MABASA 24

Paulo pamaso pa Felikisi

1Pidamala nsiku zishanu Hanania, Nyansembe Wamkulu, adenda kuluwani ya Kesarea pabodzi na akulu-akulu a Ayuda anango na Teritulo, mvunuliri wawo pamiseru. Iwo adadza pamaso pa Felikisi dzampanga pya mseru ukhali pakati pa iwo na Paulo. 2Pidachemerwa Paulo kupita m'Thandomo, Teritulo adatoma kulonga pya mseruwo ninga tenepa:

“Imwe Felikisi nyakulemedzwa, ife takhala pamtendere ndzidzi ukulu, pontho pinthu pizinji pyadidi pikuchitika m'dziko mwathu muno thangwi ya utsogoleri wanu wanzeru. 3Penepi timbapitambira pandzidzi onsene na pambuto zonsene mbatipereka takhuta wamkulu kuna imwe. 4Ine sinafuna kukutayisani ndzidzi tayu, mbwenye ndinakupemphani kuti mutikomere mtima kuvesera pinafuna ife kulonga mwachigwandira. 5Ife tagumana kuti munthuyu ngwakunensa pyakwanga. Iye akulamusa pimpiningu pakati pa Ayuda padziko yonsene yapansi pontho iye ndi mkadamu wa gulu ya anthu akuchemerwa Anazareti. 6Iye pontho adayesa-yesa kuipisa Nyumba ya Mulungu, natenepo ife tidammanga.#24.6 Iye pontho…tidammanga: Pyakulembwa pinango pyakale pyathimiza vesi 6b-8a: Tidafuna kumtonga kuteweza mwambo wathu, 7 mbwenye Lusiasi, mkadamu wa anyankhondo adadza na kuzhangali dzambulusa pakati pathu. 8 Tenepo Lusiasi adatonga kuti anyakusumirache adze pamaso panu. 8Mungamvunza mwekha ene munthuyu munapidziwadi pyonsene pidamsumira ife kuna imwe.” 9Tenepo Ayuda adamlongerambo mwakupokanyisana naye kulonga kuti pyonsenepyo pikhali pyakuonadi.

Paulo alonga mafala akupitchinjiriza nawo pamaso pa Felikisi

10Penepo mkulu wa boma ule adakodola Paulo kuti alonge. Tenepo Paulo adalonga mbati,

“Ine ndikupidziwa kuti imwe mwakhala nyakutonga miseru wa dzikoyi pyaka pizinji. Natenepo ndakomerwa kuti ndipitchinjirize ndekha ene pamaso panu. 11Munakwanisa mwekha ene kudziwa kuti zikhalidi nsiku khumi na ziwiri zapitazo pikhaenda ine kapemphera ku Yerusalemu. 12Ayuda hadandigumane kuti ndikupokanyisana na munthu ene m'Nyumba ya Mulungu penu kundigumana kuti ndikulamusa chimpiningu pakati pa anthu m'nyumba zakupemphereramo penu pambuto na ibodzi ene mumzindamu tayu. 13Iwo nee anakwanisa kukutsikimiziranibi kuti pinandilongera iwopi mphyakuonadi. 14Mbwenye chinthu chibodzi chinatawira ine ntchakuti ndimbapembedza Mulungu wa makolo athu pakutewera Njira inalonga iwo kuti njakunamayi. Ndimbakhulupirambo pyonsene pidalembwa m'mwambo wa Mose pontho na m'mabukhu a maprofeti. 15Ine ndina chidikhiro sasawa ninga china iwombo chakuti Mulungu analamusa kuimfa anthu onsene, akulungama na okhonda lungama ene. 16Ndi thangwi yache ndzidzi onsene ndimbayesa-yesa kukhala na chikumbu mtima chakusowa chinthu chakupokanyisa pamaso pa Mulungu na pana anthu ene.

17“Pidamala ine pyaka pizinji kutali na Yerusalemu, ndidabwerera kweneko kuti ndikapereke mitukwa kuna anyakutcherenga pakati pa Ayuda anzanga pontho na kupereka nsembe kuna Mulungu.#Mab. 21.17-28. 18Ukhali ndzidzi ukhachita ine penepi, pidandigumana iwo m'Nyumba ya Mulungu, pontho ndikhadamalisa kale kuchita mwambo wakupichenesa. Penepo nee ndikhali na mwinji penu chimpiningu tayu. 19Mbwenye Ayuda anango akubulukira kunthemba ya Asia akhali penepo. Iwo okha ene abwere pamaso panu kudzandisumira ngakhala ali napyo pyakundisumira. 20Penu anthu ali panowa alonge khala ninga adandigumana na mseru pidaimira ine pamaso pa Thando ya miseru ya Chiyuda— 21mwinango chakudawa changa chingakhale chakuti pidaimira ine pamaso pawo, ndidakhuwa kuti, ‘Mukunditonga lero thangwi ndimbakhulupira kuti anthu akufa analamuka mbakhala pontho na moyo.’ ”#Mab. 23.6.

22Tenepo Felikisi, ule akhadziwa mwadidi pya Njira ya Mbuya, adafunga Thandoyo na mafala akuti, “Ndinazenga mseru wako angadza Lusiasi, mkadamu wamkulu.” 23Iye adatonga mkadamu wa anyankhondo dzana kuti Paulo akoyiwe mwakuonerwa, kwache ampase utumbe pang'ono pontho atawirise ashamwali ache kumpasa pinafuna iye.

Paulo pamaso pa Felikisi na Drusila

24Pidamala nsiku pang'ono Felikisi adadza pabodzi na mkazache Drusila,#24.24 Drusila: Akhali nyamayingache mfumu Herodi Agripa II, pontho mkazache Felikisi, mkulu unango wa Boma ya Chiroma. ule akhali Myuda. Iye adachemeresa Paulo mbamvesera pikhalonga iye pya kukhulupira Yesu Khristu. 25Mbwenye pikhalonga Paulo pya kulungama, kuuphata mtima kwa munthu, pontho na kudza kwa Nsiku inafuna Mulungu dzatonga anthu mseru, Felikisi adaphatwa na mantha mbalonga mbati, “Unakwanisa kwenda pyako chinchino. Ndinakuchemera pontho ndingakhala na danga.” 26Ndzidzi onthowo iye akhadikhira kuti Paulo anamdyekera na kobiri, ndi thangwi yache akhamchemera mbacheza naye kawiri-kawiri.

27Pidagwanda pyaka piwiri, Porokio Fesito adapita m'mbuto mwa Felikisi ninga mkulu wa boma. Felikisi akhafuna kuoneka ninga wadidi kuna Ayuda, natenepo adamsiya Paulo m'perezo.

Currently Selected:

MABASA 24: SenaMw

Highlight

Compare

Copy