Amosi 4
4
Chiuta warutiriya kuchenjezga ŵanthu
1“Vwani mazu yagha, imwe mwa ng'ombe zinthukazi za Bashani,
zo zemu phiri la Samaria, zo zikandirizga ŵakavu,
ndi kupweteka ŵaranda, zo sititi ku ŵarumi ŵawo,
‘Zani nacho, timwe!’
2Ambuya Chiuta warapa ndi utuŵa wake
kuti, wonani, mazuŵa ghatuza,
mwaku gho wamutuzgiyeningipo ndi chakukolowole,
ndipo ŵakumariya ŵaku imwe ŵakatuzgikangapo ndi mbeja.
3Ndipo mwamuturiya mu madangazi,
we yose paku lo lepafupi nayo;
ndipo mwamupong'eka ku Harmoni,”
atiti Ambuya.
4“Zani ku Betele, muzachilakwa;
ndipo ku Gilgala, mwandaniske maulakwi;
zani ndi sembe zinu, mlenji we wose,
ndi vigaŵa vya chichumi paziŵa le lose la chitatu;
5mupereke sembe zakocha zakuwonge za mtupu,
ndi mpaskuwa wanangwa, ndipo muwuwandiske;
chifukwa mutanja kuchita viyo,
mwa ŵanthu ŵaku Yisraele!”
atiti Ambuya.
6“Ndikumpaskani kuphotoka kwaminyu mu misumba yinu yose,
ndi kusoŵa kwa chiŵande mu malo ghinu ghose,
ndipuuli, mulivi kuwere kwaku ine,”
atiti Ambuya.
7“Ndipo so ndakunorani vuwa,
po yingujako mwezi yitatu kufika ku vuna,
ndingutuma vuwa pa msumba umoza
ndipo ndengavi kutuma vuwa pa msumba unyake;
yingung'a pa munda umoza,
ndipo munda wo yingureka kung'apo ungufota;
8viyo misumba yiŵi pamwenga yitatu yinguja ku msumba umoza
kwachimwa maji, kweni kuti yingukhorwa cha;
ndipuuli kuti munguwere kwaku ine cha,”
atiti Ambuya.
9“Nkhakulanganinga ndi kachamba ndi kodi-kodi;
minda yinu ndi minda ya mphereska ndayisanduska masara;
miti yinu ya mkuyu ndi miti yinu ya maolivi yarghika yose ndi zombe;
ndipuuli kuti munguwere kwaku ine cha,”
atiti Ambuya.
10“Ndingutuma mukati mwinu chideru nge ndimo kunguŵiya ku Egipiti;
ndingubaya ŵanyamata ŵinu ndi lipanga;
ndinguto ŵakavalo ŵinu;
ndipo ndingupereka fungu liheni mu misasa yinu
kuti likwere mu mphunu zinu;
ndipuuli kuti munguwere kwaku ine cha,”
atiti Ambuya.
11“Ndinguwanganduwa ŵanyake ŵaku imwe
nge ndimo Chiuta wangubwanganduliya Sodomu ndi Gomora,
ndipo mwenga nge nchisindi chakubulika ku moto wakunyeka;
ndipuuli kuti munguwere kwaku ine cha,”
atiti Ambuya.
12“Chifukwa ichi ndimo ndichitiyenge nawe, Yisraele;
ndipo pakuti ndichitenge ichi kwaku iwe,
ujinozge kukumana ndi Chiuta wako, iwe Yisraele!”
13Chifukwa ehe, iyo wakuwumba mapiri, watata mphepo;
ndi kukamba ku munthu gho ndi maghano-ghano ghake;
yo wachita mlenji kuŵa mdima,
ndi kukanda pa utali wa charu chapasi
Ambuya Chiuta wa maŵanja, ndilo zina lake!
Currently Selected:
Amosi 4: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
