KALEMBERA 3
3
Ana achimuna a Aroni
1Ishi ndi banja ya Aroni na Mose pandzidzi udalonga MBUYA kuna Mose paphiri ya Sinai. 2Aroni akhali na ana anayi achimuna: Nadabu, wautombo, Abihu, Eleazara na Itamara.#Kal. 26.60. 3Iwo adasankhulwa mbadzozwa kukhala anyansembe, 4mbwenye Nadabu na Abihu adaphiwa pandzidzi udapereka iwo chakupereka chakusasanywa na moto okhonda chena kuna MBUYA m'thando yatchetcha ya Sinai. Iwo hakhadabala ana tayu, natenepo Eleazara na Itamara adaphata basa ya unyansembe pandzidzi ukhali Aroni na moyo.#Lev. 10.1, 2; Kal. 26.61.
Dzinza ya Levi yasankhulwa kutumikira anyansembe
5MBUYA adalonga kuna Mose mbati,
6“Idza na dzinza ya Levi pamaso pa Aroni mbuasankhule kukhala anyakumtumikira. 7Iwo anaphata basa yonsene yakufunika pa Chikhumbi cha Mulungu, pontho anaphatira basa anyansembe na dzinza yonsene ya Aisraele. 8Iwo anakhala anyakuyang'anira pinthu pyonsene pya m'Chikhumbi cha Mulungu mbaphata basa m'mbuto mwa dzinza yonsene ya Aisraele. 9Basa ya dzinza ya Levi nkhutumikira kwene Aroni na anache basi. 10Sankhula kwene Aroni na anache basi kuti aphate basa ya unyansembe; munthu ene pyache onsene anapiyesera kuchita tenepoyo athema kuphiwa.”
11MBUYA adalonga pontho kuna Mose mbati, 12-13“Dzinza ya Levi lero njanga. Ndzidzi udapha ine ana autombo onsene a mu Iguputo, ndidapambula ana autombo onsene a m'mabanja a Aisraele na a pifuyo pyawo pyonsene kukhala anga ene. Tenepo m'mbuto mwa kukwata ana onsene autombo a mabanja a Aisraele kukhala anga ene, ndakwata dzinza ya Levi; iwo anakhala anga. Ine ndine MBUYA.”#Kub. 13.2.
Kalembera wa dzinza ya Levi
14M'thando yatchetcha ya Sinai MBUYA adalonga kuna Mose 15kuti achite kalembera dzinza yonsene ya Levi malingana na mbumba na mabanjawo, kulemba munthu onsene wamamuna wakukwanisa mwezi ubodzi wakubalwa penu kupiringana penepo. 16Mose adachitadi tenepo ninga montho mudampangira MBUYA. 17-20Levi akhali na ana atatu achimuna: Gereshoni, Kohati na Merari, enewa ndiye akhali makolo a mbumba imbadziwika na madzinawo. Gereshoni akhali na ana awiri achimuna: Libini na Shimei; Kohati akhali na ana anayi achimuna: Amuramu, Izihara, Hebroni na Uziele; pontho Merari akhali na ana awiri achimuna: Mahili na Mushi. Enewa ndiye akhali makolo a mabanja ambadziwika na madzinawo ale.
21Mbumba ya Gereshoni ikhadadzala na mabanja a Libini na Shimei. 22Konta ya amuna onsene akukwanisa mwezi ubodzi wakubalwa penu kupiringana penepo akhadalembwa ale akhali pikwi pinomwe na madzana mashanu. 23Mbumba yeneyi idapangwa kamanga makumbi awo kutcheru kwa Chikhumbi cha Mulungu kukhundu yakumadokero dzuwa. 24Eliasafu mwana Laele mbakhala mkadamu wa mbumba yeneyi. 25Iwo basawo ikhali kuyang'anira Chikhumbi cha Mulungu, chinguwo chakuphimba nacho m'bwalo na kunja, chinguwo cha pamsuwo wa Chikhumbi, 26chinguwo cha pampanda wakuzungulira Chikhumbi chonsene na guwa yansembe, na chinguwo chakufunga nacho msuwo wa mpanda. Iwo ndiye enechiro ache akuphata basa yonsene ya pinthu penepi.
27Mbumba ya Kohati idadzala na mabanja a Amuramu, Izihara, Hebroni na Uziele. 28Konta ya amuna akukwanisa mwezi ubodzi penu kupiringana penepo adalembwa ale, akhalipo pikwi pisere na madzana matanthatu. 29Mbumba yeneyi idapangwa kumanga makumbi awo kukhundu yakumwera kwa Chikhumbi cha Mulungu. 30Mkadamu wa mbumba yeneyi akhali Elizafani mwana wamamuna wa Uziele. 31Iwo basawo ikhali yakuyang'anira Bokosi ya Chiverano, thebulu, chakuikhira nyale, guwa yansembe, pinthu pimbaphatisa basa anyansembe m'Mbuto Yakuchena, na chinguwo cha pamsuwo wa Mbuto Yakuchenesesa. Iwo ndiye akhali enechiro ache akuphata basa yonsene papinthu penepi.
32Mkadamu wa dzinza yonsene ya Levi akhali Eleazara mwana Aroni nyansembe. Iye akhali nyakuyang'anira anthu akhaphata basawo ya unyansembe m'Mbuto Yakuchena ale.
33Mbumba ya Merari idadzala na mabanja a Mahili na Mushi. 34Konta ya amuna onsene akukwanisa mwezi ubodzi wakubalwa penu kupiringana penepo adalembwa ale, akhalipo pikwi pitanthatu na madzana mawiri. 35Mbumba yeneyi idapangwa kumanga makumbi awo kukhundu yakumpoto kwa Chikhumbi cha Mulungu, Zuriele mwana Abihaili ndiye akhali mkadamu wawo. 36Iwo basawo ikhali yakuyang'anira miti yonsene yakumangira nayo Chikhumbi cha Mulungu: mitandaliko yache, mizati yache, matako ache na pyonsene pyakufunikira pabasa yeneyi. Iwo ndiye akhali enechiro ache akuphata basa yonsene ya pinthu penepi. 37Iwo akhali pontho na basa yakuyang'anira mizati, matako, ntchiri na nkhambala. Pyonsenepi pikhali pya pampanda.
38Mose, Aroni na anache adamanga msasawo kunkhope kwa Chikhumbicho kukhundu yakumabulukiro dzuwa. Iwo basawo ikhali yakupereka nsembe m'Mbuto Yakuchena thangwi ya anthu a Israele. Munthu unango ene pyache adapiyesera kuchita tenepo adathema kuphiwa. 39Konta ya amuna onsene a dzinza ya Levi a mwezi ubodzi wakubalwa penu kupiringana penepo, ale adamala lembwa na Mose kada munthu mbumbache ninga mudalongera MBUYA akhalipo pikwi makumawiri na piwiri.
Dzinza ya Levi akwata mbuto ya ana a utombo onsene Aisraele
40-41MBUYA adalonga kuna Mose mbati, “Ana onsene autombo a Aisraele mbanga. Natenepo chita kalembera wa ana amuna onsene autombo a Aisraele kutomera wakukwanisa mwezi ubodzi wakubalwa penu kupiringana penepo. Mbwenye m'mbuto mwa ana onsenewo, ndasankhula dzinza ya Levi kukhala anga ene! Ine ndine MBUYA! Pontho ndasankhula pifuyo pya dzinza ya Levi kukhala pyanga pyene m'mbuto mwa pifuyo pyakutoma kubalwa pyonsene pya Aisraele.” 42Mose adaveradi mbachita kalembera ana onsene achimuna autombo 43akukwanisa mwezi ubodzi wakubalwa penu kupiringana penepo. Konta ya anthu onsene akhali pikwi makumawiri na piwiri na madzana mawiri na makumanomwe na atatu.
44MBUYA adalonga kuna Mose mbati, 45upereke dzinza ya Levi kuna ine kukhala yanga ene m'mbuto mwa ana autombo onsene a Israele, pontho upereke pifuyo pyonsene pya dzinza ya Levi m'mbuto mwa pifuyo pyonsene pyakutoma kubalwa pya Aisraele onsene. 46Na thangwi yakuti dzinza ya Levi yabuluka mukonta ya ana onsene a Israele na konta ya madzana mawiri na manomwe na atatu kupita m'mbuto mwa ana autombo a Israele, iwe wathema kuombola ana akuthimizirapowa 47na kobiri zasiliva zishanu, munthu onsene malingana na mdida ukhaphatiswa basa ndzidzi wenewo, 48mbupereke kobiri zenezi kuna Aroni na anache. 49Mose adaveradi mbakwata 50kobiri zasiliva zakukwana chikwi chibodzi na madzana matatu na makumatanthatu na zishanu 51mbazipereka kuna Aroni na anache.
Currently Selected:
KALEMBERA 3: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
