Yakoboni 4

Agyi nyakuni eri ari’ba Munguni

1 # Rum 7:23; 1 Pet 2:11 A’di enga ngoa, azini omba emi eseliari enga ngole ya? Engani ava ruani omba ’bapi emi rua ma esele ’diyi ma aliarisi ku ya? 2Emi li ’ba afasi ra, te emi ovuni afa nde be ku; emi ’ba fu ani. Emi ma’yala ’ba tu, te emi econi isuzaru ku; emi awa awa, emi omba ’ba ra. Te emi ovuni afa nde be ku, emini zita zile kurisi. 3Emi zi, te emi isuni afa ku a’disiku emini zile onzi, emini lezu ava ruani ’yezu anirisi. 4#Luk 6:26; Rum 8:7; 1 Yoh 2:15Emi oku awuouru ’diyi, emi nini kini agyi ’bazu nyaku beri eri ’ba ’ba ovuzu ari’baru Mungu be ku ya? Ka’dini ’ba azini ka le ovu agyi nyakuniru, agu nderi ’ba i ovuzu ari’ba Munguniru. 5#Efu 20:3, 5; Mat 6:24; Gal 5:17Kani emi ega emi asia e’yo e’yo, sizani ’yoleri ’yo toko ya, ’yozu kini, Orindi erini ’bale ovuzu ama aliari eri ovu ava be kpere a’ya ’bazu ama, e’yosi? 6#O’be 3:34; Yob 22:29; Mat 23:12; 1 Pet 5:5Te eri fe ’yeta anzutiri ’lama dri aga ra; e’yo ’disi e’yo siza kini, Munguni ’ba ovupi asi afu be ’diyi ma dri aru, te eri adri ’yeta anzutiri fe ’ba ovupi asi e’yeresi ’diyi ’dri. 7#Efe 6:12; 1 Pet 5:8, 9Awa’dini emi ma ovu inzitasi Mungu ma palaa; emi ma oga ’ba asu supiri, eri nga apa emi vurisi ani. 8#Zek 1:3; Isa 1:16Emi ma esi emi ogogo Mungu vu, Munguni nga ani i esi emi vu ogogo. Emi ma oji emi dri, emi ’ba ezapi ’diyi; emi ma ’ba emi asi alaru, emi ’ba ovupi asi iri be ’diyi. 9Emi ma inza emi, emi ma ota candisi, emi ma owu awu. Oguta emini ma oja i asi otazaru, ayiko emini ma oja i asi nzizaru. 10#1 Pet 5:6Emi ma ’ba emi va asi e’yeresi Opi ma milia, eri nga emi ’ba uru.

Adripi ma e’yo lizuri

11Emi ma ’yo emi agyi ma ru onzi emi eselia ku, adripi. ’Ba ka ii adri ma ru ’yo onzi, kani ka i adri ma e’yo li onzi, eri azita ma ru ’yo onzi, eri e’yo azitani li indi. Te mi ka e’yo azitani li, mi ovuni ’ba azita ’yepiri’i ku, te ’ba azita ma e’yo lipiri’i. 12#Mar 7:1; Rum 2:1; 14:4’Ba azita fepiri azini ’ba e’yo lipiri eri alu, ecopi ’ba papi azini ’ba dri japiri’i. Te mi’i, mi agyi mini ma e’yo lipiri, mi a’di’i ya?

Mi enya mi e’yo drurisi ku,

13 # O’be 27:1 Emi eri curu’do, emi ’ba e’yo ’yopi ’dini ’diyi, kini, Andru kani drusi ama nga mu aku amborua ’dale, ama nga ovu ’dale eli alu afa oziria orodri isuzu; 14#Luk 12:20; Zab 39:5, 11te di emi nini e’yo druni ’de ku dri emini a’dini ya? A’disiku emi afurusa i e’dapi etu were, vutinia afipi rari’i. 15#’Yeta 18:21Te le emi ma ’yo ’dini, Opi ka le ra ama nga ovu idriru, azini ama nga e’yo ’diri ’ye, kani ’dari. 16Te curu ’do emi emi enya afu eminirisi, Enyaza awa’dinile ’diyi dria onzi. 17#Luk 12:47; Rum 14:23Ka’dini ’ba ka ni e’yo onyiru ’yezu ra, te eri ka ’ye ku, e’yo ’diri ezataru eri dri.

Currently Selected:

Yakoboni 4: LB66

Highlight

Copy

Compare