ŴaKolose 3

1Viyo asani mwayuskika pamoza ndi Kristu, lembeni vya kuchanya, kweniko kwe Kristu, wakujariya ku janja lamarghe laku Chiuta. 2Ghanaghaniyani vya kuchanya, vyapanupasi cha. 3Chifukwa mungufwa, ndipo umoyo winu wabisikiya pamoza ndi Kristu mwaku Chiuta. 4Penipo Kristu, yo mbumoyo widu, wamuwoneka, penipo ndipo imwe namwe mwamuwoneka pamoza nayo mu unkhankhu.

Umoyo wakali ndi ufya

5Viyo fwiskani viŵaru vinu vya panupasi; ureŵi, wiyu, ulakalaka, likhumbira liheni, ndi bina, lenilo nkhusopa ngoza; 6chifukwa chaku vyenivyo katuza kandundu kaku Chiuta pa ŵana ŵa mtafu, 7mwaku vyenivyo imwe namwe mwendangamo kali, pakuŵa ndi umoyo wa mwaku vyo. 8Kweni sono, vipateni ivi vyose; kandundu chikwiya, mwendanato ndi utokose wakutuwa mu mlomo winu. 9Mungateterananga cha; pakuti mwazuwa munthu wakali pamoza ndi machitidu ghake, 10ndipo mwavwara munthu mufya, mweniyo wazgoka mufya uli nchikozgu chaku yo wangumlenga ndi kukuliya mu kumuziŵa Chiuta. 11Kweniko kuti kukaŵanga muGriki ndi muYuda cha, muchinju ndi wakuura-muchinju, muheriheri, muSkutia, muŵanda, mwanangwa: kweni Kristu ndiyo ndi vyose mwaku vyose.

12Viyo vwarani, uli mbakusankhika ŵaku Chiuta, ŵakupaturika ndiŵakwanjiwa, chitima cha lisungu, ulemu, kujiyuyuwa, upovu, chilekerezga; 13muŵe ŵakukunthiriyana ndi ŵakurekiyana, yumoza ndi munyake; asani munthu wangaŵa ndi kafukwa pa munyake uli ndimo Ambuya agowoke imwe, namwe so muchite viyo. 14Ndipo pachanya paku vyose ivi vwarani chanju, chenicho chimanga pamoza vyose mu wanasi wakufikapo. 15Ndipo chimangu chaku Kristu chiuse mu mitima yinu, kwaku chenicho so mungudanikiya mu liŵavu limoza; ndipo muŵe ŵakuwonga. 16Mazu ghaku Kristu ghaje mwinu kwakusambasa, pa kusambizgana ndi kuchinyirana mu zeru yose, ndi penipo mutumba mu buku la sumu ndi mu sumu ndi sumu zamzimu, kumuwonga Chiuta mu mitima yinu. 17Ndipo chose cho mungachita, mu mazu pamwenga mu nchitu, chitiyani vyose mu zina la Mbuya Yesu, ndipo muwongeni Chiuta Dada mwaku iyo.

Ubali wakufikapo mu umoyo ufya

18Mwa ŵawoli mujithereske ku ŵarumi ŵinu, pakuti ichi nchakwenere mu Mbuya. 19Mwa ŵanthurumi, mwanjenge ŵawoli ŵinu, ndipo mungaŵakaripiyanga cha. 20Mwaŵana vwiyani ŵapapi ŵinu mwaku vyose, chifukwa ichi nchakukondweska Ambuya. 21Mwaŵauskeu, mungachenyanga ŵana ŵinu cha, vinu ŵangagongowa mtima. 22Mwaŵaŵanda, mwaku vyose vwiyani ambuyamwe ŵamu charu; mu kutakataka kwapa maso pe nge mbabukondweska ŵanthu cha kweni mu wanangwa wamtima, pakumopa Mbuya. 23Chose cho mungachita, chitani nge mbakutakatakiya Ambuya ŵanthu cha, 24pakuziŵa kuti ku Mbuya mwamuronde mphoto yinu ya chihara cho: muteŵete Ambuya Kristu. 25Chifukwa wakwananga wamuronde so kwananga kwake: ndipo kuti kwe kurumba chisku cha.

Currently Selected:

ŴaKolose 3: TongaMw

Highlight

Copy

Compare