1 Petro 3

Ŵawoli ndi ŵarumi

1Kwakulingana nako, mwaŵanthukazi, muŵe ŵakujithereske ku ŵarumi ŵaku mwija, alinga kuti, chingana ŵatafuliya mazu gho ŵanyake, chifukwa cha kajaridu ka ŵawoli ŵawo, ŵandulike kwambura mazu, 2ŵachithoŵa kajaridu kinu kakutowa kamu chopu. 3Kadghoŵedu kaku ŵeniwo kangaŵanga ko kakubwaro cha, ka chiluka cha sisi, ndi ka kavwaridu kavya golide, pamwenga ka chivwaru cha munjirira; 4kweni munthu yo wakubisama mu mtima, watenere kadghoŵedu kambura kuwo, ka mzimu upovu ndi wachisisi, wo pa maso ghaku Chiuta ngwakuzirwa ukongwa. 5Chifukwa mwaka ŵanthukazi ŵakupaturika nawo, wo ŵagomekezganga paku Chiuta, ŵajidghoŵeskanga viyo, pakujithereske ku ŵarumi ŵawo; 6uli ndimo Sara wangumuvwiya Abrahamu, pakumtamula mbuya; waku mweniyo mwaŵa ŵana, pakuchita umampha ndi pakureka kopa wofi wose wakuchiruska.

7Viyo so, mwaŵanthurumi, jariyani nawo pamoza uli ndi mziŵiru, ndipo mugaŵiye munthukazi ulemu, uli nkhu chiyaŵi chakutomboroka, uli so nkhwaku wo mbakuhariya pamoza wezi wa umoyo; viyo kuti ghangaswereskeka cha marombu ghinu.

Kukomwa pakuchita urunji

8Ndipo pakumariya, mose muŵe ŵakuyana mumtima, ŵakuvwiyapo pamoza, ŵakwanja ŵabali, ŵa chitima chamampha, ŵa mitima yakujiyuyuwa; 9ŵakuwerezge uheni pa uheni cha, pamwenga chiphara pa chiphara; kweni kwakupambanako ndiko, muŵe ŵakutumbika; pakuti kwaku chenichi mungudanikiya, alinga kuti muharenge thumbiku. 10Chifukwa,

“Yo watanja umoyo,

ndi wakhumba kuwona mazuŵa ghamampha,

warekeske lilime lake ku uheni,

ndi milomo yake kuti yingaŵereŵeta cha urghargha;

11wapambukeko ku uheni, ndi wachite umampha;

wapenje chimangu, ndipo wachindondoloske.

12Pakuti maso gha Mbuya ghe pa ŵarunji,

ndi makutu ghake ku niniziku lawo;

kweni chisku cha Mbuya chimikana ndi ŵakuchita uheni.”

13Ndipo njani yo wamchitiya imwe uheni, asani mupamphukiya cho nchamampha? 14Kweni asani mungakomwa pa chifwa cha urunji, mweŵamwaŵi; viyo mungopanga chofyu chawo, ndipo mungatenthemeskeka cha. 15Kweni patuwani Kristu uli ndi Mbuya mu mitima yinu: pakurongosoleke nyengo zose kumwamuka yose wakumfumbani chifukwa cha chigomezgu chamwinu, kweni ndi upovu ndi wofi; 16pakuŵa ndi njuŵi yamampha; viyo kuti mwaku chenicho musuzgika ŵalengeskeke wo ŵaparamula kajaridu kinu kamampha ka mwaku Kristu. 17Chifukwa nkhwamamphako ukongwa, asani khumbo laku Chiuta lingakhumba viyo, kukomwa uli mbakuchita umampha kwakuruska nge mbakuchita uheni. 18Pakuti Kristu nayo wangukomwe kamoza pa vilakwa, mrunji chifukwa cha ŵaura urunji, alinga kuti watitole kwaku Chiuta, wanguti waperekeka mu liŵavu, kweni wakuchitika wamoyo mu mzimu; 19mwaku wo mzimu wanguruta ndi wangutauliya ku mizimu yamu ulinda, 20wo kali ŵangutafula, penipo chilekerezga chaku Chiuta chalerezenga mu mazuŵa ghaku Nowa, chichirongosoleka chingaraŵa mwaku chenicho ŵakuŵerengeka, ndiwo mauzima ghankhonde ndi ghatatu, ŵangutaskika mu maji: 21maji ghenagha chenga chikozgu, chakurongo ubatizo wo sono umutaskani kusuka lisilu la liŵavu cha, kweni niniziku la njuŵi yamampha kuchiri kwaku Chiuta ndi chiyuka chaku Yesu Kristu, 22mweniyo we ku marghe ghaku Chiuta, wati waruta kuchanya, pakuthereskeke kwaku iyo ŵangelo ndi mitufu ndi Vyanthazi.

Currently Selected:

1 Petro 3: TongaMw

Highlight

Copy

Compare