2 Samuele 4
4
Ishiboshete wabayika
1Wanguti wavwa Ishiboshete, mwana waku Sauli, kuti Abnere wakufwa pa Hebroni, nthazi yake yingumara, ndi ŵaYisraele wose ŵangutethema. 2Mwana waku Sauli wenga ndi ŵanthu ŵaŵi ŵarongozgi ŵa maŵanja gha ŵaskoŵi, zina la yumoza lenga Bana, la munyake lenga Rekaba, ŵana ŵaku Rimoni mwina Benjamini waku Beroto (pakuti Beroto wangupimikiya kwaku Benjamini; 3ŵaBeroto ŵanguthaŵiya ku Gitaimi, ndipo ŵaŵa ŵalendo kuwa mpaka zuŵa linu).
4Jonafani mwana waku Sauli, wenga ndi mwana yo wangupunduka marundi. Wenga wa umoyo wa virimika vinkhonde po makani ghaku Sauli ndi Jonafani ghanguza kutuliya ku Yezerele; mlezi wake wangumunyamuwa, wanguthaŵa nayo, ndipo pakuchimbiya kwakuthaŵiriya, wanguwa, ndipo wanguŵa wakupunduka, zina lake lenga Mefiboshete.
5Sono ŵana ŵaku Rimoni mwina Beroto, Rekaba ndi Bana, ŵanguruta, ndipo akhumba ndi msana pakati ŵangufika ku nyumba yaku Ishiboshete, po iyo wangugona kupumuwa ndi msana. 6Ndipo wonani, mulinda wa nyumba wapepetanga trigu, kweni wasiwanga ndi kugona turo; viyo Rekaba ndi mbali wake Bana ŵangusere chisisi. 7Ŵanguti ŵasere mu nyumba, iyo wagona pachita chake mu chipinda chakugona, ŵangumupuma, ndi ŵangumubaya, ndipo ŵangumudumuwa mutu, ŵanguti ŵato mutu wake, ŵangwenda usiku wose nthowa yaku Araba. 8Ndipo ŵanguza ndi mutu waku Ishiboshete kwaku Davidi pa Hebroni. Sono wangunena ndi karonga, “Ndi uwu mutu waku Ishiboshete, mwana waku Sauli, murwani winu, yo wapenjanga umoyo winu; Ambuya awezge nduzga mbuyangu karonga zuŵa linu paku Sauli ndi mphapu yake.” 9Kweni Davidi wanguti kwaku Rekaba ndi mbali wake Bana, ŵana ŵaku Rinoni mu Beroto, “Ndarapa Ambuya wamoyo, yo wawombo umoyo wangu mu visuzgu vinandi, 10po yumoza wakambanga nane kuti, ‘Awonani, Sauli wafwa’, kughanaghana kuti wangundipingiya makani ghamampha, ndingumuko ndi kumubaya pa Ziklaga, ndiyo yenga mphoto yo ndingumupaska pa makani ghake. 11Iku uli ukongwako, po ŵanthu ŵaheni ŵabaya munthu wakurunjika mu nyumba yake pa chita chake, kumbi sono asi ndipenjenge ndopa zake pa janja linu ndi kumutuzganiko imwe ku charu cha pasi?”
12Ndipo Davidi wangulanguliya ŵateŵeti ŵake, ndipo ŵanguŵabaya ŵangudumuwa manja ndi marundi ghawo, ndipo ŵanguŵapayika pa mphepete pa chiziŵi pa Hebroni. Kweni ŵanguto mutu waku Ishiboshete, ŵanguwuŵika mu muunda waku Abnere pa Hebroni.
Bible Society of Malawi