MABASA 20

Paulo afambira pontho nthemba za Makedonia na Grisi

1Pidamala chimpiningu, Paulo adagumanyisa anyakukhulupira mbagonekana nawo na mafala akuawangisa mtima. Tenepo adaasiya mbaenda kunthemba ya Makedonia. 2Iye adenda kudzera m'nthembamo mbawangisa mtima anthu na mafala azinji. Pakumalisa iye adafika kunthemba ya Grisi. 3Kweneko adakhalako miyezi mitatu. Iye akhasasanyika kuti aende na m'mwadiya kudziko ya Siria, mbwenye pidapidziwa iye kuti Ayuda akhapangana pya kumpha, adanyerezera kubwerera kudzera ku Makedonia. 4Sopatro mwanache Piro, wa mumzinda wa Berea adenda naye pabodzi. Tenepo amunawa adachitambo chibodzi-bodzi: Aristariko na Sekundo a mumzinda wa Tesalonika; Gayo wa mumzinda wa Deribe; Tikiko na Trofimo a m'nthemba ya Asia; pontho na Timoti. 5Iwo adatsogola mbakatidikhira mumzinda wa Troa. 6Pidamala ife kudya Phwando ya Mikate yakusowa chakufufumisira, tidabuluka kuluwani ya Filipi mbatienda na m'mwadiya ku Troa. Pidagwanda nsiku zishanu, tidaphatana nawo ku Troako. Kweneko tidamalako dimingu yamumphu.

Yutiko alamuswa kuimfa mu Troa

7Pa Sabudu#20.7 Pa Sabudu: penu Pa Dimingu. na mawulo tonsene tidagumanyikana pabodzi kumenya mkate kukumbuka Mbuya. Paulo adalonga kuna anthu ale kufikirana chiti-chiti thangwi akhaenda mangwana mwache. 8Nyale zizinji zikhadagaswa m'subi yapadzulu, mule mudagumanyikana ife. 9Pikhali Paulo m'kati kulonga, mphale unango, dzinache Yutiko, adakhala pazhanera ule, adatoma kuodzira. Tenepo adagona chitulo chikulu mbagwa pansi kubulukira m'nyumba yachitatu yapadzulu. Pidatchitha anthu pansi kamulokota, adamgumana afa kale. 10Mbwenye Paulo adatchitha pansipo, adapiponya pana iye mbamkhumbatira. Tenepo adalonga mbati, “Lekani dungunya, ali m'maso!” 11Tenepo iye adakwira pontho m'dzulu mule mbamenya mkate kukumbuka Mbuya na kudyerana pabodzi. Pidamala iye kulonga nawo ndzidzi ukulu ene kufikirana kunja kuchena, iye adenda. 12Iwo adakwata mphaleyo mbaenda naye kumusa wamoyo pontho awangiswa pikulu pene mumtima mwawo.

Paulo abuluka ku Troa kwenda kumzinda wa Mileto

13Tidatsogola kapakira m'mwadiya mbatienda kuluwani ya Asosi, kule kukhafuna ife kakwata Paulo kuti iye akapakire m'mwadiyawo. Iye akhadatipanga kuchita tenepo, thangwi iye akhaenda kweneko na mtunda okhokha. 14Pidatigumana iye mu Asosi, adapakira nafe m'mwadiya mbatienda kuluwani ya Mitelene. 15Mangwana mwache tidabuluka ku Mitelene mbatienda na m'mwadiya kuntchuwa ya Kiyo. Mkuchono mwache tidenda na m'mwadiya mbatikafika kuluwani ya Samo, pontho mtondo mwache tidafika kuluwani ya Mileto. 16Paulo akhadanyerezera pyakwenda na m'mwadiya kupiringana mzinda wa Efeso kuti aleke taya ndzidzi m'nthemba ya Asia. Iye akhachimbiza tenepo, towera akafike mu Yerusalemu pa Nsiku ya Pentekosti ngakhala pikhali pyakukwanisika.

Mafala a Paulo akugonekana na akulu a mpingo a ku Efeso

17Kubulukira ku Mileto, Paulo adatumiza mphangwa ku Efeso kuchemera akulu a mpingo kuti adze kuna iye. 18Pidafika iwo, iye adalonga nawo mbati, “Imwe mukupidziwa mule mukhakhalira ine ndzidzi onsene udakhala ine namwe kubulukira pa nsiku yakutoma idafika ine m'nthemba ya Asia. 19Na misozi izinji pontho na kupichepesa kukulu ndikhaphata basa ya Mbuya ninga nyakutumikirache pandzidzi wa nyatwa, ule udandidzera thangwi Ayuda akhafuna kundipha. 20Mukupidziwa kuti handidakubisireni chinthu na chibodzi chene chakukuphedzani tayu, mbwenye ndikhalalika na kufunzisa pakwecha pontho na m'nyumba mwanu. 21Ndidacheuza pikulu Ayuda na anthu okhonda khala Ayuda kuti aleke pyakudawa pyawo mbazungunukire kuna Mulungu pontho na kukhulupira Mbuyathu Yesu. 22Tenepo chinchino mwakuvera Mzimu Wakuchena ndinaenda ku Yerusalemu, mbwenye pinafuna kandichitikira kweneko, nkhabe kupidziwa tayu. 23Chinadziwa ine chene ntchakuti m'mizinda yonsene Mzimu Wakuchena andicheuza kuti maperezo na nyatwa pikundidikhira. 24Mbwenye, ine nkhabe tsalakana tayu pya moyo wanga kuti ngwakufunika kuna ine; pinafuna ine pyene, mphyakuti ndimalise bitcha-bitchayu pontho ndimalise basa idandipasa Mbuya Yesu yakulalika Mphangwa Zadidi za kukoma mtima kwa Mulungu.#2Tim. 4.7.

25“Ndafamba-famba pakati panu monsene kulalika Ufumu wa Mulungu. Tenepo chinchino ndikupidziwa kuti nee mbodzi wa imwe anati andione pontho tayu. 26Natenepo lero ndikukupangani mwakugogomeza kuti ngakhala unango anatayika, si inevebi, mphyachembo Penepyo. 27Thangwi ine handidakubisireni tayu kukupangani pyonsene pinafuna Mulungu. 28Tenepo mupiyang'anire mwekha ene pontho na gulu yonsene idakupasani Mzimu Wakuchena kuti muiyang'anire. Mukhale amakabuswa a mpingo wa Mulungu,#20.28 Mulungu: Pyakulembwa pinango pyakale pyalonga Mbuya. ule udapikwatira iye yekha ene kudzera muna imfa ya mwanache ninga nsembe.#20.28 imfa ya mwanache ninga nsembe: penu imfa yache ene. 29Ndikupidziwa kuti ine ndingabulukapo panabwera mibinzi yakugoswa pakati panu, tenepo iyo hinasiya mkumbi okhonda pheka tayu. 30Ndzidzi unafika wakuti anthu a m'gulu mwanu monthomu analonga pyakunama kuti anyakukhulupira abuluke mbaatewera. 31Natenepo khalani m'maso mbamukumbuke kuti na misozi na misozi ndidafunzisa monsenene mosiku na masikati pyaka pitatu.

32“Tenepo chinchino ndinakuperekani m'manja mwa Mulungu na kuna mphangwa za kukoma mtima kwache, zile zina mphamvu kuwangisa chikhulupiro chanu na kukupasani kutsanzaya, kule kwakoyera Mulungu anthu ache onsene. 33Ine handidapikhumbire ndekha ene kobiri penu nguwo za munthu na mbodzi ene tayu. 34Imwe mwekha ene mukupidziwa kuti ndidaphata basa na manjangawa kuti ndigumane pinthu pyonsene pikhasowa ine pabodzi na anzanga. 35Ine ndakuonesani pyonsene kuti pakuphata basa mwakuwangisa ninga tenepo, tathema kuphedza ale ana chikhulupiro chakuchepa, kukumbuka mafala adalonga Mbuya Yesu yekha ene kuti, ‘Kupasa kumbatsanzayisa pikulu kusiyana na kutambira.’ ”

36Pidamala Paulo kulonga penepi, adagodama pabodzi na anthu onsene ale mbapemphera. 37Onsene akhalira pikhamkhumbatira iwo na kumpsompsona kugonekana naye. 38Chidaaliza pikulu ntchakuti iye adalonga kuti iwo nee anamuonavebi. Tenepo iwo adenda naye kamperekeza kumwadiya.

Currently Selected:

MABASA 20: SenaMw

Highlight

Compare

Copy