KALEMBERA 7
7
Chakupereka cha akadamu
1Pansiku idamalisa Mose kuimisa Chikhumbi cha Mulungu chile, iye adadzoza na kupambulira kuna MBUYA Chikhumbicho na pinthu pyache pyonsene, pontho na guwa yansembe pabodzi pene na pinthu pyache pyonsene. 2Tenepo akadamu a mbumba, ale akhali akadamu a madzinza a Israele, anthu onthowo ale akhayang'anira pya kalembera, 3adadza na pyakupereka pyawo kuna MBUYA: pingolo pitanthatu na ng'ombe zache zakukweya pingolopyo khumi na ziwiri. Chingolo chibodzi chikhaimirira akadamu awiri; ng'ombe ibodzi yakukweya chingolo ikhaimirirambo mkadamu mbodzi. Pidadza iwo napyo ku Chikhumbi chile, 4MBUYA adalonga kuna Mose mbati, 5“Tambira mitukwayi kuti iphatiswe basa pa Chikhumbi cha Mulungu. Uipereke kuna Alevi malingana na basa yathema iwo kuphata.” 6Natenepo Mose adapereka pingolo na ng'ombe zache zene zile kuna dzinza ya Levi. 7Iye adapereka pingolo piwiri na ng'ombe zache zene zinayi kuna mbumba ya Gereshoni malingana na basa yathema iwo kuphata, 8na pingolo pinayi na ng'ombe zache zene zisere kuna mbumba ya Merari, malingana na basa yathema iwo kuphata. Iwo onsene akhali pansi pa utongi wa Itamara mwana Aroni nyansembe. 9Mbwenye Mose hadapereke ngolo penu ng'ombe kuna mbumba ya Kohati tayu, thangwi basawo ikhali yakuthukula paphewa pinthu pyonsene pyakupambulika pamaso pa MBUYA pikhayang'anira iwo pile.
10Akadamumbo adadza na pyakupereka pyawo kusekera kupambulirwa kwa guwa yansembe. Pidamala iwo sasanyika kuti apereke mitukwawo paguwa yansembe, 11MBUYA adalonga kuna Mose mbati, “Uapange kuti nsiku na nsiku mpakana nsiku khumi na ziwiri zimale, mkadamu onsene athema kupereka mitukwache kusekera kupambulirwa kwa guwa yansembe.” 12-83Munthu onsene adapereka chakupereka chache panyandandanda ufu:
| pansiku yakutoma akhali Nashoni mwana Aminadabu mkadamu wa dzinza ya Yuda; |
| pansiku yachiwiri akhali Netanele mwana Zuari mkadamu wa dzinza ya Isakara; |
| pansiku yachitatu akhali Eliabu mwana Heloni mkadamu wa dzinza ya Zebuloni; |
| pansiku yachinayi akhali Elizuri mwana Shedeuri mkadamu wa dzinza ya Rubeni; |
| pansiku yachishanu akhali Shelumiele mwana Zurishadai mkadamu wa dzinza ya Simioni; |
| pansiku yachitanthatu akhali Eliasafu mwana Deuele mkadamu wa dzinza ya Gadi; |
| pansiku yachinomwe akhali Elishama mwana Amihudi mkadamu wa dzinza ya Eferemu; |
| pansiku yachisere akhali Gamaliele mwana Pedazuri mkadamu wa dzinza ya Manase; |
| pansiku yachifemba akhali Abidani mwana Gideoni mkadamu wa dzinza ya Benjemani; |
| pansiku yachikhumi akhali Ahiezere mwana Amishadai mkadamu wa dzinza ya Dani; |
| pansiku yakhumi na chibodzi akhali Pagiele mwana Okarani mkadamu wa dzinza ya Asheri; |
| pansiku yakhumi na chiwiri akhali Ahira mwana Enani mkadamu wa dzinza ya Nafitali. |
Chakupereka cha munthu onsene chikhali sasawa: palato ikulu yasiliva yakulemera kilogramu ibodzi na theka, pontho na palato yasiliva yakuikhiramo chiropa pakuchiwaza yakulemera magramu madzana masere malingana na mdida ukhaphatiswa basa ndzidzi wenewo. Pyonsene piwiri pidadzala na ufa wakuvungazwa na mafuta ninga chakupereka cha mapira. Kapalato kagolidi kakulemera magramu dzana ibodzi na khumi yakudzala na pyakufukiza pyakununkhira; mwanamphulu wamamuna mbodzi, bira wamamuna mbodzi, mwanabira wamamuna mbodzi kuti pikhale nsembe yakupyerera; bokho mbodzi kuti akhale nsembe yakubulusira pyakudawa; pontho ng'ombe zimuna ziwiri, mabira mashanu amuna, mabokho mashanu na anabira ashanu achimuna a chaka chibodzi kukhala nsembe yachiphatizano.
84-88Konta ya pyakupereka pyonsene pidadza na akadamu khumi na awiri ale kusekera kupambulira kwa guwa yansembe pikhali tenepa:
| Mapalato akulu-akulu asiliva khumi na awiri, pontho na mapalato akuikhiramo chiropa khumi na awiri asiliva; pyonsenepi pikhalemera makilogramu makumawiri na manomwe na magramu madzana matanthatu malingana na mdida ukhaphatiswa basa ndzidzi wenewo: |
| Mapalato agolidi khumi na awiri akudzala na pyakufukiza pyakununkhira; pyonsenepi pikhalemera kilogramu ibodzi na magramu madzana matatu na mawiri; |
| ng'ombe zimuna khumi na ziwiri, mabira amuna khumi na awiri, anabira a chaka chibodzi khumi na awiri pabodzi pene na pyakupereka pya mapira pile pikhaenda pabodzi pene na penepi kuti pikhale nsembe yakupyerera; |
| mbuzi khumi na ziwiri kuti zikhale nsembe yakubulusira pyakudawa; |
| ng'ombe zimuna makumawiri na zinayi, mabira amuna makumatanthatu, mbuzi makumatanthatu, anabira a chaka chibodzi makumatanthatu. Pyonsenepi pikhali pya nsembe zachiphatizano. |
89Pidapita Mose m'Chikhumbi kalonga na MBUYA, iye adava MBUYA akulonga kuna iye na padzulu pa mphampha ya Bokosi ya Chiverano pakati pa pyakulengwa piwiri pyakukhala na maphaphido.
Currently Selected:
KALEMBERA 7: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
