Isaya 9
9
Osita Opi Asi Anzurunirini pi opi nyaza erini be
1 #
Mat 4:15; 2 Opi 15:29; 2 Sur 16:4; Lev 26:24; 1 Sur 5:26 Te angu biza nga ovu yo suru ndra ovupi candisiri dri. Andra drio eri fe drinza angu Zebulonini pi dri angu Nafutalini be ra, te o’du vilerisi eri ’ba eri dizaru geri miri tiarisi, Yoridania ’aa’dasi, Galili ’ba juruniri.
2 #
Isa 50:10; Yoh 8:12; Efe 5:8; Mat 4:16; Luk 1:79 Suru ndra acipi angu biza ma: alia’diyi ndre diza amboru ’bo; ’ba ndra ’a’api angu dra ma endrilendriaria’diyi, diza di yi ma dria ’bo.
3Mi fe suru nde ezu kakau ’bo, mi fe ayiko yini aga ra; yi ovu ayikosi mi milia ekile ayiko o’du anya lozurisirile, ekile ’bani ovule ayiko be yini afa opale ombaa ’diyi awariarile.
4 #
Lip 7:22; Zab 83:9; Isa 10:26 A’disiku mi nyo teri erini ma arofe, kulumbu eri ma ombeleari pie,kali ’ba eri inzapirini be, ekile o’du Midianisirile.
5Afa ombani ’ba omba ’dipi ’diyini sule omba ma alia ’diyi dria, bongo ’bani otrole arisi ’diyi be, yi nga yi ve acisi ejale.
6 #
Luk 2:11; Yoh 3:16; Mat 28:18; 1 Kor 15:25; Lip 13:18; Zab 45:3, 6; Yer 23:6; Yoh 1:1; Tit 2:13; Efe 2:14; Kol 1:20; Ebra 13:20 Te mva osi amani ’bo, fe agimva ama dri ’bo; dri cezani nga ovu eri ma ombetia, runi yi nga ’da Osuta’i, ’Ba e’yo Amapiri’i, Mungu okpo E’i’i, Ata ’Dani ’Daniri’i, Opi Asi Anzuruniri’i.
7 #
Dan 2:44; Luk 1:32-33 Dri ceza erini pi nga ovu ’dani eti cekokoru asi anzuru be, ogula Daudini ma dria azini suru erini ma dria, eri ’bazu okporu azini eri edrezu uru e’yo liza kililiruri pisi e’yo onyiru be engazu curu’do kpere ’dani ’dani. Ava Yehova asikari ongulumurunini nga e’yo ’diri ’ye ra. Adra Yehovani Israeli vuri
8Opi pe e’yo ma ti Yakoboa, eri esi Israeli ma dria ’bo;
9te ’ba dria nga e’yo ’diri ni ra, ’ba Efiraimuni ’diyi pi ’ba Samariaa ’diyi be, yi’i ’yopi afusi asi mbazasi ’diyi, kini:
10Biriki asu yi va, te ama nga jo si oni ’bani osile osi ’diyisi; ’ba oga pati elioru ’diyi va, te ama nga mario o’ba yi paria.
11E’yo ’disi Yehovani nga ari’ba Rezinini enga eri ma ruaa, azini eri nga ari’ba erini enga ra.
12’Ba Suriaa ’diyi yi nga ovu drile, ’ba Filisitiaa ’diyi nga ovu vile; yi nga Israelini nya ti walasi. Te ti, adra erini ojani nga i ku, te eri eju nga i ma dri ’dani.
13 #
Yer 5:3
Te ti, ’ba nde ojani nga yi ’ba yi copiri vu ku, yi ndani nga vini Yehova asikari ongulumuruni ku.
14E’yo ’disi Yehovani nga dri oli va sobi be Israeli ma eseliasi, o’du alu ma alia pati ituni ma arakala omi yiari be-
15’ba ’wara pi ’ba inzita beri be eri drini, azini nabi e’yo inzoru imbapiri eri sobini;
16a’disiku ’ba suru ’diri ma dri cepi ’diyi fe yi aba ra, te ’ba yini drini cele ’diyi ovu dri jazaru.
17E’yo ’disi Opi ngani ovu ayikosi karile yini ma e’yosi ku, eri ngani vini ovu yikisi ’ba yini atakokoru ’diyi vu awuzi yini be ku; te yi dria alu alu ’ba o’da, yi azi onzi ’ye, yi dria alu alu e’yo azazaru ’yo yi ma tisi. Te ti, adra erini ojani nga i ku, te eri eju nga i ma dri ’dani,
18A’disiku e’yo onzi ve acile, eri oci pi nya afa si be ocile ’dini ’diyi be; ada, eri ti ko pari pati be tu angu oceruri ma alia, eri tu uru acika iniru be.
19Adra Yehova asikari ongulumurunirinisi angu ve teketeke ’bo, ’ba nde indi yi ovu ekile acinirile; ’ba aluni ovupi asi ndriza be adripi vuni yo.
20 #
Lev 26:26
Te ’ba azini nga afa ari dri ndia, te ti, abirini eri fu, ’ba azini nga afa nya dri ejia, te ti, yi ti trani ku; yi dria alu alu nga kalanya yi ma ngulupi ma wuari nya’i,
21Manaseni nga Efiraimuni nya, te Efiraimuni nga Manaseni nya, te yi iri tro nga omba ’ba Yuda be. Te ti, adra erini ojani nga i ku, te eri eju nga i ma dri ’dani.
Bible in Lugbara © United Bible Societies, 1966.