CHIDZIWISO 5
5
Pya mpukutu na Mwanabira
1Ndidaona mpukutu kudzanja yamadyo ya nyakukhala pampando wachifumu ule. Mpukutu ule ukhali na pyakulembwa khundu zonsene ziwiri mbumyatirirwa na pyakumyatira pinomwe.#Ezk. 2.9, 10; Yes. 29.11. 2Ndidaona mngelo wamphamvu akuvunza mwakugaluza fala mbati, “Mbani athema kukanandula pyakumyatira kufungula mpukutuwu?” 3Mbwenye kudzulu, penu padziko yapansi na dziko ya pansi pamataka#5.3 dziko ya pansi pamataka: Dziko ya anthu akufa (yang'anani 1.18). pakhali nkhabe munthu na mbodzi ene wakukwanisa kufungula mpukutu ule mbayang'ana m'bwalo mwache tayu. 4Ndidalira pikulu pene thangwi pakhali nkhabe munthu na mbodzi ene wakuthema kufungula mpukutu ule mbayang'ana m'bwalo mwache. 5Natenepo mbodzi wa akulu-akulu ale adalonga kuna ine mbati, “Leka kulira. Yang'ana! Nkhalamu yakubulukira kudzinza ya Yuda, Chidzukulu cha Davite, nyakukunda ule, ndiye anakwanisa kukanandula pyakumyatira pinomwepi mbafungula mpukutuwo.”#Kut. 49.9; Yes. 11.1, 10.
6Penepo ndidaona Mwanabira aimira pakati na kati pa mpando wachifumu wakuzungulirwa na pyakulengwa pyamoyo pinayi pontho na akulu-akulu. Mwanabira adaoneka ninga akhadaphiwa. Akhali na nyanga zinomwe, pontho maso manomwe, yeneyi ndi mizimu minomwe ya Mulungu yakutumizwa padziko yonsene yapansi.#Yes. 53.7; Zek. 4.10. 7Mwanabira adenda mbakakwata mpukutu ukhali m'dzanja yamadyo ya nyakukhala pampando wachifumu ule. 8Pidachita iye tenepo, pyakulengwa pyamoyo pinayi pile pabodzi na akulu-akulu makumawiri na anayi ale adalamba pamaso pa Mwanabira. Onsene akhali na nyakatangale na ndilo za golidi zakudzala na pyakununkhira, pile nkhupemphera kwa anthu a Mulungu.#Mas. 141.2. 9Iwo adaimba nyimbo yachinchino mbati,
“Ndimwe mwathema kukwata mpukutu
mbamukanandula pyakumyatira pyache kuufungula.
Thangwi imwe mudaphiwa, tenepo na imfanu ninga nsembe
mudagulira Mulungu anthu a madzinza,
malongero, madziko na mitundu yonsene.#Mas. 33.3; 98.1; Yes. 42.10.
10Imwe mwaachitisa kukhala dzinza yachifumu,
pontho anyansembe kuphatira basa Mulungu wathu,
pontho iwo anatonga padziko yapansi.”#Kub. 19.6; Chid. 1.6.
11Ndidayang'ana pontho mbandiva angelo pikwi-pikwi, mwinji okhonda lengeseka! Iwo adaimira mwakuzungulira mpando wachifumu, pyakulengwa pyamoyo pinayi pile na akulu-akulu ale#Dan. 7.10. 12mbaimba mwakugaluza fala mbati,
“Mwanabira akhadaphiwa ule athema kutambira
mphamvu, mfuma, nzeru, mboko,
chilemedzo, demelero na ukulu!”
13Penepo ndidava pyakulengwa pyonsene pyakudzulu, pya dziko yapansi, pya dziko ya pansi pamataka na pya m'bara, pyakulengwa pyonsene pyamoyo pikhaimba kuti:
“Kuna nyakukhala pampando wachifumu,
pontho na kuna Mwanabira
kukhale ukulu, chilemedzo,
demelero na mphamvu kwenda na kwenda!”
14Pyakulengwa pyamoyo pinayi pile pidatawira kuti, “Ameni!” Penepo akulu-akulu ale adalamba mbapembedza.
Currently Selected:
CHIDZIWISO 5: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
