Matayo 16
16
E’yo ’bani lezu eceta ndreruri
1 #
Mar 8:11-21
#
Mat 12:38; Luk 11:16 ’Ba Farisaini piyi nga eca ’ba Sadukayoni be eri o’bizu, nga zi eri tia eri ma ece eceta engapi ’buari yi dri. 2#Luk 12:54-56Te eri nga e’yo omvi, ’yo yi tia kini, Ka eca ondresi, emi adri ’yo, Anguni nga ovu onyiru, ’buni ovule ekarurisi. 3#Mat 11:4Te o’bitisi, Andru angu mile onzi, ’buni ovule ekaru azini iritini ovule inirurisi. Emi ni ’bu ma mile amazu ra ’bo, te eceta ewuniri emi econi amazu ku. 4#Mat 12:39; Luk 11:29; Yon 2:1A’bianzi onzi ali o’bapi ’diyi yi eceta nda, te yi ngani eceta fe yi dri ku, pe lu eceta Yonani. Eri nga yi ku ra, mu ra.
Akufi ’ba Farisaini pini ’ba Sadukayoni be
5’Ba erini imbale ’diyi nga ca ’aa’dasi, te yi ma dri avi mikate jizu ra. 6#Luk 12:1Te Yesu nga ’yo yi tia, Emi ndre emi te emi agei akufi ’ba Farisaini pini ma e’yosi ’ba Sadukayoni be. 7Yingae’yo ega yi eselia, ’yo kini, Ama ejini mikate ku. 8#Mat 6:30Yesu ka ni ra eri nga ’yo ra, Emi a’ita be were ’diyi la, emi e’yo ega emi eselia emini ovule mikate kokorurisi a’disi ya? 9#Mat 14:17-21Emi vani nga kiri ku, emi egani mikate towi ’ba alifu towi driri ku ya? Emi o’du ndra evu si ya? 10#Mat 15:34-38Kani mikate aziri ’ba alifu su driri, emi o’du abaka si ya? 11Emi vani ku kini ma ’yoni e’yo mikateni emi tia ku ngoni ya? Te emi te emi agei akufi ’ba Farisaini pini ma e’yosi ’bai Sadukayoni be. 12#Yoh 6:27Yi nga di va ani kini eri ’yoni e’yo agei tezu akufi mikateni ma e’yosi ku, te yi agei tezu imbata ’ba Farisaini pini ma e’yosi ’ba Sadukayoni be.
E’yo e’daza Peteroni
13 #
Mar 8:27-30; Luk 9:18-21 Yesu ka eca angu Kaisari Filipiniria, eri nga ’ba erini imbale ’diyi zi kini, ’Ba kini Mvi ’bani eri a’edi’i ya? 14#Mat 14:1-2; 17:10; Mar 6:14-15; Luk 9:7-8Yi nga ’yo ra, ’Ba azini kini Yohana baputizi fepiri’i, ’ba azini kini Eliya’i, azini kini Yeremia’i kani ’ba nabiru ’diyi ma azi. 15Eri nga ’yo yi tia, Te emi’i, emi kini ma a’di’i ya? 16#Yoh 6:68-69Simoni Petero nga e’yo omvi, ’yo ra, Mi Kristo Mungu idriruri ma Mvi’i. 17#Gal 1:15, 16; Mat 17:4, 5Yesu nga e’yo omvi ’yo eri tia, Mi ovu drilebaru, Simoni Yona mvi, Te rua pi ari be eceni e’yo ’diri mi drini ku, te ma Ati ovupi ’buari 18#Yoh 1:42; Efe 2:20Te ma ’yo mi tia, mi Petero’i, ma nga kanisa mani si kata ’dori ma dria, azini Pari ’ba drazaniri ma kalitile ngani eco eri ndezaru ku. 19#Mat 18:18; Yoh 20:23Ma nga kifungula suru ’buarini ’diyi fe mi dri, afa dria mini ombele nyakuari nga ovu ombezaru ’bua, azini afa dria mini trule nyakuari nga ovu truzaru ’bua indi 20#Mat 17:9Vutinia eri nga eli ’ba erini imbale ’diyi imba ci yi ma ’yo ’ba aluni ma tia kini eri Kristo’i ku.
Yesuni drata ini ma e’yo ecezu
21 #
Mar 8:31–9:1; Luk 9:22-27 #
Mat 12:40; Yoh 2:19 Engazu etu ’dasi Yesu ’ba e’yo ece ’ba erini imbale ’diyi ma tia kini i ma mu Yerusalemua candi isuzu ’ba ’wara piyi dri ’ba kuhani amboru pie, ’ba waraga sipi ’diyi be, kini i nga ovu fuzaru, te o’du nasi i nga enga ra. 22Petero nga eri bi, nga ’ba ega eri dria ’yozu kini, ’Dini yo fo, Opi la! E’yo ’diri ma ’ye i mi ruaa aluni ku. 23Te eri oja i, nga ’yo Petero tia, Mi da mi vile ma ngukua, Satani! Mi ma dri kumuru, mini e’yo Munguni egale ku te e’yo ’bani egale’irisi.
24 #
Mat 10:38; Luk 14:27 Yesu nga di ’yo ’ba erini imbale ’diyi ma tia, ’Ba azini ka le mu ma vutia, eri ma ga i ma ngulupi si, ma ’du pati alaza ini, ma bi ma vuti. 25#Mat 10:39; Luk 17:33; Yoh 12:25’Ba ka le idri ini pa ra eri nga idri nde avi ra, te ’ba ka idri ini avi e’yo manisi eri nga eri isu ra. 26#Mat 4:8Te agu ka angu wudrikuru nya dria, eri nga orodri ngoni isu idri erini ka avi ra ya? Agu nga afa ngoni ofe idri ini ma paria’i ya? 27#Mat 25:31; Zab 62:11-12; Rum 2:6; Yoh 5:29; O’be 24:12Te Mvi ’bani nga emu diza Ata erinini be, malaika erini pie; etu ’dasi eri nga di afa ofe ’ba dria alu ’lalu dri, azi yini ngaleri vusi. 28#Mat 10:23Ma ’yo emi tia ndi, ’ba pa sopi ’doa ’diyi ma azini indi, yi ngani dra ma ali o’bi ku, de nga yi ndreni Mvi ’banini emuria suru ini ma alia ku.
Bible in Lugbara © United Bible Societies, 1966.