Marangu 33
33
Mosese watumbika mafuka chumi ndi ghaŵi ghaku Yisraele
1Ili ndilo thumbiku lo Mosese munthu waku Chiuta wangutumbika ŵana ŵaku Yisraele wenga wandafwe. 2Wanguti,
“Ambuya angutuwa ku Sinai,
ndipo anguvumbukwa kwaku ifwe kutuwa Seiri,
anguwana kutuwa ku phiri Parani.
Angutuwa ku vikwi chumi (10,000) vya wakupaturika
ndi ŵanguto moto wakulipuka ku janja lawo la marghe.
3Inya, anguŵanja ŵanthu ŵawo,
wose wo ŵangupaturiskikiya kwaku iwo ŵenga mu janja lawo,
viyo ŵangundondoroska mu marundi ghinu,
ŵakuronde kurongozga kwinu,
4penipo Mosese wangutilanguliya dangu ili
nge nchihara cha umba waku Yakobe.
5Mwa viyo Ambuya anguŵa karonga mu Jeshuruni,
penipo ŵachirongozgi ŵa ŵanguwungana,
makhamu ghose ghaku Yisraele pamoza.
6“Iku Rubene waje wamoyo, kufwa cha,
ndi kuti ŵanthu ŵake ŵaŵe ŵamana cha.”
7Ndipo ichi ndicho wangukamba chaku Yuda,
“Avwani Ambuya mazu ghaku Yuda,
ndipo mumserezge mu ŵanthu ŵake.
Ndi janja linu mumulimbalimbiye,
ndipo mumovye wachimikana ndi ŵarwani ŵake.”
8Ndipo ghaku Levi wanguti,
“Mupaskeni Levi Tumimi winu,
ndi Urimi#33.8 Tumimi winu, ndi Urimi: izi ndi mphenduzga zakupaturika. winu mupaske ku mutuŵa winu,
yo mungumwesa pa Masa,
mungulimbalimba ndi iyo pa maji gha Meriba,
9mweniyo wangukamba gha awiske ndi anyina,
‘Ndituŵagomezga cha.’
Wangukwamphuwa vya ŵana ŵanyake ndi wanguŵaruwa ŵana ŵake,
pakuti iwo ŵanguphwere mazu ghinu,
ndi ŵangusunga phanganu linu.
10Ŵakarunguchizganga Yakobe vyeruzgu vinu
ndi Yisraele dangu linu,
wakaperekanga vya chema paurongo pinu
ndi sembe yose yakocha pa jochero linu.
11Ambuya tumbikani uromba wake
ndipo muronde nchitu ya manja ghake.
Swani viunu vya ŵarwani ŵake,
viunu vyaku wo ŵatumutinkha, alinga kuti ŵareke kuyuka so.”
12Gha paku Benjamini wanguti,
“Nkhwanjiwa wa Ambuya,
waja mu chimangu pamoza nayo.
Watumuzunguliya zuŵa lose
ndipo wamujariska pakati pa maphewa ghake.”
13Ndipo ghaku Yosefe wanguti,
“Ambuya atumbike charu chake
ndi vyawezi vyakusankhika vya kuchanya,
ndi vya ndimba vyo vikula pasi,
14vipasi vyakusankhika vya lumwi,
ndi vipasi vyakuzara vya myezi,
15vipasi vyamampha vya mapiri gha mwaka,
ndi uzari wa mitunthu ya muyaya,
16ndi vyawezi vyakuruska vya charu chapasi ndi uzari wake,
ndi mwaŵi wakuyo wajanga mu thundu.
Mphanyi ivi vyose vyaza pa mutu waku Yosefe,
ndi pa mphumphu yaku mutu waku yo ndi fumu mu ŵana ŵanyake.
17Nkhuzi yake ya umwali yendi uchiyembwe.
Masengwe ghake ndi masengwe gha njati,
ndi ghenagha wakafwenkhuliyanga ŵanthu wose,
kwachifika ku vigoti vya charu chapasi.
Viyo ndimo ŵalili vikwi chumi (10,000) ŵaku Efraimu,
ndimo so ŵalili vikwi chumi (10,000) ŵaku Manase.”
18Ndipo ghaku Zebuluni wanguti,
“Kondwa Zebuluni, uchiruta, kondwa Isakara mu mahema ghako.
19Wakadaniyanga ŵanthu ku Phiri lawo,
penipo ŵapereka sembe zakwenere,
pakuti ŵatonkha usambasi wa zinyanja
ndi mbiku zakubisika zamu muchenga.”
20Ndipo ghaku Gadi wanguti,
“Watumbikike yo wakuzga Gadi.
Gadi wala pasi uli ndi nkharamu,
waparuwa janja ndi mutu.
21Wangujisankhiya charu chamampha ukongwa,
pakuti mwenimuwa chigaŵa cha wakulamula chinguŵikika.
Wanguza ku ŵarongozgi ŵa ŵanthu,
pamoza ndi Yisraele wangufiska marangu
ndi malamulu ghakurunjika gha Ambuya.”
22Ndipo ghaku Dani wanguti,
“Dani ndi mwana wa nkharamu,
yo wachiripuka kutuwa ku Bashani.”
23Ndipo ghaku Naftali wanguti,
“Owe, Naftali wakukhorwa ndi mwaŵi,
ndi wakuguta thumbiku la Ambuya,
yiŵe yako nyanja ndi vinthu vya kumwera.”
24Ndipo ghaku Ashere wanguti,
“Ashere utumbikike pachanya pa
ŵana ŵanthurumi mphanyi wanjika ndi ŵana ŵanyako,
ndipo wabizgenge rundi lake mu mafuta.
25Vikhozgeru vyako vikaŵanga chisulo ndi mkuŵa,
ndipo uli ndi mazuŵa ghako, ndimo kukaŵiyanga kulimba kwako.
26“Palivi nanga njumoza yo we uli ndi Chiuta, Jeshuruni we,
mweniyo wasika mu machanya kuzachovya iwe,
ndi mu uchiyembwe wake waziya mumdengwendi.
27Chiuta wa muyaya ndiyo malo ghako ghakujamo,
ndipo kusi kwe manja ghake gha muyaya.
Ndipo wadikiska ŵakupindikana ŵinu paurongo pinu,
ndipo watiti, ‘Parghang'a’.
28Viyo Yisraele wanguja mu chimangu,
chisima chaku Yakobe yija,
mu charu cha chakurgha ndi vinyo,
inya, machanya ghake ghanthona dungwi.
29Wakukondwa ndiwe Yisraele we! Ndiyani yo wenge ndiwe?
Mwa ŵanthu ŵakutaskika ndi Ambuya.
Iwo ndi nguru ya chovyo chinu,
ndi lupanga la upundi winu!
Ŵamawongo ŵinu ŵakazanga kunyengere imwe;
ndipo mukaphwatanga pa malo ghawo ghakusopiyapo.”
Currently Selected:
Marangu 33: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
