Marangu 7
7
Mosese waŵakambiya za ŵaKanani ndi visopo vyawo
(Chituwa 34.11-16)
1“Penipo Ambuya Chiuta winu wamukukutoriyani mu charu mwakucho musere kwachironda kuti chiŵe chinu, kudikiskiya kutali mitundu yinandi kutuwa pa maso pinu, ŵaHiti, ŵaGirgashi, ŵaKanani, ŵaAmori ŵaPerizi, ŵaHivi, ndi ŵaYebusi, mitundu yinkhonde ndi yiŵi, yikuru ndi yanthazi kuruska imwe. 2Ndipo Ambuya Chiuta winu waŵapereka kwaku imwe, ndipo imwe muŵapunde, ndi kuŵaparghang'a phu; mungapangananga nawo phanganu cha, chingana nkhuŵachitiya lisungu. 3Mungatorananga nawo nthengwa, kuzomerezga ŵana ŵinu ŵanthukazi kutorana ndi ŵana ŵawo ŵanthurumi, pamwenga ŵana ŵinu ŵanthurumi kuto ŵana ŵawo ŵanthukazi. 4Chifukwa ŵapatuskenge ŵana ŵinu kurondo ine kuti ŵateŵete ŵachiuta ŵanyake. Viyo ukari wa Ambuya ukakolenga kumikana namwe, ndi kumuparghang'ani. 5Kweni mukachite nawo viyo, mukabwanganduwe majochero ghawo ndi kuphwatiya pasi mizati yawo, ndi kudumuliya pasi ŵakavuwa ŵawo ndi kocha ndi moto vikozgu vyawo vyakusemeka.
6“Chifukwa imwe mwe ŵanthu ŵakupaturika kwa Ambuya Chiuta winu, Ambuya Chiuta winu wakusankhani kuti muŵe ŵake ŵapade, kutuwa ku ŵanthu wose wo ŵe pa charu. 7Po Ambuya angumwanjani ndi angumusankhani kuti nchifukwa chakuti mwenga ŵanandi kuruska ŵanthu ŵanyake cha, mwenga ŵamana kwakuruska ŵanthu wose cha. 8Kweni nchifukwa chakuti Ambuya atumwanjani, ndipo asunga rapu lo angurapa ku auskemwe, ndimo Ambuya amutuzgiyani ndi janja lanthazi ndi kumuwomboni ku nyumba ya uŵanda, kutuwa mu janja laku Farao karonga wa Egipiti. 9Viyo ziŵani kuti Ambuya Chiuta winu ndi Chiuta wamagomekezgeka, yo wasunga phanganu ndi lisungu ndi ŵeniwo ŵatumwanja, ndi ŵasunga marangu ghake, kufika ku mwandano wa chikwi (1,000). 10Ndi kuŵawezge thayu pa maso pawo ŵeniwo ŵatimutinkha, pakuŵaparghang'a, kuti wakazuwulikanga cha ndiyo watimutinkha, wakamuwezgiyanga thayu pa maso pake. 11Viyo mutenere kuphwere kufiska marangu, visambizgu, ndi vyeruzgu vyenivyo ndikulanguliyani zuŵa ili.
Vitumbiku mu kuvwiya
(ŴaLevi 26.3-13; Marangu 28.1-14)
12“Ndipo chifukwa mwamuvwiya vyeruzgu vyo ndi kuvisunga, Ambuya Chiuta winu wakasunganga kwaku imwe phanganu ndi lisungu lenilo wangurapa kwa auskemwe. 13Wakwanjeninge ndi kumutumbikani ndi kukwandaniskani. Ndiso watumbikenge ŵana ŵinu, vipasi vya mu minda yinu, trigu winu, vinyo winu, ndi mafuta ghinu, kwandana kwa ng'ombe zinu, ndi ŵana ŵa mberere zinu, mu charu cho wangurapa ku auskemwe kukupaskani. 14Mutumbikikenge kwakuruska ŵanthu ŵanyake wose, kuti yiŵengepo cha, mbomi mu ŵanthurumi, pamwenga chumba mu ŵanthukazi, pamwenga ng'ombe zinu zambura kubala. 15Ndipo Ambuya atuzgengeko utenda wose kwaku imwe, ndi kuti aŵikenge paku imwe cha zinthenda za vyanusi zamu Egipiti zo muziŵa, kweni akaziŵikanga paku wose wo ŵatimutinkhani. 16Muparghang'enge ŵanthu wose ŵeniwo Ambuya Chiuta winu waŵaperekenge kwaku imwe. Jiso linu lireke kuŵafwiya lisungu nanga nkhuteŵete ŵachiuta ŵawo, pakuti ichi chiŵenge chiŵana kwaku imwe.
17“Asani mwamukuti mu mitima yinu, ‘Mitundu iyi njinandi kwakuruska ifwe, tingaziŵa kuŵadikiska uli?’ 18Mungachiŵawopanga cha kweni mukumbuke vyo Ambuya Chiuta winu wanguchita kwaku Farao ndi ku Egipiti yose; 19vyakwese vyo maso ghinu ghanguwona, visimikizgu vyakuziziswa, janja lanthazi ndi mkono wakutambaruka, ndi vyenivyo Ambuya Chiuta winu wangumutuzgani navyo. Ndimo Ambuya Chiuta winu wakachitiyanga ku ŵanthu wose ŵeniwo mutopa. 20Viyo so, Ambuya Chiuta winu wakatumanga masanganavu mukati mwawo, mpaka wo ŵangajako ndi kujibisa ku maso ghinu, ŵaparghang'ika. 21Mungaŵawopanga pakuti Ambuya Chiuta winu we mukati mwinu, Chiuta wanthazi ndi wakofya. 22Ambuya Chiuta winu watuzgengepo mitundu iyi panthazi pinu kamanakamana, kuti mwakuŵamara ruŵi cha, vinu vikoko vyamu dondo vingachimwa ndaniyani ukongwa. 23Kweni Ambuya Chiuta winu waŵaperekenge kwinu, ndi kuŵataya mu chimutimbaheka chikuru, mpaka ŵaparghang'ike. 24Ndipo waperekenge ŵakaronga ŵawo mu janja linu, ndipo mumarizgenge mazina ghawo kutuwa pasi pano; pamuwuravi munthu yumoza wakuma kumikana namwe, kweni mukaŵaparghang'e wose. 25Vikozgu vyakusemeka vya ŵachiuta ŵawo, mukaviwochenge ndi moto; mungachikhumbiranga siliva, chingana ndi golide lo le paku vyo, pamwenga kulito kuti liŵe linu vinu mungajiwizga nalo, chifukwa mbukazuzi kwa Ambuya Chiuta winu. 26Ndipo kuti mukatoriyanga kanthu ka ukazuzi cha ku nyumba yinu, vinu mungaŵa ŵakutembeka nge ndicho; kweni muchitinkhe ukongwa limu, ndi kunyanyara nacho, chifukwa nchinthu chakutembeka.
Currently Selected:
Marangu 7: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
