Marangu 10

Vipapati vyachiŵi vya mya ya marangu

(Chituwa 34.1-10)

1“Pa nyengo yiya Ambuya anguti kwaku ine, ‘Sema mya yiŵi ya vipapate, nge vyakudanga, ndipo ukwere kwaku ine mu phiri ndi upange bokosi la muti. 2Ndipo ndirembenge pa mya ya vipapate mazu gho ghenga pa mya yakudanga yo unguswa, ndipo uyoŵikenge mu bokosi?’ 3Viyo ndingupanga bokosi la muti wa mtangatanga, ndipo ndingusema mya yiŵi ya vipapate vyakuyana ndi vyakudanga, ndipo ndingukwera mu phiri ndi mya yiŵi mu janja langu. 4Ambuya angulemba pa mya, marembu ghakuyana ndi ghakudanga, marangu chumi ghenigho Ambuya angulangula kwaku imwe mu phiri kutuwiya mukati mu moto, mu zuŵa la ungano, Ambuya angundipaska ghenigho. 5Ndipo ndingung'anamuka ndi kusika mu phiri ndi kuŵika mya ya vipapate yo ndingupanga mu bokosi, ndipo ye mwenimo kwakuyana nge ndimo Ambuya angundilanguliya.”

6(ŴaYisraele ŵangwenda ulendo wawo kutuliya pa Beroto Benejakana kufika pa Mosera. Penipo Aroni wangufwa ndi wanguŵikika penipa, ndipo mwana wake Eleazara wanguchita mlimu wa uzukuru mu malo ghake. 7Kutuliya penipo ŵangwenda ulendo kufika ku Godegoda, ndi ŵangutuma pa Gudegoda ŵangufika pa Yotobata charu cha misinji ya maji. 8Pa nyengo yiya Ambuya angupatuwa fuku laku Levi kupinga bokosi la phanganu la Ambuya kuma pa nthazi pa Ambuya kumuteŵete, ndi kutumbika zina lake mpaka zuŵa lino. 9Chifukwa ichi MuLevi walivi chigaŵa chingana nchihara pamoza ndi ŵabali ŵake. Ambuya ndiwo chihara chake, kwakulingana ndimo Ambuya Chiuta winu wangumunene.)

10“Ndinguja mu phiri kwakulingana ndi nyengo yakudanga, mazuŵa machumi ghanayi (40) ndi mausiku machumi ghanayi (40) ndipo Ambuya angundivwa pa nyengo yiya napo viyo. Ambuya kuti akhumbanga kumupasuwani cha. 11Ndipo Ambuya anguti kwaku ine, ‘Soka rutanga pa lwendo laku paurongo pa ŵanthu kuti ukasere mu charu cho ndingurapiya auskemwe kuŵapaska.’

Ŵawerezgapo kuŵakonkhoske kuti ŵamwanji ndi ŵamuvwiyenge Chiuta

12“Ndipo sono ŵaYisraele mwe, cho Ambuya Chiuta winu wakhumba kwaku imwe nkhopa Ambuya Chiuta winu kwenda mu nthowa zake zose, kumwanja, kuteŵete Ambuya Chiuta winu ndi mtima winu wose, ndi umoyo winu wose, 13ndi kusunga marangu ndi visambizgu vya Ambuya, vyo ndimulanguliyani zuŵa lino, kuti kumuŵiyeni umampha. 14Nadi machanya gha kuchanya, charu chapasi ndi vyose vyo vye mwenimo ndi vyo vya Ambuya Chiuta winu. 15Ndipuuli, Ambuya angukondwa ndi kuŵanja auskemwe ndipo Ambuya angusankha mphapu yawo ya pavuli pawo, imwe muruska ŵanthu ŵanyake wose, mpaka zuŵa lino. 16Viyo dumuwani khungu laku mitima yinu, ndipo so mureke kuŵa so ŵanonono mu mitima. 17Pakuti Ambuya Chiuta winu ndi Chiuta wakuruska ndi Ambuya mweneko waku vyose, mukuru, wanthazi, ndi Chiuta wakofya. Kuti walereska chisku cha munthu cha pamwenga kuronda vinda. 18Wafiska umampha cheruzgu cha wambura wiske ndi choko. Watanja mlendo wamupaska kurgha ndi vyakuvwala. 19Viyo mwanje mlendo, pakuti imwe namwe mwenga ŵalendo mu Egipiti 20Mopenge Ambuya Chiuta winu, mukamuteŵetiyanga ndi kumusiya cha, ndi kurapa pa zina lake. 21Ndiyo unkhankhu winu, ndiyo Chiuta winu, mweniyo wamuchitiyani vinthu vikuru ndi vyakofya, vyo maso ghinu ghawona. 22Auskemwe auguzikiya ku Egipiti, ŵanthu machumi ghankhonde ndi ghaŵi (70), ndipo sono Ambuya chiuta winu wakwandaniskani nge ndi nyenyezi za kuchanya.

Currently Selected:

Marangu 10: TongaMw

Highlight

Copy

Compare