'Ba Levini 11

Anyapa alaru ’diyi pi alatara kokoru ’diyi be

1Yehova nga di ’yo Musa pi ma tia Aroni be kini, 2#Azi 14:4; Eze 4:4; Dan 1:8; Mat 15:11; ’Yeta 10:12; Rum 14:2; 1 Kor 8:8; Kol 2:16; Ebra 9:10Emi ’yo anzi Israelini ’diyi ma tia kini, Afa idriru anyapa nyakua ’diyi dria ma eselia emini ecole nyale ra ’diyi yi ’di. 3Anyapa ma eselia, anyapa dria onyofi asipi asiri be, yi ma pa onyofini yi awazu iri iri, iribi ale amvipi ’diyi, emi eco yi nyazaru ra. 4Te ti, anyapa iribi ale amvipi ’diyi ma eselia, kani pa onyofi asipi asiri be ’diyi ma eselia, emini ecole nyale ku ’diyi yi ’di: Ngamiani alatara kokoru emi dri, a’disiku eri iribi ale amvi ra ’bo, te bani ovuni pa onyofi i asipi iririleri be ku. 5Azini vini ando ovu alatara kokoru emi dri, a’disiku eri iribi ma ale amvi ra, te bani ovuni pa onyofi i asipi iririleri be ku. 6#1 Tim 4:4, 5Etoni vini ovu alatara kokoru emi dri, a’disiku eri iribi ale amvi ra ’bo, te bani ovuni pa onyofi i asipi iririleri be ku. 7#Isa 65:4; 66:3, 17Azini ezoni vini alatara kokoru mi dri, a’disiku eri ovu pa asipi iririleri be, eri ma pa onyofi awa yi iri iri ra ’bo, te eri amvi bani iribi ale ku. 8#Isa 52:11; Mat 15:11, 20; Mar 7:2, 15, 18; ’Yeta 10:14, 15; 15:29; Rum 14:14, 17; 1 Kor 8:8; Kol 2:16, 21; Ebra 9:10Emi ma nya yi ma za ku, ma elo vini yi ma avu ku; yi ovu emi dri alatara kokoru.

9 # Azi 14:9, 10 Afa ovupi yia ’diyi ma eselia, emini ecole nyale ra ’diyi yi ’di. E’bi dria yia ovupi opile be azini ongoro’bo be ’diyi, emi eco nyazaru, ka ovu miri ma alia kani yi ara ma alia ti, 10#Lev 7:18; Azi 14:3Te afa dria miri ma alia, kani yi ara ma alia, ovupi opile kokoru azini ongoro’bo kokoru ’diyi, ka afa dria acipi yi ma alia’diyi ma azi, kani afa idriru yi ma alia ’diyi ma azi, yi ma ovu emi dri afa emi asini ngule onzi ’diyiru. 11Yi ma ovu afa emi asini ngule onzi ’diyiru ’dani; emi ma nya yi ma za ku, avu yini ma ovu emi dri afa emi asini ngule onziru indio 12Afa dria yi alia ovupi opile kokoru, azini ongoro’bo kokoru ’diyi ma ovu emi dri afa emi asini ngule onziriru. 13#Azi 14:12; Rum 14:1-23Aria ma eselia aria emi asini ngale ngule onzi ’diyi yi ’di, emi ma nya yi ku, yini ovule afa ngule onzi ’diyirisi: aji pi, iru pi, aji yia kubukubururi pi, 14yuku pi, idridria pie suruti yini vusi, 15koreke piyi suruti yini vusi, 16aria okondoruri pi, damanaka pi, yi aria pi, yuku pie suruti yini vusi. 17asikuu pi, aria e’bi nyapiri pi, elipidri pie, 18#Zab 102:6; Zef 2:14emaa pie, yiaria aroruaru pi, roke pie, 19kapia pi, otonoko pi suruti yini vusi, ebaaria pi, ’bi’bia pie. 20Afa opilebiko be acipi valesi pa susi ’diyi dria ovu emi dri afa emi asini ngule onzi ’diyiru. 21Te afa opilebiko be acipi valesi pa susi ’diyi ma eselia, emi eco afa pa kirica be pa yini ma drilia yini ani ombuzu nyakua ’diyi nyazaru. 22#Mat 3:4; Mar 1:6; Lip 6:5; Yer 46:23; Nah 3:17Afa yi ma eselia emini ecole nyale ’diyi yi ’di: ombi piyi suruti yini vusi, ombi koceru piyi suruti yini vusi, kulu piyi suruti yini vusi, ese pie suruti yini vusi. 23Te afa opilebiko be acipi valesi pa susi ’diyi ma azi dria ma ovu emi dri afa emi asini ngule onziriru.

24Emi nga eca alatara kokoru afa ’diyisi; ’ba dria alu alu yi ma azi ma alu ma avu elopiri nga ovu ani alatara kokoru cazu ondresi, 25#Lev 14:8; 15:5; Kal 19:10, 22; 31:24azini ’ba dria alu alu yi ma avu ma esele ngoni ngori jipiri ma oji bongo ini, ma ovu alatara kokoru cazu ondresi. 26Anyapa dria ovupi pa onyofi asipi asiri be, te ovupi pa onyofi i awapi iririleri be ku, iribi ma ale amvipi ku ’diyi ovu emi dri alatara kokoru; ’ba dria yi elopi ’diyi nga ovu ani alatara kokoru, 27Anyapa acipi pa susi ’diyi ma eselia, anyapa dria acipi yi ma pa agelesi ’diyi ovu emi dri alatara kokoru; ’ba dria alu alu yi ma azi ma alu ma avu elopiri ma ovu alatara kokoru kpere ondresi, 28azini ’ba yi ma avu jipiri ma oji bongo ini, ma ovu alatara kokoru cazu ondresi ’yi ovu emi dri alatara kokoru.

29 # Ebra 9:10; Isa 66:17 Te afa dria acipi valesi ’diyi ma eselia, afa ovupi emi dri alatara kokoru ’diyi yi ’di: obalako ndiliaruri pi, edro pi, olokoto ayira pie suruti yini vusi, 30#Zab 58:8; Isa 2:20anyariorio pi, manya pi, olotoko pi, mbilinziko pi, elekendre pie. 31Afa acipi valesi ’diyi ma eselia, afa ’diyi ovu emi dri alatara kokoru; yi ka dra ra ’ba dria alu alu yi ma avu elopi ’diyi nga ovu alatara kokoru cazu kpere ondresi. 32#Lev 15:12Yi ka dra ’bo, yi ma avu ka ’de afa azini ma dria, afa nderi ma ovu alatara kokoru, ka ovu afa edele patisiri, kani bongo, kani enyiriko, kani gunia, afazu ngoni ngori yani, ka adri azi ngoni ngori ’ye ti; ma su eri yi alia, eri ma ovu alatara kokoru kpere ondresi; ’di ma vutia eri nga ovu alaru ndo. 33#Lev 6:28Yi ma azi ka ’de imvu sile odrisiri ma alia, afa dria ovupi aleniari ma ovu alatara kokoru, mi nga vini imvu nderi agba ra. 34Nyaka alenia ’bani ecole nyaleri; kani yinini cazu ruaniari, ma ovu alatara kokoru; azini vini afa dria imvu ’dini ’di ma alia ’bani ecole mvuleri ma ovu alatara kokoru indi. 35Afa dria avu yini ma egelepi ngoni ngorini ’dezu driniari ma ovu ani alatara kokoru; ka ovu furuni, kani atiliku imvu ’bazu driniari ti, ma onyo eri teketeke; yi ovu alatara kokoru, azini yi nga ovu alatara kokoru emi dri. 36Te ti, yi a’di, kani ’bile gale yini egazuri ma ovu alaru; te afa avu yini elopiri ma ovu alatara kokoru. 37Te avu yini ma egelepi ngoni ngori ka ’de ori rizaru ’bani ngale rileri ma dria ti, eri ovu ini alaru; 38te yi ka yi da oriefi nderi ma dria erini oduzu ’bo, azini avu yini ma egelepi azini ka ’de drinia, eri ovu alatara kokoru emi dri.

39Te anyapa azini emini ecole zani nyaleri ka dra ra, ’ba avuni elopiri ma ovu alatara kokoru cazu ondresi, 40#Lev 17:5; 22:8; Azi 14:21; Eze 4:14; 44:31azini ’ba avuni ma za nyapiri ma oji bongo ini, ma ovu alatara kokoru cazu ondresi; vini indi ’ba avuni jipiri ma oji bongo ini, ma ovu alatara kokoru cazu ondresi. 41Afa acipi aci valesi nyakua ’diyi dria alu alu ovu afa ngule onzini; ma nya eri ku. 42Afa ngoni ngori acipi agatisi ’diyi pi, afa acipi pa susi ’diyi pie, afa pa be nzoru ’diyi pie, afa dria acipi ad valesi nyakua ’diyi pie, emi ma nya yi ku; a’disiku yi ovu afa ngule onzi ’diyi. 43#Lev 20:25Emi ma ’ba emi ngulupi afa ngule onziriru afa acipi aci valesi nyakua ’diyisi ku; emi ma eza emi alatara kokoru yisi ku, emi kazu ovuzu alatara kokoru yi ma e’yosi ku. 44#Lev 19:2; 1 Pet 1:15, 16; Isa 51:15; 43:3; Efu 19:6; 1 Tes 4:7A’disiku ma Yehova Mungu eminiri’i; emi ’ba ani emi ndu alatararu, emi ma ovu alatararu, mani ovule alatararurisi. Ka afa ngoni ngori ti, emi ma eza emi afa acipi aci valesi nyakua ’diyi ma azisi aluni ku. 45#E’do 35:1, 2; Efu 6:7; 20:2; Rum 14:17; 12:1; 1 Kor 6:11A’disiku ma Yehova emi ofupi ejipi angu Misiriariasi, mani ovuzu ani Mungu eminiriruri’i; emi ma ovu ani alatararu, mani ovule alatararurisi.

46’Diri azita anyapa piyi ma e’yosi, aria pie, afa idriru acipi yia ’diyi pie, afa acipi aci valesi nyakua ’diyi pieri’i, 47#Lev 10:10; Yer 15:19; Eze 22:26; 44:23afa alatara kokoruri pi ma esele cozu afa alaruri be, vini afa idriru ’bani ecole nyale rari pi ma esele cozu afa idriru ’bani ecole nyale kuri be.

Currently Selected:

'Ba Levini 11: LB66

Highlight

Copy

Compare