Luka 6
6
’Ba erini imbale ’diyini anyadri ondizu sabatosi
1 #
Mat 12:1-8; Mar 2:23-28 #
Azi 23:25
Eri nga eca ’dini, o’du sabatonisi erini agaria amvu anya beri ma alesi, ’ba erini imbale ’diyi nga anya dri ovi, nga anya nde anyi drisi, nga di nya ndo. 2#Yoh 5:10’Ba Farisaini ’diyi ma azi ’yo ra, Emi ’ye e’yo azitani ogale ’yekokoru o’du sabatonisiri a’disi ya? 3#1 Sam 21:1-6Yesu nga e’yo omvi, ’yo yi tia kini, Emi lani nga e’yo ’diri, ndra Daudini ’yele de eri ovu abirisi, eri’i ’ba ovupi eri be ’diyi pieri ku ya? 4#Lev 24:9Emi lani e’yo erini fizu jo Mungunia, erini enya ecetaruri ’duzu nyazu fezu ’ba ovupi eri be ’diyi dri indiri ku ya? de isu azita oga enya nde nyako si, pe lu kuhani dri a’dule. 5Te eri ’yo yi tia, Mvi ’bani eri Opi sabatoniri.
’Ba dri be ondrizari
6 #
Mat 12:9-14; Mar 3:1-6 Eri nga eca ’dini sabato azinisi, eri fi pari ’bani yi okuzuria ’ba imbazu, te agu azini indi ’dale eri ma dri ndiri ondrizaru. 7#Luk 14:1’Ba karaniru ’diyi pi ’ba Farisaini be, nga eri ndre okposi, kani eri nga eri ati o’du sabatonisi yani; ka’dini yi ma isu geri asu suzu eri ruaa beni. 8Te eri ni asisile yini ra; eri nga ’yo agu dri ondrizaruri ma tia, Mi enga uru, mi so pa agadua. Eri nga enga uru, nga pa so ra. 9Yesu nga ’yo yi tia, Ma emi zi, azita a’i ’ba ma nga azi onyiru etu sabatonisi’i, kani azi onzi’i ya? ’Ba pazu kani ’ba ma dri jazu ya? 10Yesu nga yi olu dria, nga ’yo agu nde ma tia, Mi eju mi dri. Eri eju ra, drini nga eca idriru coti. 11Te aza fi yi asia, yi di nga e’yo ’yo yi eselia kini yi ma ’ye di Yesuni ngoni ya.
Yesuni ’ba mudri drini iri ’diyi opezu
12 #
Mar 3:13-19
Eri nga eca ’dini, o’du ’dayisi eri fu mu oni dria Mungu zizu; eri zi Mungu ini be rra. 13#Mat 10:2-4; Yoh 6:70; ’Yeta 1:13Angu ka ati ra, eri omve ’ba erini imbale ’diyi i vu, eri nga ’ba ope yi ma eselia mudri drini iri, nga yi omve ’ba ti opele ’diyi: 14Simoni erini omvele Petero’iri pi, Andarea adripi erini be, Yakobo pi Yohana be, Filipo pi Baritolomayo be, 15Matayo pi Toma be, Yakobo Alifayo mvi pi, Simoni yini omvele Zeloteri be, 16Yudasi Yakobo mvi pi, Yudasi Isikariote eri ma o’di nyapiri be.
Yesuni ’ba kakau atizu
17 #
Mat 4:23–5:1; Mar 3:7-12 Eri si va yi be, eri so pa angu senderu ma dria, ’ba ongulumuru erini imbale ’diyi, azini ’ba kakau engapi angu dria Yudiani pi ma alia Yerusalemu pie, angu miri tia Turo pi ma ageia Sidoni beria ’diyi pie dria emu e’yo erizu eri vu, yi ma ovu ani atizaru azo yinisi beni; 18’ba yi ecandipi orindi onzisi ’diyi dria ovu atizaru. 19’Ba ongulumuru dria yi nda geri eri rua elozu, okponi efule eri vu yi atizu driarisi.
Asi ndriza pi candi be
20 #
Mat 5:3, 4, 6, 11, 12 Eri nga i mile enga uru ’ba erini imbale ’diyi vu, nga ’yo ra: Emi drilebaru, emi ’ba alioru ’diyi, suru Mungunirini ovule eminirisi.
21 #
Eceza 7:16, 17; Zab 126:5, 6; Isa 61:3 Emi drilebaru, emi ’ba abirini fule curu’do ’diyi, emini ngale trale rarisi. Emi drilebaru, emi ’ba wupi curu’do ’diyi, emini ngale ogule ogurisi.
22 #
1 Pet 4:14; Yoh 15:19; 16:2 Emi drile baru, ’ba ka emi ngu onzi, yi ka emi esele co yi be ndu, yi ka drinza fe emi dri, ka emi ru ’be amve afa onzikanyarule, Mvi ’bani ma e’yosi. 23#2 Sur 36:16; ’Yeta 7:52Emi ma ovu ayikosi o’du ’dasi, emi enya emi nyonasi, te emi ndre, orodri emini eri amboru ’bua; a’bi yini yi ’ye ndra nabi vu ’dinile trotro.
24 #
Yak 5:1
Te candi emi dri, emi ’ba afa e’ipiru ’diyi la, emini asi omiza emini a’ile ’borisi.
25 #
Isa 5:22
Candi emi dri, emi ’ba trapi curu’do ’diyi la, emini ngale ovule abiri berisi.
Candi emini, emi ’ba ogupi curu’do ’diyi la, emini ngale e’yo eyikile candisi azini wulerisi.
26 #
Yak 4:4; Mik 2:11 Candi emini, ’ba dria ka e’yo onyiru ’yo emisi, te yi a’bipi ’ye nabi inzoru vu ’dinile trotro.
E’yo ’bani ari’ba lezuri
27 #
Mat 5:39-48
Te ma ’yo emi ’ba eripi ’diyi ma tia, Emi ma le juru emini, emi ma ’ye onyiru ’ba emi ngupi onzi ’diyi vu, 28emi ma ’yo e’yo asi ndrizasi ’oa emi tripi ’diyi ma tia, emi ma zi Mungu ’ba emi ’yepi onzi ’diyi dri. 29’Ba emi o’bolo sapi aluri dri emi ’ma oja aziniri indi; ’ba bongo emini amveleru papiri dri emi ma oga alialeruri ku. 30Mi ma fe ’ba dria afa a’ipi mi vuri dri; ’ba afa emini ’dupiri ma tia, mi ma zi ariotini omvizu ku. 31#Mat 7:12Emi ma ’ye ’ba vu ekile emini lele yi ma ’ye emi vurile. 32Emi ka ’ba emi lepi ’diyi le tuke’i awa’difo emini ngoa ya? Ka tro ’ba onzi ri, yi adri ’ba yi lepi ’diyi le’i. 33Emi ka ’ba emi ’yepi onyiru ’diyi ’ye tuke onyiru’i, awa’difo emini ngoa ya? Ka tro ’ba onzi ti, yi adri ’ye ’dinile ra. 34#Lev 25:35, 36Emi ka mari fe ’ba emini egale kini yi nga omvi ra ’diyi dri, awa’difo emini ngoa ya? ’Ba onzi yi adri mari fe ’ba onzi azini ’diyi dri, yi ma a’i amvizani trotro beni. 35Te emi ma le emi juru, emi ma ’ye onyiru, emi ma fe mari, ka tro emi egani omvizani ku ti; orodri emini nga ovu kakau, emi nga ovu anzi Mungu ovupi Uru Turini; erini ovule onyiru ’ba awa’difo kokoru ’diyi pi vu ’ba onzi be indirisi. 36Emi ma ovu asi ndriza be Ata eminirini ovule asi ndriza berile.
E’yo ’bani ’ba azini ma e’yo lizuri
37 #
Mat 7:1-29
#
Mat 6:14
Emi ku e’yo liza ja, ’ba ngani e’yo emini li ku beni; emi li e’yo i ’bani yi ndezu ku, ’ba ngani ani e’yo li emi ndezu ku; emi ku e’yo onzi ’bani, ’ba nga e’yo onzi emini ku ani; 38#Mar 4:24emi ma fe afa ’ba dri, ’ba yi nga afa fe emi dri indi; yi nga o’biza onyiru, omizaru, oyazaru, drini ayipi vari fe emi dri ’duzu agatia. Te yi nga afa o’bi emi dri, o’bita emini o’bile feleri vusi.
39 #
Mat 15:14; 23:16, 24 Eri olu e’yo o’beza yi tia kini: Eco ’ba mileefi odraza berini agyi mileefi odraza beri ma dri cezaru ra ya? Yi ngani iritro o’de ’bilia ku ya? 40#Mat 10:24-25; Yoh 13:16; 15:20’Ba imbata a’ipiri agani ’ba eri imbapiri ku, te ’ba dria, ka ovu imbazaru de ’bo, yi nga ovu ’ba yi imbapirile. 41Mi ndre pati o’boroko mi adripi ma miliari a’disi ya, dere pati ’barata mi ngulupi ma miliari mi luni ku? 42Mi eco ’yozaru mi adripi tia ngoni ngoni ya, Ma adripi, mi fe ma epe pati o’boroko mi miliarisi, ka mi ndreni pati ’barata mi miliari ku ya? Mi ’ba lokiri be, mi epe pati ’barata mi miliari raka, mi nga di ndre onyiru pati o’boroko epezu mi adripi ma miliarisi ndo.
Yi pati ama efi erini ’yalerisi
43Pati onyiru efi onzikanya ’yapini yo, azini pati onzikanya efi onyiru ’yapini vini yo; 44#Mat 12:33te ’ba pati dria alu alu ni efi ’yaza yinirisi. ’Ba tini elio efi pati oci beri ma ruaa ku, azini yi tini zabibu efi La ruaa ku. 45#Mat 12:34, 35’Ba onyiruni adri e’yo onyiru ofu lonyi onyiru i ma asiari ma alia, azini ’ba onzi e’yo onzi ofu lonyi,onzi ma alia; te ti ’bani eri e’yo gapi ’ba ma asia treri ’yo’i.
fo eti iri ma e’yo
46 #
Mal 1:6; Mat 7:21 Emi ma omve Opi, Opi, a’disi ya, emi ka e’yo mani ’yoieri ’ye ku? 47’Ba dria alu alu emupi ma vu e’yo mani eripi yi ’yepi indiri, ma nga emi dri eceta erini i sizu erileri ece: 48eri ovu agu jo sipirile, eri ova aliru, eri ’ba jo eti kata dria; yi tiza ka emu ra, yi raza ka i da jo ’dari ma dria okposi ti, econi eri oyazaru ku, erini sile onyirurisi. 49Te ’ba eripi ra ’yepi kuri eri ovu ’ba jo sipi nyaku dria jo eti kokorurile; yi razani nga i da jo ’dari ma dria okposi, joni nga perepere i asu va; jo ’dari ma e’dezari amboru.
Currently Selected:
Luka 6: LB66
Highlight
Share
Copy
Want to have your highlights saved across all your devices? Sign up or sign in
Bible in Lugbara © United Bible Societies, 1966.