Marangu 16

Karghidu ka Phaska la masabata ndi la misasa

(Chituwa 23.14-17; 34.18-24)

1“Kumbukani cho mutenere kuchita mu mwezi wa Abibi,#16.1 Abibi: ndi nyengo yo ye pakati pa mwezi wa Marichi ndi Aprayelo. ndipo rghani dghera la phaska nge ndimo Ambuya akumulanguliyani. Pakuti mu mwezi wa Abibi Ambuya Chiuta winu wangumutuzgani ndi usiku mu Egipiti. 2Mukabayiyanga Ambuya Chiuta winu sembe ya mberere pamwenga ya ng'ombe pa malo ghenigho Ambuya akasankhanga ndi kudanapo zina lawo. 3Mungarghanga ndi chiŵande cha mtupu cha; mu mazuŵa ghankhonde ndi ghaŵi mukarghanga ndi chiŵande chambura mtupu, chiŵande chapa nyengo ya suzgu, chifukwa mungutuwa mu charu cha Egipiti mu ruŵi. Mwakuti mu mazuŵa ghose gha umoyo winu, mukumbuke zuŵa lo mungutuwiya mu charu cha Egipiti. 4Mureke kusanirika ndi mtupu mu mazuŵa ghankhonde ndi ghaŵi mu charu chinu chose, nanga nkhuti nyama yo mwabayiya sembe ndi mazulo gha zuŵa lakudanga, yijeko usiku wose mpaka mlenji. 5Mungabayiyanga sembe ya phaska mukati mu mizi yinu yeniyo Ambuya Chiuta winu watumupaskani; 6kweni pa malo gho Ambuya Chiuta winu wakasankhanga ndi kudanapo zina lake, penipo ndipo mukabayiyanga sembe ya phaska. Mukachitanga ichi ku mazulo pakusere kwa dazi, pa nyengo yo munguturiya mu Egipiti. 7Mukayibikanga ndi kuyirgha pa malo gho Ambuya Chiuta winu wakasankhanga ndipo ndi mlenje mukaweriyanga ku mizi yinu. 8Mu mazuŵa ghankhonde ndi limoza mukarghanga chiŵande chambura mtupu ndipo pa zuŵa la chinkhonde ndi chiŵi kukaŵanga ungano wakupaturika wa Ambuya Chiuta winu; mungachitanga mlimu cha mwaku lo.

9“Mukaŵerenganga ŵasabata ŵankhonde ndi ŵaŵi, yambani kuŵerenga ŵasabata ŵankhonde ndi ŵaŵi kutuwa pa nyengo yo mutambiya kuvuna ndi chisenga mbeu yakukoma. 10Viyo mukarghanga dghera la ŵasabata nge ndimo Ambuya Chiuta winu wangumulanguliyani. Penipo zani ndi munthulu kupaska ku Ambuya Chiuta winu. Mukaperekanga kwakuyana nge ndimo Ambuya Chiuta winu wakusakatiskiyani. 11Viyo mukakondwanga paurongo pa Ambuya Chiuta winu, imwe ndi mwana winu munthurumi ndi mwana winu munthukazi, muLevi yo wemu mizi yinu, mlendo wambura awiske, choko cho che mukati mwinu, pa malo gho Ambuya Chiuta winu wakasankhanga, kuti mudanepo zina lake. 12Mukakumbukanga kuti mwenga ŵaŵanda mu Egipiti, ndipo mutenere kuphwere kusunga marangu yagha.

13“Murghe dghera la misasa kwa mazuŵa ghankhonde ndi ghaŵi, pa muyora mbeu zinu pa malo ghakupepete, ndi mu malo ghakukamiyamo vinyo. 14Mutenere kukondwa pakurgha dghera linu, imwe ndi mwana winu munthurumi ndi mwana winu munthukazi, wanchitu winu munthurumi, ndi wanchitu winu munthukazi, muLevi mlendo, wambura awiske, ndi choko wo ŵemu mizi yinu. 15Mu mazuŵa ghankhonde ndi ghaŵi mukarghanga dghera la Ambuya Chiuta winu pa malo gho Ambuya akasankhanga, pakuti Ambuya Chiuta winu wakamutumbikaninga mu vispasi vinu vyose ndi mu nchitu yose ya manja ghinu, mwakuti mose mukakondwiyanga pamoza.

16“Katatu mu chirimika ŵanthurumi ŵinu wose ŵakawonekanga paurongo pa Ambuya Chiuta winu pa malo gho ŵakasankhanga; pa dghera la chiŵande chambura mtupu, pa dghera la ŵasabata, ndi pa dghera la misasa. Wangawonekanga paurongo pa Ambuya ndi manja ghaŵaka cha; 17kweni munthu yose wakaperekanga uli ndimo wangaŵiya navyo, kwakuyana ndi usakati wo Ambuya Chiuta winu wakupaskani.

18“Muŵike ŵeruzgi, ndi ŵarongozgi mu misumba yinu yose yo Ambuya Chiuta winu wakupaskani, kwakuyana ndi mafuku ghinu, iwo ŵakayeruzganga ŵanthu ndi cheruzgu chakurunjika. 19Mungayeruzganga uheni cha. Mungawonanga chisku cha munthu cha; ndipo mungarondenga vinda, chifukwa vinda yijalamaso gha ŵazeru ndipo yinanga ŵarunji. 20Mukalondonga urunji pe ndiwo, mwakuti muŵe ŵamoyo ndi mukahare charu cho Ambuya Chiuta winu watukupaskani.

21“Mungapandanga muti we wose cha kuŵa lisuwa kuŵandikana ndi jochero la Ambuya Chiuta winu lo mukachitanga. 22Ndipo mungamikanga mzati wo Ambuya Chiuta winu watinkha.

Currently Selected:

Marangu 16: TongaMw

Highlight

Copy

Compare