ŴaEfeso 5

Kuja mu ukweru

1Viyo muŵe ŵakumwezga Chiuta, uli mbana ŵakwanjiwa; 2ndipo yendani mu chanju, nge ndimo Kristu nayo wangumwanjiyani, ndi wangujipereka chifukwa chinu mpasku wachema chamampha ndi sembe kwaku Chiuta.

3Kweni kungazumbulika mwinu cha chingana mbureŵi, chingana mbukazuzi wose, chingana nchiŵinu, uli nkhwakwenere ŵakupaturika; 4chingana ndi lilengu, chingana mbubepi, chingana ndi mphekulu yiheni, vyenivyo vyambura kuyamo; kweni ukongwa kuwonga. 5Chifukwa namwe muziŵiska chenichi, kuti chingana ndi mureŵi yose, chingana ngwawiyu, chingana ngwachiŵinu, yo ndi msopangoza, walive chihara mu ufumu waku Kristu ndi Chiuta. 6Wangamfuvyani cha munthu yumoza ndi mazu ghaŵaka: pakuti chifukwa chaku vyenivi katuziya kandundu kaku Chiuta pa ŵana ŵa mtafu. 7Viyo mungaŵanga ŵakusangana nawo cha; 8chifukwa kali mwenga mu mdima, kweni sono mwe kungweruka mu Mbuya: yendani ulaka mbana ŵa kungweruka 9(chifukwa chipasi cha kungweruka ko nchamu umampha wose ndi urunji ndi uneneska), 10ŵakwesa cho nchamarumbika ku Ambuya; 11ndipo mungasangana ndi nchitu zambura vipasi za mdima, kweni viŵiviŵi muzisuske nadi; 12chifukwa nkhwalilengu chingana nkhukamba vyenivyo vichitika nawo mu ubisibisi. 13Kweni vyose vyakususkika virongoleka ndi kungwerukako, pakuti chose chakurongoleka chisanduka kungweruka. 14Viyo watiti,

“Yuka iwe, wakura tulo,

ndipo yukanga ku ŵakufwa,

ndi wakuwaliyenge Kristu.”

15Viyo na, lereskani kaunthu po mutende, nge mbambura zeru cha, kweni nge mbazeru, 16ŵakujiwombole nyengo, pakuti ngaheni mazuŵa gho. 17Chifukwa chenichi mungaŵanga ŵakupusa cha, kweni ŵakuchiteska cho ndi khumbu la Ambuya. 18Ndipo mungaloŵenga ndi vinyo cha, mwaku yo mwe utayisi kweni muzazike ndi Mzimu; 19ndi kukambirana mu buku la Sumu,#5.19 buku la Sumu: ndilo Masalmo. ndi mu sumu, ndi mu sumu zamzimu, pakumbiya ndi ghankhoŵera mu mtima winu ku Ambuya, 20pakuwonge so nyengo zose Chiuta ndi Dada pa chifukwa chaku vyose mu zina la Ambuyafwe Yesu Kristu.

Ŵarumi ndi ŵawoli

21Ndi pakujithereskiyana mu wofi waku Kristu. 22Mwaŵanthukazi mwe, jithereskiyeni ku ŵarumi ŵaku mwija, nge nkhu Ambuya. 23Pakuti munthurumi ndi mutu wa muwoli wake, uli ndimo Kristu nayo ndi mutu wa eklesiya, pakuŵa mweneko mtaski wa liŵavu lo. 24Kweni uli ndimo eklesiya lo lijithereske kwaku Kristu, viyo so ŵanthukazi nawo ku ŵarumi ŵawo mu chinthu chose. 25Mwamadoda mwe, yanjani ŵawoli ŵinu, uli ndimo Kristu nayo wangwanjiya eklesiya lo, ndipo wangujipereka pa chifwa chake; 26alinga kuti walipatuliske, wati walitozge mu chibatizo ndi mazu, 27alinga kuti wajijarikiye nge ndi muwoli wa eklesiya lo launkhankhu, lakuŵavi donthu pamwenga nkhwinya pamwenga kanthu kaviyo, kweni kuti liŵe lakupaturika ndi lambura kalema. 28Viyo nako ŵanthurumi ŵatenere kuŵanja ŵawoli ŵawo nge ndi maliŵavu ghaku ŵija. 29Wakwanja muwoli wake ngwakujanja: chifukwa palive munthu wangatinkha kose liŵavu laku yija; kweni walilera ndi walipakata, uli ndimo Kristu nayo wachitiya eklesiya lo; 30pakuti te viŵaru vya liŵavu lake. 31“Chifukwa chenichi munthu wakalekanga wiske ndinyina, ndipo wamiziriyanenge ndi muwoli wake; ndipo wo ŵaŵi ŵaŵenge liŵavu limoza.” 32Ungari uwu ngukuru: kweni ine ndikamba Kristu ndi eklesiya lo. 33Kweni imwe namwe, yumoza ndi yumoza, yose wamwanjenge viyo muwoli wake waku yija nge ndi yija; ndipo muwoli wope murumi wake.

Currently Selected:

ŴaEfeso 5: TongaMw

Highlight

Copy

Compare