Marangu 1

Mosese wakonkhoske ŵaYisraele za ulendo wamu bozwa

1Yagha ndi mazu gho Mosese wangukamba ndi Yisraele yose sirgha liya Yordane mu bozwa, mu chidika chakurazgana ndi Sufu pakati pa Parana, Tofele, Labana, Hazaroto, ndi Dizahaba. 2Pe ulendo wa mazuŵa chumi ndi limoza kuturiya ku Horebe kukiya nthowa ya phiri Seiri kwachifika ku Kadeshe-barnea. 3Ndipo mu chirimika cha machumi ghanayi (40) pa zuŵa lakudanga la mwezi wa chumi ndi umoza, Mosese wangukamba ndi ŵaYisraele kwakulingana ndi vyose vyo Chiuta wangumulanguliya mu dangu kuŵanene. 4Wanguti wabaya Sihoni fumu ya ŵaAmori yo yajanga mu Heshiboni, ndi Ogi fumu yaku Bashani, yo yajanga mu Ashataroti mu Edreyi. 5Sirgha liya Yordane mu charu cha Moabu, Mosese wangwamba kutaula dangu ili, 6“Ambuya Chiuta widu wangukamba nafwe mu phiri la Horebe kuti, ‘Mwaja nyengo yitali mu phiri ili. 7Sokani, yendani ulendo winu ku mapiri gha ŵaAmori ndi ku malo ghose gha pafupi pake, mu chidika, mu chinkhwawu, ndi ku Negebu, mu mphepete mwa nyanja ku charu cha ŵaKanani, ku Lebanoni ndi ku msinji ukuru Efrate. 8Wonani ndaŵika charu pa maso pinu; sereni, janimo, chiŵe chinu charu cho Chiuta wangupangana ndi auskemwe Abrahamu, Yisaki, ndi Yakobe kuŵapaska iwo ndi mphapu yawo pavuli pawo.’

Mosese wasankha ŵeruzgi

(Chituwa 18.13-27)

9“Pa nyengo iya ndingukamba namwe kuti, ‘Ndilivi nthazi kumuphwereni ndija pe. 10Ambuya Chiuta winu wakwandaniskani ndipo le mwe ŵanandi nge ndi nyenyezi zakuchanya. 11Mphanyi Ambuya Chiuta wa auskemwe wakwandaniskani chikwi kwakuruska mo mulili, ndi wamutumbikani nge ndimo wangupanganirana namwe. 12Ine ndija kuti ndingaziŵa kupinga mawuzitu ghinu ndi mphingu zinu ndi kulimbana kwinu cha. 13Sankhani ŵanthurumi ŵazeru ndi ŵakuwamo ndi ŵakuziŵikwa mu mafuku ghinu, ndipo ndiŵaŵikenge kuŵa ŵeruzgi.’ 14Imwe mungwamuka kuti, ‘Nchamampha kuti tichiti cho mwakamba.’ 15Viyo ndinguto ŵaraŵara ŵa mafuku ghinu, ŵazeru ndi ŵanjezga kuŵa ŵarongozgi ŵinu ŵa vikwi, ndi ŵa machumi pe chumi ndi machumi ghankhonde ndi ŵa machumi ndi ŵarongozgi ŵara wose mu mafuku ghinu. 16Ndipo ndingulanguliya ŵeruzgi pa nyengo yiya kuti, ‘Vwani mirandu ya ŵabali ŵinu, ndi yeruzgani kwakurunjika pakati pa munthu ndi mbali wake pamwenga ndi mlendo yo we nayo. 17Mungalereskanga chisku cha munthu, muvwe mumana kwakulingana ndi mura. Mungopanga chisku cha munthu, chifukwa kweruzga nkhwaku Chiuta. Kweni asani mrandu ngunonono kwaku imwe, zani nawo kwangu, Ine ndazakuwuvwa.’ 18Pa nyengo yiya ndingukuneniyani vyose vyose vyo mutenere kuvichita.

Skoli zitumika ku Kadeshe-Barnea

(Maŵerengedu 13.1-33)

19“Ndipo tingusoka pa Horebe ndi kuporota mu mobozwa ghakuru ndi ghakofya ghenigha munguwona mu nthowa ya mapiri gha Amori, nge ndimo Ambuya Chiuta widu wangutilanguliya, ndipo tinguza ku Kadeshebarnea. 20Sono ine ndinguti, ‘Imwe mwaza ku mapiri gha ŵaAmori ghenigho Ambuya Chiuta widu watipaska ifwe. 21Wonani Ambuya Chiuta widu waŵika charu ichi pa maso pinu, kwerani mujemu chiŵe chinu, nge ndimo Ambuya Chiuta wa auskemwe wanene. Mungawopanga cha nanga nkhugongowa.’ 22Ndipo munguti, ‘Titume ŵanthurumi pa nthazi pidu ŵakatipachiriye charu ndi kutiwezge mazu, kutinene nthowa yo tikwerenge ndi mizi yo tamufikako,’ 23Ichi chingundikondweska, ndipo ndinguto ŵanthurumi chumi ndi ŵaŵi ŵaku imwe, yumoza mu fuku limoza. 24Ndipo ŵangusoka ndi kukwera mapiri, ŵanguza ku dambo la Eshekolo ndipo ŵangulipachiya. 25Viyo ŵanguto ku vipasi vya charu cho mu manja ghawo. Ŵangusikiya navyo kwaku ifwe, ŵangutiziya ndi mazu, ŵanguti, ‘Charu nchamampha, chenicho Ambuya Chiuta widu watipaska.’

26“Ndipuuli mungukana kukweliyako, kweni mungugarukiya dangu la Ambuya Chiuta winu. 27Mungudinginika mu mahema ghinu, munguti, ‘Chifukwe Ambuya angutitinkha, angutituzga mu charu cha Egipiti kutipereka mu manja gha ŵaAmori kutiparghang'a. 28Tikwere nunkhu? Ŵabali ŵidu ŵagongoweska mitima yidu kuti, “Ŵanthu mbakuru ndi mbatali kwakuruska ifwe; mizi nayo njikuru ndipo ye ndi malinga ghakugota kuchanya, ndipo so tawonako ŵana ŵa Anakimu kwenikuwa.” ’ 29Viyo ine ndinguti kwaku imwe, ‘Rekani kuwa nkhumbi, pamwenga kuwopa. 30Ambuya Chiuta winu wakudanjiriyani ndiyo wamukukurwiyani, kwakulingana ndi vyose vyo wangumuchitiyani mu Egipiti pa maso pinu. 31Ndi mu mabozwa munguwona mo Ambuya Chiuta winu wangumuphwereliyani nge ndimo munthu waphwerere mwana wake, mu nthowa yose yo mungwenda mpaka mwazifika mu malo ghano.’ 32Ndipo nanga mazughenga viyo, kuti munguvwana ndi Ambuya Chiuta winu cha, 33yo wakudanjiliyaninga wakumupenjiyani malo ghakujinthapo mahema ghinu. Wanguruta mu usiku ndi moto, ndi msana ndi bingu kukulongoni nthowa yo mutenere kwendamo.

Ambuya apaniska ŵaYisraele

(Maŵerengedu 14.20-45)

34“Ambuya anguvwa mazu ghinu angukalipa kuti, 35‘Nadi palivi yumoza wa ŵanthurumi yaŵa ŵa mgonezi uwu uheni ŵamuwona charu chamampha, cho ndingupangana kupereka kwa auskemwe. 36Kweni Kalebe mwana waku Yefune wachiwonenge; ndipo ndimupaskenge charu cho wakandapo iyo ndi ŵana ŵake, chifukwa walondo Ambuya kwakufikapo!’ 37Ambuya nane angundikalipiya chifukwa chinu kuti, ‘Iwe nawe so kuti wamuseremo cha muwa. 38Kweni Yoswa mwana waku Nuni, mweniyo watuma pa maso pako wamuselemo, Umukhwimiske pakuti ndiyo wamuhariska charu cho ŵaYisraele. 39Ndipo so ŵana ŵinu wo mungukamba kuti ŵakaskoŵekanga ŵana ŵinu ŵeniwo chingana ndi zuŵa ili kuti ŵaziŵa cha umampha ndi uheni, ndiwo ŵamusere muwa. Ndichiperekenge kwaku iwo, ndipo ŵachiharenge, chiŵenge chawo. 40Kweni imwe sokani, toni ulendo winu, mulazge ku mabozwa ku chiri ku Nyanja Yiyera.’

41“Penipo imwe mungwamuka, munguti kwaku ine, ‘Taŵanangiya Ambuya, tikwerenge ndi kurwa nkhondo kwakulingana ndi vyose vyo Ambuya Chiuta widu watinene.’ Ndipo munguti mwavwalira, munthu yose vidya vyake, mwatinge nkhufupi kukwera mapiri. 42Ndipo Ambuya anguti kwaku ine, ‘Unene kwaku iwo, Lekani kukwera pamwenga kurwa nkhondo, chifukwa Ine kuti nde mukati mwinu cha; vinu mungabayika pa maso gha ŵarwani ŵinu.’ 43Viyo ndingukamba namwe kweni kuti mungundivwiya cha. Mungugarukiya dangu la Ambuya ndipo mungukwera ndi chitatata chinu mu mapiri. 44Sono ŵaAmori wo ŵajanga mu mapiri ŵangutuwa kumikana namwe, ŵangumudikiskani nge ndi njuchi ndi kumumbininiskiyani mu Seiri kwazifika ndiku Horoma. 45Ndipo munguweko ndikuliya pa maso gha Ambuya, kweni kuti anguvwa mazu ghinu cha, chingana nkhutegherezgako kwaku imwe. 46Viyo munguja mu Kaseshe mazuŵa ghanandi, mazuŵa gha mungutandara muwa.

Currently Selected:

Marangu 1: TongaMw

Highlight

Copy

Compare