1 Petro 5

Mberere zaku Chiuta

1Viyo ndichiska ŵara ŵamwaku imwe, ine ndamura munyawo, ndi kaboni wa vyakukomwa vyaku Kristu, ndamsangazi so wa unkhankhu wakukhasa kuvumbulika: 2liskani muskambu waku Chiuta wo we mwinu, pakuulereze kwakupemberezgeka cha, kweni kwakukhumba, kwakuyana ndi kukhumba kwaku Chiuta; kwaupiripiri nako cha, kweni kwaphamphu; 3uli mbakutufuliya vigaŵa vinu nako cha, kweni pakuŵa vikozgu vya ku mskambu wo. 4Ndipo wachirongoleka Mliska mura yo, mwamronde ndumbu yambura mafoteka ya unkhankhu. 5Mwaŵamanako, kwakulingana, therani ku ŵara. Ndipo mose ku ŵanyinu mujichinyiriye ndi kujiyuyuwa mtima, pakuti, “Chiuta wamikana ndi ŵakujana, kweni wapaska wezi ku ŵakujiyuyuwa.”

6Viyo mujiyuyuliye kusi ku janja laukumu laku Chiuta, alinga kuti wamtumphuskeni ku nyengo yakwenere, 7pakupong'a paku iyo kweŵeku linu lose, pakuti waphwere imwe. 8Zizani, khazgani: diaboloyo, mphindikwa yinu, uli ndi nkharamu yakukoroma, wayingayinga ndi kupenja mweniyo wakamphe. 9Mikiranani nayo ndi kukhwima mu chivwanu chinu, pakuziŵa kuti vyakukomwa vyenivyo pe vifiskikiya mu ŵabali ŵinu ŵamu charu. 10Ndipo Chiuta wa wezi wose, mweniyo wangumdaniyani ku unkhankhu wake wamuyaya mwaku Kristu Yesu, mwati mwakomwapo kamanavi, mwenecho wafiskenge, wakhozgenge, wakhomeskenge imwe. 11Kuŵiye iyo ukumu muyaya-muyaya. Ameni.

Matauzga

12Ndi Silvano, mbali wamagomekezgeka, mo ndimpimiya, ndalemba kwinu ghawida, kuchiska ndi kusimikizga kuti wenuwu mbwezi wenecho waku Chiuta: mwaku wo miyani nganganga. 13Yo wamu Babiloni wakusankhikiya pamoza namwe, wakutauzgani ndi Marko mwana wangu. 14Tauzganani ndi mfyofyonthu wa chanju. Chimangu chikuŵiyeni mose mwaku Kristu.

Currently Selected:

1 Petro 5: TongaMw

Highlight

Copy

Compare