyose ghangumemezeke ku ŵanthu wose kuti ŵarongosoleke zuŵa lo. 15Mathenga ghanguruta kwakutinthimiskika ndi mazu gha karonga, ndipo langulu ili linguperekeka mu msumba Susa. Ndipo karonga ndi Hamani ŵanguja pasi, ŵamwanga, kweni msumba unguyungwanika.
Bible Society of Malawi