Marangu 2

Virimika vyamu mapopa

1“Ndipo tingusoka kuto ulendo widu kusere mu bozwa kurazga ku Nyanja Yiyera, nge ndimo Ambuya angukambiya nane; ndipo tinguzunguriya phiri Seiri mazuŵa ghanandi. 2Ndipo Ambuya angukamba nane anguti, 3‘Mwazunguriya charu cha mapiri ichi nyengo yitali yakufikapo, ng'anamukiyani ku nkhonde. 4Uŵanene ŵanthu kuti, Murute makaporote mu charu cha ŵabali ŵinu, ŵana ŵake Esau, wo ŵaja mu Seiri, ndipo ŵamukopa imwe. Viyo muchenje, 5mungachiyambananga nawo cha, pakuti ndimupaskeningiko charu chawo cha, chingana nkhamanavi chakuti phazi likandepo. Chifukwa ndapaska Esau phiri la Seiri liŵenge lake ndi lake. 6Mugulani nawo chakurgha ndi ndrama kuti murghe, ndipo so mugulani nawo maji ndi ndrama kuti mumwe. 7Pakuti Ambuya Chiuta winu wamutumbikani mu milimu yose ya manja ghinu. Waziŵa kwenda kwinu mu mabozwa yagha ghakuru; virimika ivi machumi ghanayi (40) Ambuya Chiuta wenga namwe, mulive kusauka.’ 8Viyo tingwenda ndi tingujumpha ŵabali ŵidu, ŵana ŵaku Esau, wo ŵajanga mu Seiri mu nthowa ya mu chidika, kuturiya ku Elata ndi Ezioniebere.

9“Ndipo tingusoka ndi kwenda nthowa ya bozwa la Moabu. Penipo Ambuya anguti kwaku ine, ‘Mungaŵasuzganga ŵaMoabu, pamwenga kurwa nawo nkhondo, pakuti ndimupaskaningiko charu chawo cha kuti chiŵe chinu, chifukwa Ara ndapaska ŵana ŵaku Loti, chiŵenge chawo.’ 10(Ŵina Eme ŵajanga muwa nyengo yaruta, ŵanthu ŵakuru ŵanandi, ndi ŵatali nge mbena Anakimu, 11mitundu yose yo yingudanika ŵaRefa, kweni ŵaMoabu ŵanguŵadana ŵina Erne. 12ŴaHoro nawo kale ŵajanga mu Seiri, kweni ŵana ŵaku Esau ŵanguŵatuzgamo ndi kuŵamara ndipo iwo ŵanguja mwenimuwa mo Yisraele nayo wanguchitiya ku charu cho Chiuta wanguŵapaska.) 13‘Sokani sono, lowokani msinju Zerede.’ Sono tingulowoka msinji uwu. 14Kutuwa Kadeshe-barnea kufika ku msinji wa Zerede, tingwenda virimika machumi ghatatu pachanya vinkhonde ndi vitatu (38) mpaka mwandano wose wa ŵanthurumi ŵankhondo ungumara mu ugoŵi nge ndimo Ambuya angurapiya. 15Pakuti nadi janja la Ambuya lingumikana mawo kuŵaparghang'a mu ugoŵi mpaka ŵangumara.

16“Penipo ŵanthurumi wose ŵankhondo ŵangumara kufwa mukati mu ŵanthu, 17Ambuya anguti kwaku ine, 18‘Msana uno mwamujumpha mphaka ya Moabu pa Ara. 19Ndipo penipo mwafika pafupi ndi ŵaAmoni#2.19 ŵaAmoni: ŵalembi ŵanyake ŵatiti ŵaAmori. rekani kuŵasuzga pamwenga kwambana nawo, pakuti ndikupaskeningiko cha charu cha ŵina Amoni kuŵa chinu, chifukwa ndachipereka ku ŵana ŵaku Loti kuŵa chawo ndi chawo.’ 20(Chenicho so chidanika nge ncharu cha ŵina Refa. Ŵina Refa ŵangujamo kale, kweni ŵina Amoni ŵatuŵadana kuti ŵina Zamazumu. 21Ndiwo ŵanthu ŵakuru, ŵanandi ŵatali nge mbena Anakimu, kweni Ambuya anguŵaparghang'a ndipo ŵaAmoni ŵanguŵaŵeta ndi kuja mwenimo mu malo ghawo. 22Nge ndimo Ambuya anguchitiya ndi ŵana ŵaku Esau wo ŵaja mu Seiri pakuparghang'a ŵaHoro ndipo ŵanguronda charu chawo ndi kuzengamo mpaka le. 23ŴaAvimi nawo ŵajanja mu mizi mpaka ku Gaza, kweni ŵanthu ŵakutuwa ku Kafatori wo ŵanguŵaparghang'a ndi kuzenga mu malo ghawo.) 24‘Sokani ulendo winu, mujamphe chidika cha Arnoni, mu manja ghako ndapereka Sihoni muAmori, fumu yaku Heshiboni ndi charu chake. Yambani kuchihara chiŵenge chinu ndi kurwa nkhondo. 25Zuŵa lino ndiyambenge kutenthemeska ŵanthu wose mu charu wo we pasi pa mtambo kuti ŵawopenge. Weniwo ŵavwenge mbili yino, ŵatenthemenge ndi kuvwa urwirwi chifukwa chaku imwe.’

ŴaYisraele ŵapunda Sihoni

(Maŵerengedu 21.21-30)

26“Viyo ndingutuma mathenga ndi mazu gha chimangu, kuturiya mu mabozwa ghaku Kedemoti, kwaku Sihoni fumu yaku Heshiboni, kuti, 27‘Ndizomerezge ndiporote mu charu chako, ndendenge munthowa pe, kuti nding'anamukiyenge ku marghe, pamwenga ku maze cha. 28Undiguriske ndi ndrama vyakurgha kuti ndirghe ndi undiguriske maji ndimwe. Ndendenge pasi pe, 29nge mbana ŵaku Esau wo ŵaja mu Seiri ndi ŵaMoabu wo ŵaja mu Ara, mpaka ndilowoke kusere charu cho Ambuya Chiuta widu watipaska.’ 30Kweni Sihoni fumu yaku Heshiboni yinguzomera cha kuti tikiye kwake, pakuti Ambuya Chiuta widu wangunonopeska mtima wake mwakuti wamupereke mu janja linu, nge ndimo kulili zuŵa lino. 31Ndipo Chiuta wanguti kwaku ine, ‘Nadi, ndamba kupereka Sihoni ndi charu chake, kwaku iwe. Yamba kuchironda chiŵenge chako, kuti uchihare charu chake.’ 32Viyo Sihoni wangutuwa kumikana nafwe, iyo ndi ŵanthu ŵake wose, kurwa nkhondo pa Yahaza. 33Ndipo Ambuya Chiuta widu wangumupereka kwaku ifwe, ndipo tingumukoso pamoza ndi ŵana ŵake ŵanthurumi ndi ŵanthu ŵake wose. 34Tinguto mizi yake yose yiya, ndi tinguparghang'a ŵanthurumi, ŵanthukazi ndi ŵana mu mizi yose: tengavi kusiyapo yumoza. 35Kweni ng'ombe pe ndi katundu yose wa mizi yose tinguto kuŵa vidu. 36Kuturiya ku Aroere mu mphepete mu chidika cha Arnoni ndi kutuwa ku muzi wo wenga mu chidika mpaka ku Gileada, pengavi msumba umoza wo ungutitonda, Ambuya Chiuta widu wangupereka yose kwaku ifwe. 37Ku charu cha ŵina Amoni pe ndiko mungureka kufikako, ndi ku malo ghose gha mumphepete mu msinji Yaboko ndi mizi yaku mapiri ndi kose kweneko Ambuya Chiuta widu wangutikanizga.

Currently Selected:

Marangu 2: TongaMw

Highlight

Copy

Compare