Marangu 26

Mpasku wa vipasi vyakwamba

1“Muchisere mu charu cho Ambuya Chiuta winu watukupaskani kuŵa chihara, ndipo po mwachito ndi kuja mwenimo, 2mwamutopo vipasi vinyake vyose vyakudanga vya dongu lo, vyo mukavunanga. Mukaviŵikanga mu sokora, ndipo mukarutanga ku malo gho Ambuya Chiuta winu wakasankhanga, kuti zina lake liŵenge penipa. 3Ndipo mukarutanga ku mzukuru yo wateŵeta pa nyengo yo. Mwamunena kwaku iyo, ‘Ndizomera msana wale ku Ambuya Chiuta wako kuti ndaza mu charu cho Ambuya angurapiya auskemwe kutipaska ifwe.’ 4Sono mzukuru wakatonga sokora yo ku janja linu, ndi kuyiŵika pasi paurongo pa jochero la Ambuya Chiuta winu.

5“Ndipo mukamukanga paurongo pa Ambuya Chiuta winu, kuti, ‘MuAramu wakuyingayinga ŵenga ada; ndipo iyo wangusikiya ku Egipiti ndi wangugonera mwenimuwa, ndi mbumba yake yimanavi; ndipo muwa wanguguwa kuŵa mtundu ukuru, wakurimba, ndi wakwandana. 6Ndipo ŵaEgipiti ŵangutichitiya nkhaza. Ŵangutisuzga, ndipo ŵangutinyekezga uŵanda uzitu. 7Sono tinguliriya ku Ambuya Chiuta wa auskefwe, ndipo Ambuya anguvwa mazu ghinu, ndi anguwona kusuzgika kwidu ndi kutakataka kwidu, ndi yuzgu lidu. 8Sono Ambuya angutituzga mu Egipiti ndi janja lakutambaruka, ndi chofyu chikuru, ndi visimikizgu, ndi vyakuziziswa. 9Ŵangutitole mu malo yagha ndi ŵangutipaska charu ichi, charu chakutaŵala mkaka ndi uchi. 10Ndipo ehe, sono ndituza ndi vipasi vyakudanga vya mu munda wo imwe Ambuya mwandipaska.’ Ndipo mukaviŵikanga pasi paurongo pa Ambuya Chiuta winu; 11ndipo mukakondwerenga mu vyamampha vyose vyo Ambuya Chiuta winu wapereka kwaku imwe ndi ku nyumba yinu, imwe, ndi mlendo yo we mukati mwinu.

12“Penipo mutakuti mwamara kulipa vya chichumi vinu vyose vyakusakata kwinu, mu chirimika cha chitatu cho nchirimika chakupereke vya chichumi, kuvipaska ku muLevi, mlendo, wamasiya, ndi choko, kuti ŵarghe ndi ŵaguti, 13mutinge ku Ambuya Chiuta winu, ‘Ndatuzgamo chigaŵa chakupaturika mu nyumba yangu, ndipo ndachipaska ku muLevi, mlendo, wambura awiske, ndi choko, kwakulingana ndi langulu lino lose lo mwandilanguliya. Ndilivi kuswapo nanga ndi moza la marangu ghinu, chingana nkhughaluwa nako cha. 14Ndilivi kurghapo chachichumi penipo ndatenjenga, pamwenga kutuzgako penipo ndenga wambura kuphotoka. Ndilivi kusaskako nanga nchimoza ku ŵakufwa. Ndavwiya mazu gha Ambuya Chiuta wangu kuchita vyose vyo mwandilanguliya. 15Lereskani pasi kuturiya ko muja kwakupaturika, kuturiya kuchanya, ndi tumbikani ŵanthu ŵinu ŵaYisraele ndi munda wo mwatipaska, uli ndimo mungulumbiriya ku auskefwe, charu chakutaŵala mkaka ndi uchi.’

16“Msana wale Ambuya Chiuta winu watikulanguliyani kuchita malangulu yagha ndi vyeruzgu, viyo mukaŵanga ŵakuphwere ukongwa kuvichita ndi mtima winu wose ndi mzimu winu wose. 17Mwataula msana wale gha pa Ambuya, kuti ndiwo Chiuta winu, ndi kuti mukendanga mu nthowa zake zose, ndi kusunga malangulu ghake ndi marangu ghake ndi vyeruzgu vyake, ndi mukavwiyanga mazu ghake. 18Ndipo Ambuya ataula msana wale gha paku imwe kuti ndimwe ŵanthu ŵapa mtima wawo, uli ndimo akupanganirana namwe, ndi kuti mukasunganga marangu ghawo ghose, 19kuti mu kurumba ndi mu mbiri ndi ulemu ŵakamukwezgiyaninga pachanya kuruska mitundu yose yo ŵakulenga, ndi kuti mukaŵanga ŵanthu ŵakupaturikiya Ambuya Chiuta winu, uli ndimo ŵakukambiya.”

Currently Selected:

Marangu 26: TongaMw

Highlight

Copy

Compare