2 Petro 1
1
1Kalata wakutuwa kwaku Simoni Petro, muŵanda ndi wakutumika waku Yesu Kristu, kwaku ŵeniwo ŵaronde chivwanu chakuzirwa chakuyana ndi chidu mu urunji wa ku Chiuta widu ndi wa Mtaski Yesu Kristu: 2Wezi ndi chimangu vyandaniskikiye kwaku imwe mukuziŵiska Chiuta ndi Yesu Ambuyafwe.
Mudanu waku Chiuta ndi kusankha kwake
3Uli ndimo nthazi yake yauchiuta yatipaskiya vyose vyakukhumbikwa ku umoyo ndi uwopa Chiuta, mu kumziŵa mweniyo watidaniya ku unkhankhu ndi umampha waku yija; 4mwaku vyenivyo watipaska vipanganu vyakuzirwa ndi vikuru ukongwa, alinga kuti mwaku vyenivyo, mwati mwathaŵa chivuzi cho chemu charu mu ulakalaka, muŵe ŵasangazi ŵa kaŵiru kauchiuta. 5Ndipo pa chifwa chenichi nacho pakukuskiyako pamphu lose, sazgiyanipo pachanya mu chivwanu chinu umampha, ndi mu umampha wo mziŵiru, 6ndi mu mziŵiru wo kujitintha, ndi mu kujitintha ko unkhunthiya, ndi mu unkhunthiya wo uwopa Chiuta, 7ndi mu uwopa Chiuta wo kwanja-ŵabali, ndi mu kwanja-ŵabali ko chanju.
8Chifukwa pakuŵa vyenivyo mwinu ndi kuzara, vikukanizgani kuŵa ŵakata ndi ŵambura vipasi kuchiri ku chiziŵisku cha Ambuyafwe Yesu Kristu. 9Ndikweni mweniyo wauravi vyenivi ngwachiburumutiya, wachizimizimi, pakuruwa kuphotoleka kwa vilakwa vyake vyakale. 10Viyo na, mwa ŵabali, ukongwako pamphukiyani kwachikhozga mdanu winu ndi kasankhikidu kinu: chifukwa pakuchita vyenivi, kuti muguŵenge kose cha: 11chifukwa viyo kakuskikiyengeko kwaku imwe kwakusambasa kasereredu kamu ufumu wamuyaya wa Ambuyafwe ndi mtaski Yesu Kristu.
12Chifukwa chenichi ndiphwerenge kumkumbuskani rutaruta ndi vyenivi, chingana muviziŵa, ndipo mukhozgeka mu uneneska wo sono we mwinu. 13Ndipo ndipima kuti nkhwakwenere, po pose ndeche mu hema lenili, kumyuskani ndi kumkumbuskani; 14pa kuziŵa kuti nyifwa yaliŵavu langu ye pafupi, uli ndimo so Ambuyafwe Yesu Kristu wangundirongole. 15Ndipo so ndesenge kuti pavuli pa kuruta kwangu mwenda-mchita nyengo zose chinkhumbo chaku vyenivi.
Ukaboni wakuwona wa unkhankhu waku Kristu
16Chifukwa tengavi kurondo nthanu zakunyengere, tichimziŵiskani nthazi yake ndi uzi wa Mbuyafwe Yesu Kristu, kweni tenga ŵakutimu ndi maso ukuru wake. 17Chifukwa kwaku Chiuta Dada wanguronde thamu ndi unkhankhu, penipo kutuliya ku unkhankhu wo wakuzungura ghangumziya mazu ghakuti, “Mwenuyu ndi Mwana wangu wakwanjiwa, mwaku mweniyo ndikondwere ine.” 18Ndipo mazu ghenigho tinguvwa ifwe ghachiza kutuliya kuchanya, pakuŵa pamoza nayo mu phiri lo lakupaturika. 19Ndipo te nalo nenedu lo la umchimi lakukhozgeka: kwaku lenilo mutenere kuphwere, uli nkhu lumbuni lakuŵaliya mu malo ghamunkhorwi, mpaka lichenge zuŵa, ndi thondu lituwenge mu mitima yinu. 20Pakuziŵa chenichi danga, kuti palive lembo la umchimi lo lijing'anamuwa lija. 21Chifukwa kuti umchimi wengavi kuza kali ndi khumbo la munthu: kweni ŵanthu ŵakambanga gho ghatuliyanga kwaku Chiuta, pakututuzgika ndi Mzimu Wakupaturika.
Currently Selected:
2 Petro 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
