KALEMBERA 21
21
Kukundwa kwa Akanani
1Pidapiva mfumu wa Chikanani wa ku Aradi, ule akhakhala m'thando yatchetcha ya Negebu, kuti Aisraele akhadza na njira ya ku Atarimu, iye adadza mbachita nawo nkhondo mbaphatapo anthu anango Aisraele.#Kal. 33.40. 2Tenepo Aisraele adadumbira pikulu pene pamaso pa MBUYA mbati, “Ngakhala munatipasa mphamvu zakukunda nazo anthu enewa, ife tinavungiratu monsene mwene mizindawo yonsene.” 3MBUYA adava kupempha kwa Aisraele mbapereka Akanani m'manja mwawo. Iwo adaavungiratu monsene mwene pabodzi pene na maluwani awo ene; natenepo mbuto ile adaithula Horima.#21.3 Horima: Dzina yeneyi m'Chiheberi nkhulonga kuti “kuvungika.”
Nyoka yankuwa
4Aisraele adabuluka paphiri ya Hori mbaenda na njira yakwendera ku Nyanza Yakufira towera achalire nthemba ya Edomu. Mbwenye m'njira mwawomo anthu adataya kupirira kwawo#Deut. 2.1. 5mbalonga mwakupokanyisana na Mulungu pontho Mose. Iwo adadungunya mbati, “Thangwi yache ninji mudatibulusa m'dziko ya Iguputo kuti tidzafe m'thando yatchetcha muno mwakusowa pyakudya na madzi ene? Ife nkhabe kwanisa kupirira na pyakudya pyapezipi tayu.”#1Akor. 10.9. 6Natenepo MBUYA adatumiza nyoka zakupha pakati pa anthu, tenepo Aisraele azinji adalumwa nazo mbafa. 7Anthu adadza kuna Mose mbalonga mbati, “Ife tadawa pidalonga ife mwakupokanyisana na MBUYA pontho na imwe. Mpempheni MBUYA kuti atibulusirembo nyokazi.” Natenepo Mose adaapempherera anthu ale. 8MBUYA adapanga Mose kuti asasanye nyoka yankuwa pontho kuti aimanike pamuti, towera munthu onsene analumwayo akwanise kuyang'ana penepo mbapulumuka. 9Tenepo Mose adasasanya nyoka yankuwa mbaimanika pamuti. Tenepo munthu onsene wakulumwa na nyokayo pidayang'ana iye penepo adapulumuka.#2Maf. 18.4; Yoh. 3.14.
Kubuluka kuphiri ya Hori kwenda kuphedi ya Amoabu
10Aisraele adafuluka mbakamanga msasawo pa Oboti. 11Pidabuluka iwo pambuto yeneyi adenda kamanga msasa pamadembe a Abarimu m'thando yatchetcha kumabulukiro dzuwa a madire a Amoabu. 12Kubuluka penepo iwo adamanga msasawo m'phedi ya Zeredi. 13Kubuluka penepo adafuluka pontho mbakamanga msasa kukhundu yakumpoto kwa mkulo ya Arinoni m'thando yatchetcha, ule udenderatu mpakana m'madire a Aamori. Arinoni ndiye akhali madire pakati pa Amoabu na Aamori. 14Ndi thangwi yache Bukhu ya Nkhondo za MBUYA imbalonga pya “Luwani ya Wahebu m'nthemba ya Sufa na m'maphedi; mkulo wa Arinoni, 15na mtelero wa maphedi ale adenderatu mpakana kuluwani ya Ari kwendera ku madire a Moabu.”
16Kubuluka penepo adenda kumbuto yakuchemerwa Michera, kule kudalonga MBUYA kuna Mose mbati, “Gumanyisa anthuwo pabodzi. Ndikufuna kuapasa madzi.” 17Pandzidzi wenewu Aisraele adaimba nyimbo ishi:
“Michera bulusani madzi anu;
tenepo ife tinati tikupaseni mwenyikiro na nyimbo.
18Mchera wakukumbwa na atongi,
pontho na akadamu a anthu,
wakukumbwa na ndodo yachifumu,
pontho na miswimbo yawo.”
Iwo adafuluka kubuluka m'thando yatchetcha mule kwenda ku Matana. 19Kubuluka penepo adenda ku Nahaliele. Kubuluka ku Nahaliele adenda ku Bamoti. 20Kubuluka pa Bamoti adenda kuphedi m'nthemba ya Amoabu m'tchinde mwa phiri ya Pisiga, pale thando yatchetcha yonsene imbakwanisa kuoneka.
Kukundwa kwa Mfumu Sihoni pontho na Mfumu Ogi
(Deut. 2.26—3.11)
21Kubuluka penepo Aisraele adatuma anyamphangwa kuna Mfumu Sihoni wa Aamori kampanga kuti: 22“Titawiriseni kuti tigwande na m'dziko mwanumu. Ife nkhabe dzasiya msewu kwenda m'minda mwanu, penu m'minda yamfesa tayu, pontho ife nkhabe dzamwa madzi a m'michera mwanu tayu. Ife tinateweza kwene msewu ukulu#21.22 msewu ukulu: msewu wa mfumu. basi mpakana tiwambuke madire anu.” 23Mbwenye Sihoni hadatawirise Aisraele kuti agwande na m'dziko mwachemo tayu. Iye adagumanyisa anyankhondo ache mbaenda ku Yahazi m'thando yatchetcha mbachita nkhondo na Aisraele. 24Mbwenye Aisraele adapha anyamalwawo azinji pankhondo yeneyi mbapokosera dziko yawo kubulukira kumkulo wa Arinoni kumpoto kwache mpakana ku Yaboki. Kweneku nkhu dziko ya Aamoni, thangwi madire a Aamoni akhali akutchinjirizwa pyakwanga.#21.24 thangwi…akutchinjirizwa pyakwanga: Pyakulembwa pinango pyakale pyalonga mpakana na ku Yazere m'madire a Aamoni. 25Natenepo Aisraele adakwata mizinda yonsene ya Aamori kuthimizapo Heshiboni na maluwani onsene akuzungulira mbakhazikika mwenemo. 26Heshiboni ukhali mzinda ukulu wa Sihoni mfumu wa Aamori, ule akhadachita nkhondo na mfumu wakale wa ku Moabu mbakwata dziko yache yonsene mpakana kumkulo wa Arinoni. 27Ndi thangwi yache nyakupeka nyimbo adaimba kuti:
“Bwerani ku Heshiboni, kumzinda wa Mfumu Sihoni!
Tinafuna kuona ukumangwa pontho na kukhazikiswa pontho.
28Anyankhondo a Sihoni adenda patsogolo kabodzi
ninga moto kubulukira mumzinda uno wa Heshiboni.
Iwo adavunga mzinda wa Ari m'dziko ya Moabu,
mbavunga pontho mapiri a kumtunda kwa mkulo wa Arinoni.#Yer. 48.45, 46.
29Dzedze kuna imwe anthu a ku Moabu.
Imwe anthu akupembedza Kemoshi munati muvungwe.
Mulungu wanu mbachitise amuna kukhala anthu akuthawa kwawo thangwi ya nkhondo.
Pontho akazi akhale anthu a mfumu wa Aamori anyakuphatwa pankhondo.
30Mbwenye chinchino pidzukulu pyawo pyavunga,
m'njira monsene kubulukira ku Heshiboni nkhwenderatu ku Diboni.
Kubulukira ku Nashimu nkhwenderatu ku Nofa chifupi na Medeba.”
31Natenepo Aisraele adakhazikika m'dziko ya Aamori, 32tenepo Mose adatuma amuna anango kuti akagumane njira yadidi yakusosera nayo mzinda wa Yazere. Aisraele adaukwata mzinda ule pabodzi pene na maluwani akuzungulira mzindawo mbathamangisa Aamori onsene akhakhala mwenemo ale.
33Kubuluka penepo Aisraele adazungunuka mbakwata njira yakwendera ku Bashani. Tenepo Mfumu Ogi wa ku Bashani adagumanyisa anyankhondo ache mbaenda kachita nawo nkhondo pa Edrei. 34MBUYA adalonga kuna Mose mbati, “Leka chita naye mantha weneyo. Ine ndinakupasa mphamvu zakukunda nazo iye, anthu ache onsene na dziko yache ene. Chita kuna iye pinthu pidachita imwe kuna Sihoni mfumu wa Aamori ule akhatonga pa Heshiboni.” 35Natenepo Aisraele adapha Ogi, anache na anthu ache onsene. Nee na mbodzi ene adapulumuka. Natenepo iwo adakhazikika m'dziko mwachemo.
Currently Selected:
KALEMBERA 21: SenaMw
Highlight
Copy
Compare
Share
Want to have your highlights saved across all your devices? Sign up or sign in
© Bible Society of Malawi
