1 Petro 1
1
1Kalata wakutuwa kwaku Petro wakutumika waku Yesu Kristu, ku ŵalendo ŵakuchariya mu Pontu, Galatia, Kapadokia, Asia ndi Bithunia, 2ŵakusankhika uli ndi mziŵiru limu waku Chiuta Dada, mu chitowesku cha Mzimu, ku muvwiyu ndi ku chiwazga cha ndopa zaku Yesu Kristu: Wezi ndi chimangu vyandaniskikiye kwaku imwe.
Chigomezgu chamoyo
3Warumbike Chiuta wiske wa Mbuyafwe Yesu Kristu, mweniyo kwakuyana ndi unandi wa lisungu lake wangutipapiya so ku chigomekezgu chamoyo mu chiyuka chaku Yesu Kristu ku ŵakufwa, 4ndi so ku chihara chambura mawoleka, ndi chambura banga, ndi chambura mafoteka, chakuŵikikiya imwe kuchanya, 5mwaŵakusungika ndi nthazi yaku Chiuta mu chivwanu ku utaski wakurongosoleke kuvumbulikiya mu nyengo yaumari. 6Mwaku weniwo mujikankhaŵiriya, chingana nkhuti mukasuzgikanga kamanavi sono mu mesedu ghamtundumtundu, 7alinga kuti chirozgu cha chivwanu chinu, chakuzirwa kwakuruska golide, lo litanangika chingana ndakweseka mu moto, chisanirike kutataliya rumbu ndi unkhankhu ndi thamu pa uvumbuzi waku Yesu Kristu; 8mweniyo mwaŵambura kumwona mutumwanja; mwaku mweniyo sono mwaŵambura kumlereska, kweni mwaŵakuvwana nayo, mukankhaŵiya ukongwa ndi chimwemwe chambura makambika ndi chakuzara unkhankhu, 9nge nchaduwu cha chivwanu chinu, muronda utaski wa mizimu yinu.
10Pakuweniwo utaski ŵamchimi ŵangurembe ndi ŵangupenjeska, ŵeniwo ŵangutauliya limu ghapa wezi weniwo utazanga kwaku imwe; 11pakupenja nyengo ninji pamwenga yakutinji Mzimu waku Kristu wamwaku iwo warongonga, uchisimikizgiya limu vyakukomwa vyaku Kristu, ndi maunkhankhu gha pavuli paku vyo. 12Kwaku ŵenaŵa kunguvumbulikiya, kuti kwaku ŵija cha, kweni kwaku imwe ŵateŵetiyanga vyenivi, vyo sono vyataulikiya imwe ndi ŵeniwo ŵangumkambiyani evangeli mu Mzimu Wakupaturika, yo wangutumika kutuliya kuchanya; mwaku vyenivyo ŵangelo ŵanweka kulingirizgamo.
13Chifukwa chenichi pakujichinyiya mu vionu vya vinjeru vinu, zizani ndi gomekezgiyani limu kwaumari pa wezi wo utolekiyenge kwaku imwe pa uvumbuzi waku Yesu Kristu; 14uli mbana ŵa ŵakuvwiya kwambura kujilinganizga ndi malikhumbira ghakudanga ghamu ujira winu, 15kweni uli ndimo mweniyo wangumdanani waliri wakupaturika, namwe so muŵe ŵakupaturika mu kajaridu kose; 16chifukwa kwalembeka, “Mukaŵanga ŵakupaturika, pakuti nde wakupaturika ine.” 17Ndipo asani mumudana Dada mweniyo kwambura kurumba chisku ngwakweruzgiya uli ndi nchitu ya munthu yose, mu wofi jaririyani nyengo yo ya chitandara chinu: 18pakuziŵa kuti munguwomboleka, ndi vyakuwo cha, ndi siliva pamwenga golide cha, ku kajaridu kinu kauvumbwa kakurondeka ku ŵauskemwe, 19kweni ndi ndopa zakuzirwa, uli za mwanamberere wambura kalema ndi wambura banga, ndopa nazo zaku Kristu: 20mweniyo wanguziŵikwiya limu, chenga chindajarikike charu, kweni wangurongoleka pa umariwa zinyengo chifukwa chaku imwe, 21mwaŵakuvwaniya mwaku iyo paku Chiuta, yo wangumyuska ku ŵakufwa, ndi wangumpaska unkhankhu; viyo kuti chivwanu chinu ndi chigomekezgu chinu viŵe paku Chiuta.
22Mwati mwatozge mauzima ghinu mu muvwiyo wa uneneska ku kwanjaŵabali kwambura fuvyu, mwanjane kwamtima ndi kwakufwiririyapo: 23pakupapika so, ku mbeu yamawoleka cha, kweni ku yiziramawoleka, mu mazu ghaku Chiuta, ghamoyo ndi ghakujaririya. 24Chifukwa kuti,
“Munthu yose we uli mbuteka,
ndi unkhankhu wake wose uli ndi luŵa la uteka.
Uteka wo umira, ndipo luŵa lake limota:
25kweni nenedu lo la Mbuya lijaririya muyaya.”
Ndipo lenili ndi nenedu lenilo litaulikiya kwaku imwe.
Currently Selected:
1 Petro 1: TongaMw
Highlight
Copy
Compare
Share
Want to have your highlights saved across all your devices? Sign up or sign in
Bible Society of Malawi
