LEVITIKO 18

Pya kugonana kokhonda tawiriswa

1MBUYA adapanga Mose 2kulonga kuna Aisraele mbati, “Ine ndine MBUYA Mulungu wanu. 3Lekani kwatira makhaliro a anthu a ku Iguputo, kukhakhala imwe pakutoma kule, penu makhaliro a anthu a m'dziko ya Kanani kunakuendesani ineku. 4Verani mwambo wanga pontho chitani pinakutongani inepi. Ine ndine MBUYA Mulungu wanu. 5Tewezani mwambo na matongero pinakupasani inepi; pakuchita tenepo imwe munati mupulumuse moyo wanu. Ine ndine MBUYA.”#Neh. 9.29; Ezk. 18.9; 20.11-13; Lk. 10.28; Arom. 10.5; Agal. 3.12.

6Tenepo MBUYA adapereka mwambo ufu: Leka gonana na mbaleako na mbodzi ene. 7Leka lulupisa babako pakugonana na mako. Leka lulupisa mako nyakukubala. 8Leka lulupisa babako pakugonana na mkazache.#Lev. 20.11; Deut. 22.30; 27.20. 9Leka gonana na nyamaingako, penu nyamaingako wakunjira, penu wakukulira naye m'nyumba ibodzi penu tayu.#Lev. 20.17; Deut. 27.22. 10Leka gonana na mdzukuluako wamkazi; kweneko nkhupilulupisa wekha ene. 11Leka gonana na nyamaingako wa bele inango, thangwi weneyombo ndi nyamaingako. 12Leka gonana na nyamaingache babako, thangwi iye ntchiropa chibodzi na babako.#Lev. 20.19, 20. 13Leka gonana na mbaleache mako, thangwi iye ntchiropa chibodzi na mako. 14Leka gonana na mkazi mbaleache babako, thangwi weneyombo ndi mako. 15Leka gonana na mkwenyako, weneyo ndi mkazache mwanako,#Lev. 20.12. 16penu na mkazi mbaleako.#Lev. 20.21. 17Leka gonana na mkazi pabodzi pene na mwanache wamkazi, penu na mdzukuluache wachikazi; mwinango iwo mbabale ako, penepyo mphyakudawika.#Lev. 20.14; Deut. 27.23. 18Leka kwata nthena.

19Leka gonana na mkazi pandzidzi wache wakumwezi, thangwi iye ngokhonda chena pamaso pa Mulungu.#Lev. 20.18. 20Leka gonana na mkazi mwanzako; penepyo pinakuchitisa kukhala okhonda chena pamaso pa Mulungu.#Lev. 20.10. 21Leka pereka anako kuti akaperekwe nsembe kuna milungu Moleki, thangwi kweneko nkhululupisa dzina ya Mulungu wako. Ine ndine MBUYA.#Lev. 20.1-5. 22Leka gonana na mamuna mnzako ninga ukugonana na mkazi; Mulungu ambanyansirwa napyo.#Lev. 20.13. 23Mamuna penu mkazi aleke gonana na nyama; kweneku nkhuzuda kukulu.#Kub. 22.19; Lev. 20.15, 16; Deut. 27.21.

24Lekani kupiswipisa mwekha ene pakuchita pinthu penepi, thangwi mwenemo ndiye mudapichitisa anthu okhonda dziwa Mulungu kukhala okhonda chena pamaso pache, ale akhakhala m'dziko muno imwe mbamudzati fikamo, pontho anafuna MBUYA kuathamangisa ale, towera imwe mukapitemo. 25Makhaliro awo adachitisa dziko kuti ikhale yokhonda chena, natenepo MBUYA akutchunyusa dziko na kuichitisa kuti itapike anthu akhakhala mwenemo ale. 26-27Iwo adachita pinthu pyonsene pyakunyansapi mbachitisa dziko kukhala yokhonda chena, mbwenye imwe lekani kupichita penepi. Monsenene, penu ndimwe Aisraele, penu alendo anakhala pakati panu mwathema kukoya mwambo wanga na matongero a MBUYA, 28natenepo dziko nkhabe dzakutapikani ninga mudatapikira iyo anthu okhonda dziwa Mulungu akhakhala mwenemo pakutoma imwe mbamudzati fikamo ale. 29Imwe mukupidziwa kuti munthu onsene anaphata pinthu pyakunyansapi nkhabe dzayeswave mbodzi wa anthu a Mulungu tayu.

30Natenepo MBUYA adalonga mbati, “Verani matongero anakupasani inewa, pontho lekani kuteweza makhaliro a anthu akhakhala mwenemo imwe mbamudzati fikamo ale, pontho lekani kupiswipisa mwekha ene pakuchita pinthu penepi. Ine ndine MBUYA Mulungu wanu.”

Currently Selected:

LEVITIKO 18: SenaMw

Highlight

Copy

Compare