MABASA 22

1“Imwe abale na ababanga, ngavani kuno pinalonga ine mafalanga akupitchinjiriza nawo.” 2Pidamva iwo kulonga Chiyuda, iwo adamatamiratu.

Tenepo Paulo adalonga mbati, 3“Ine ndine Myuda, mbalwa wa mu Tariso mu Kilikia, mbwenye ndakulira mu Yerusalemu muno ninga nyakufunza wa Gamaliele. Ndidafunziswa mwadidi pya kukoya mitemo ya makolo athu, pontho ndikhali na phinga kuchita basa ya Mulungu ninga munachitira imwe monsene lero.#Mab. 5.34-39. 4Ndikhaboneresa na kuphesa anthu ale akhatewera Njira ya Mbuya. Ndikhamanga amuna na akazi mbandikaaponya m'perezo.#Mab. 8.3; 26.9-11. 5Nyansembe Wamkulu na onsene a m'Thando ya miseru ya Chiyuda anakwanisa kundichitira umboni kuti ndikulonga pyakuonadi. Ndidatambira makalata kubulukira kuna iwo kwenda nawo kuna Ayuda a mumzinda wa Damasiko. Natenepo ine ndidenda kweneko kuti ndikamange anthu enewa mbandidza nawo ku Yerusalemu akumangwa na njema towera atchunyuswe.

Paulo alonga pya kusanduzika kwache mtima

(Mab. 9.1-19; 26.12-18)

6“Pikhali ine chifupi kufika ku Damasiko na masikati, vumbu-vumbu cheza chikulu chakubulukira kudzulu chidandimwinikira mwakundizungulira. 7Ndidagwa pansi, tenepo fala idaveka kuti, ‘Saulo! Saulo! Watani unandiboneresa tenepa?’ 8Ine ndidavunza kuti, ‘Ndimwe ani Mbuya?’ Iye adalonga kuna ine mbati, ‘Ndine Yesu wa ku Nazareti anaboneresa iweyi.’ 9Anzanga akhali na ine adaona chezacho, mbwenye nee adava fala ya ule akhalonga kuna ineyobi. 10Ine ndidavunza kuti, ‘Ndichitenji, Mbuya?’ Tenepo Mbuya adalonga kuna ine mbati, ‘Lamuka uende mu Damasiko. Kweneko unakapangwa pyonsene pidasasanya Mulungu kuti uphate.’ 11Ndikhali boli-boli, thangwi ya kuchena kukulu kwa chezacho. Natenepo anzangawo adandiphata nsenji mbaenda nane mu Damasiko.

12“Mumzindamo mukhali mamuna unango, dzinache Hanania, nyakupembedza Mulungu ule, akhavera mwambo wathu pontho akhalemedzwa pikulu na Ayuda onsene kweneko. 13Iye adadza mbaimira chifupi na ine mbalonga mbati, ‘Mbaleanga Saulo, tambira pontho kuona kwako.’ Ndzidzi onthowo ndidakwanisa kumuona. 14Iye adalonga mbati, ‘Mulungu wa makolo athu akusankhulani kuti mudziwe kufuna kwache, pontho muone Nyabasache Wakulungama pontho na kumva iye yekha ene akulonga kuna imwe na falache. 15Thangwi imwe munakhala mboni yache kupanga anthu onsene pidaona na pidava imwe. 16Mphapo chinchino, mwatani munadembuka? Lamukani mbamubatizwe kuti mucheneswe kuna pyakudawa pyanu mbamupemphere kuna Mbuya.’

Kuchemerwa kwa Paulo kalalika kuna anthu okhonda khala Ayuda

17“Ndidabwerera ku Yerusalemu, tenepo pikhapemphera ine m'Nyumba ya Mulungu, ndidaona masomphenya. 18Mwenemo ndidaona Mbuya akulonga kuna ine mbati, ‘Chimbiza ubuluke mu Yerusalemu muno, thangwi anthu kuno hanatawira tayu umboni unandichitira iwewu.’ 19Ine ndidatawira kuti, ‘Mbuya, iwo akupidziwa mwadidi kuti ine ndikhaenda m'nyumba zakupemphereramo kumanga na kumenya anyakukukhulupirani. 20Pontho pidaphiwa mboni yanu Setefano, ine ndikhali penepo mbanditawirizana nako kuphako, pontho nyakuyang'anira pyakufinika pya anyakuphawo akhali ine.’#Mab. 7.58. 21Mbuya adalonga kuna ine mbati, ‘Ndoko, thangwi ndinakutumiza kutali kuna anthu okhonda khala Ayuda.’ ”

22Mwinjiwo udamvesera Paulo mpakana adalonga penepi. Tenepo iwo adatoma kukhuwa mwakugaluza fala mbati, “Mpheni! Iye hadatheme kukhala m'maso tayu!” 23Iwo akhakhuwa, kuponya nguwo zawo m'dzulu pontho na kuwaza fumbi thangwi ya kuzhangali. 24Mkadamu wa anyankhondo ule adapanga amunache kuti akwate Paulo aende naye kumpanda. Tenepo iye adaapanga kuti akwapule Paulo towera agumane thangwi ikhamkhuwira Ayuda. 25Mbwenye pidamala iwo kummanga kuti amkwapule, Paulo adalonga kuna mkadamu wa anyankhondo dzana, ule adaimira penepo mbati, “Ayi mwambo wanu umbatawirisa kukwapula mzika ya Chiroma mbamudzati kumtonga kuti adawa?”

26Pidava mkadamu wa anyankhondo dzana ule penepi, adenda kuna mkadamu wamkulu mbamvunza mbati, “Pinachita imwe ninji? Munthuyu ndi mzika ya Chiroma!”

27Natenepo mkadamu wamkulu ule adenda kuna Paulo mbakamvunza mbati, “Ngandipange, ayi ndiwe mzika ya Chiroma?”

Paulo adatawira mbati, “Ande.”

28Mkadamu wamkuluyo adalonga mbati, “Ine ndidachita kugulatu na kobiri zizinji uzika wangawu.”

Paulo adatawira mbati, “Mbwenye, ine wangawu ndidachita balwa nawo.”

29Kabodzi na kabodzi amuna, akhafuna kavunza Paulo ale, adamleka. Tenepo mkadamu wamkulu ule adachita mantha pidadzindikira iye kuti Paulo akhali mzika ya Chiroma pontho kuti akhadammanga na njema.

Paulo pamaso pa Thando ya miseru ya Chiyuda

30Mkadamu wamkulu ule akhafuna kugumana chadi-chadi chikhasumira Ayuda Paulo, natenepo mangwana mwache iye adatonga kuti njema za Paulo zisudzulwe pontho kuti anyansembe akulu na onsene a m'Thando ya miseru ya Chiyuda agumane pabodzi. Tenepo iye adakwata Paulo mbamuimisa pamaso pawo.

Currently Selected:

MABASA 22: SenaMw

Highlight

Compare

Copy