2 Timote 2

Ŵankhondo ŵamagomekezgeka ŵaku Yesu Kristu

1Viyo iwe, wamwana wangu, jikhomeske mu wezi wamwaku Kristu Yesu. 2Ndipo vyenivyo wavwa kwangu mu ŵakaboni ŵanandi, vyenivyo sambizganga ŵanthu ŵamagomekezgeke, wo ŵaŵenge ŵakwenere kwachisambizga ŵanyake nawo. 3Vwiyangapo vikomwa pamoza nane, nge ngwankhondo mweneke waku Kristu Yesu. 4Palive wankhondo yo wapota homwa wajiwizga mu milimu ya umoyo wuno, pakuti fundu yake, njakuti wakhorweske wakumlemba. 5Ndipo so asani munthu wajontho, kuti wavwalikika nkhazu cha, kwambura kuti wajonthole kwadangu. 6Mlimi wakutakataka yo watenere kusanganapo danga vipasi. 7Teskanga chenicho ndikamba; chifukwa Mbuya wakupaskenge kuwamo mwaku vyose. 8Kumbukanga Yesu Kristu, wakuyuskika ku ŵakufwa, wa mbeu yaku Davidi, uli ndi evangeli wangu; 9mwaku wo ndikomwe mpaka ku magoŵa uli ndi mchita uheni; kweni mazu ghaku Chiuta kuti ghamangika cha. 10Chifukwa chenichi ndikunthiyapo vyose pa chifwa cha ŵakusankhika, alinga kuti iwo nawo ŵafikapo pa utaski wa mwaku Kristu Yesu ndi unkhankhu muyaya. 11Ndamagomekezgekea nenedu lo:

Chifukwa asani tikufwiya pamoza nayo,

tijariyenge ŵamoyo so pamoza nayo,

12asani tikunthiyapo, tiusiyenge

pamoza nayo: asani timkanenge, iyo nayo wamkana ifwe:

13asani tiura kuvwana, wajaririya iyo wamagomekezgeka;

chifukwa kuti waziŵa cha kujikana mweneko.

Mteŵete wamagomekezgeka

14Ŵakumbuske vyenivi, pakuŵasimikizgiya pa maso gha Ambuya, kuti ŵareke kurwiyana ndi mazu, kwambura chanduku chose, kweni ku chipasuka cha ŵakuvwa. 15Pamphuka kujipereka wakurumbika kwaku Chiuta, wa mlimu wambura kukanyara, wakugaŵiya kwakurunjika mazu gha uneneska wo. 16Kweni ŵeka mauŵereŵesi ghamtonyoru ghaŵaka: chifukwa ghataruliyenge ukongwa ku uwura-uwopa Chiuta, 17ndi mazu ghawo ghajemuwenge uli nchipangu: ŵaku ŵeniwo ndi Humenayo ndi Filato: 18ŵeniwo ŵambwita pa uneneska wo, pakukamba kuti chiyuka chaŵapo kali ndi ŵagadabuwa chivwanu cha ŵanyake, 19kweni chiŵanja cho chakurama chaku Chiuta chituma gwa, pakuŵa ndi chiŵali chenichi, “Waŵaziŵa Mbuya ŵeniwo mbake”: ndi “Wagaukeko ku uwura-urunji yose wakutamula zina lo la Ambuya.” 20Kweni mu nyumba yikuru kuti mwe viyaŵi vya golide ndi vya siliva pe cha, kweni so vya chimuti ndi vya dongu; ndipo vinyake navyo ku ulemu, kweni vinyake ku uwura-ulemu. 21Viyo asani munthu wangajiphoto kwaku vyenivi, waŵenge chiyaŵi cha ku ulemu, chakupaturika, chakwanduliya, ku mweneko, chakurongosoleke nchitu yose yamampha. 22Kweni thaŵanga maulakalaka ghauhurwa, ndipo ndondoloska urunji, chivwanu, chanju, chimangu, pamoza ndi ŵeniwo ŵadaniya pa Mbuya ndi mtima ukovu. 23Kweni mafumbo ghakupusa ndi ghajira kananga, pakuziŵa kuti ghayuska mbembi. 24Kweni muŵanda wa Mbuya kuti watenere kurwa cha, kweni kuŵa mphemberezga kwaku wose, warwana kusambizga. 25Wakukunthiyapo, mu upovu wakuŵalanga wo mbakupindana, kuti vinu Chiuta wangaŵapaska chipe chakwachiziŵiska uneneska, 26ndi kuti ŵangajiwezgako ku chikwiriki cha diabole, pakukoleka mkoli ndi iyo ku khumbo laku yo.

Currently Selected:

2 Timote 2: TongaMw

Highlight

Copy

Compare