2 ŴaKorinte 6
6
1Ndipo taŵakutakatakiya pamoza nayo, tikuŵeyereni karonde wezi waku Chiuta kwaumbughuya cha. 2Chifukwa watiti,
“Mu nyengo yakurondeka ndingutegherezga kwako,
ndipo mu zuŵa la utanski ndingukovya.”
Onani, sono ndi nyengo yamarondeka; onani, sono ndi zuŵa la utaski. 3Taŵa kuchitiya chingana njumoza guŵisku mu kanthu kose, cha, alinga kuti uteŵeti widu ureke kususkika; 4kweni mu chinthu chose taŵakujipereka ngembateŵeti ŵaku Chiuta mu unkhunthiya ukuru ukongwa, mu masuzgu, mu malikwaŵezeka, mu malifyeku, 5mumalikwechu, mu maulinda, mu vivurupi, mu mautakataka, mu macherezgu, mu kufunga; 6mu ukhovu, mu mziŵiru, mu chilekerezga, mu ulemu mu Mzimu Wakupaturika, mu chanju chakuwura-ufyali, 7mu mazu gha uneneska, mu nthazi yaku Chiuta, ndi vidya vya urunji ku marghe ndi ku maze, 8mumarumbu ndimu muyuyu, mu thenthe liheni ndi thende limampha. Tichitika nge mbarandizgi, kweni te ŵaneneska; 9nge mbambura kuziŵika, kweni ŵakuziŵikwadi; nge mbakuziririka, ndipo, wonani, te ŵamoyo; nge mbakulangika, kweni ŵakubayika cha; 10nge mbachisungu, kweni ŵakukondwere nyengo zose; nge mbakusauka, kweni ŵakusambisiska ŵanandi; nge mbakuuravi kanthu, kweni te ŵakusakata vyose.
11Mlomo widu wajurikiya imwe, mwaŵaKorinte; mtima widu ngwakutandaulika. 12Kuti mufinyikizgika mwaku ifwe cha, kweni mufinyikizgika mu mitima yinu. 13Pavuli pake (ndikamba nge nkhu ŵana ŵangu), namweso mutandaulike mitima.
Chenjezgu ndi kunyenga kwa ŵanthu ŵambura kuziŵa Chiuta
14Mungaŵanga ŵakumangirizgana ndi ŵambura chivwanu cha: chifukwa usangana chine urunji ndi uchikana-marangu? Pamwenga ngune wanase wa ukweru ndi mdima? 15Ndipo ŵayana uli Kristu ndi Beliale? Pamwenga ngane masanga gha ŵachivwanu ndi ŵambura chivwanu? 16Ndipo ndine yanu lapa kasopi waku Chiuta ndi vyangoza? Chifukwa ndifwe kasopi waku Chiuta wamoyo; nge ndimo Chiuta wanene,
“Nkhajariyanga mwaku wo,
ndipo nkhendeyanga mwaku wo,
ndipo nkhaŵanga Chiuta wawo,
ndipo iwo ŵakaŵanga khamu langu.
17Chifukwa chenichi
tuwanimo mukati mwawu, ndi mupatukemo,
watiti Mbuya,
ndipo chambura kutowa mungachikwaska cha;
ndipo ine nkhamrondeninga imwe,
18ndipo nkhaŵiyanga imwe Dada,
ndipo imwe mwamkundiŵiya ŵana ŵanthurumi
ndi ŵana ŵanthukazi,
watiti Mbuya Wanthazizose.”
Currently Selected:
2 ŴaKorinte 6: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
