Isaya 60
60
Diza Zionini ngale isule ewu vilerisiri
1 #
Mal 4:2
Mi enga, mi di di; diza minini ecale ’borisi, azini diza Yehovani efu mi dria ’bo.
2Te mi ndre, angu biza nga nyaku a’bu ci, azini ini asepi inideiruri nga suru ndu ndu a’bu ci;
te Yehovani nga enga mi dria, azini yi nga diza erini ndre mi ruaa.
3 #
Eceza 21:24
Suru jururu ’diyi nga emu diza mini vu, azini opi yi nga emu efuza mini ma diza vu.
4Mi enga mi mile, mi ndre angu mi ageiari; yi dria oku yi tualu, yi emu mi vu; anzi mini nga emu engazu ziri, azini yi nga mi ezopi ’du yi ma wua.
5Etu ’dasi mi di nga ndre, mi nga ovu ani diza be, asi mini nga oya, eri nga ovu walaru;
afa kakau miri ma alia ’diyini ngale i ojale mi vu, azini ’ba suru ndu ndu ’diyi ma lonyini ngale emule mi vurisi.
6 #
E’do 25:4; Zab 72:10; Mat 2:11 Ngamia o’biru nga mi a’bu ci, ngamia ’ba Midiania ’diyi pini ’ba Efaa ’diyi be; yi dria nga enga Sebaasi.
Yi nga di mele pi eji ajinguru be, yi nga ’yeta inzitaru Yehovani ma e’yo e’da’i.
7 #
E’do 25:13; Hag 2:7-9 Kabilo o’biru Kedaria ’diyi dria nga yi oku mi vu, kabiloago Nebayotia ’diyi nga azi nga mi dri;
yi nga tu pari mani edeta edezuri ma dria, ma nga yi a’i ra, ma nga diza mani ma jo ’ba dizaru.
8’Ba sapi iritile azini ekile a’balaule derisa yini vu ’diyi, yi a’dipi ya?
9 #
Gal 4:26; Zek 14:14; Yer 3:17; Isa 55:5 Ada, angu miri tia ’diyi nga ma te ra, oguru Tarisisia ’diyi nga ma te okonini, agianzi mini ejizu engazu ziri, dahabu yini pie mele yini be tualu,
Yehova Mungu mini ma rusi, Mungu Alatararu Israeliniri ma e’yosi, erini diza fele mi dri ’borisi.
10 #
Zek 6:15; Eceza 21:24 ’Ba emuza ’diyi nga di abi mini si uru, opi yini nga vini azi nga mi dri; a’disiku ma co mi aoko mani ma alia, te asi ndriza manisi ma ’ba yiki mi vu ’bo.
11 #
Eceza 21:25-26
Kalitile mini nga ovu zizaru walaru’dani; ’ba ngani yi opi etusi kani inisi ku;
’ba ma ofi lonyi suru ndu nduni mi alia ani, opi yini ’bani dri cele mi ve ’diyi pie.
12 #
Zab 2:12; Zek 14:17; Mat 21:44; Luk 19:27; Eceza 2:26, 27 A’disiku suru pi angu opini nvaleri be lepi azi ngapi mi dri kuri nga dri ja ra; ada, suru ’diyi nga ovu ezazaru teketeke ra.
13 #
Isa 35:2; 1 Sur 28:2; Ebra 12:22 Diza Lebanonini nga eca mi vu, pati izuru pi, pati asarau pie, tualu pati masaruri be, pari alatararu mani ovuzu aleniari ’bazu ndrizaru ani; azini ma nga pari mani ma pa ’bazuri ’ba dizaru.
14 #
Eceza 3:9; 14:1 Te ’ba ndra mi inzapi ’diyi ma anzi nga emu avuzu va mi vu; ’ba ndra mi ’bapi aparakaru ’diyi! dria nga avu va mi palaa;
te yi nga mi ru ’da, Aku Yehovaniri’i, Zioni Mungu Alatararu Israeliniri vileri’i.
15Isu ndra ku mi toko, ngu ndra mi onzi, ’dini ’ba agani geri mi ma aliarisi ku ani,
te curu’do ma nga mi ’ba ovuzu onyiru tu ’dani, ovuzu a’bianzi vile kakau ’diyi dri ayikoru.
16 #
Zab 98:2; Isa 43:3; Eze 34:30; Eceza 5:9 Mi nga suru ndu ndu ma basu ndru, mi nga vini ’ba opiru ’diyi ma ba ndru;
azini mi nga ni kini ma’i, Yehova, ma ’Ba mi Papiri, mi Onzepiri’i, Mungu Okpo be tu Yakoboniri’i.
17Mola paria ma nga mele eji’i, aya paria ma nga dahabu eji’i; te pati ma paria, mola’i, oni ma paria, aya’i.
Ma nga vini ’ba mi dri cepi ’diyi ma asi ’ba anzuru azini ma nga ’ba mi omipi afa fezasi ’diyi ma asi ’ba onyiru.
18 #
Isa 26:1
Yi ngani vini ’ba fuza ari beri ma e’yo eri dika ku angu mini ma alia, yi ngani vini ezaza ’bani aku ezazuri pi ma e’yo eri kala mini ’diyia dri jata be ku;
te mi nga abi mini ma ru ’da, Pata’i, azini kalitile mini mi nga runi ’da, Inzita’i.
19 #
Zek 2:5; Eceza 21:23; 22:5 Etu ngani ovu diza miniru etusi dika ku mba ngani fe angu ma mve mi drini dika ku;
te Yehovani nga ovu mi dri diza i depi kuriruni, Mungu mini nga ovu diza mini.
20 #
Amo 8:9
Etu mini ngani ’de dika ku, mba mini ngani vini ’de dika ku indi;
Yehovani ngale ovule diza mini ’dani ’danirisi, azini o’du mini ovuzu caridisi ’diyi nga asi ra.
21 #
Zab 37:11; Efe 2:10; Mat 5:5; 15:13 ’Ba mini dria alu alu nga ovu onyiru; yi nga angu nya awitaru ’dani ’dani, yi ovu arakala mani isileri, azi ma drini ’yele mani ngazu diza isuzu aniri.
22 #
Mat 13:31; Hos 1:10 ’Ba wereru nga ezu ’ba alifu aluru, ’ba werearuri nga ovu suru okporu;
ma’i Yehova, ma nga e’yo ’diri ’ye mbele ewu erini ka nga eca raria.
Bible in Lugbara © United Bible Societies, 1966.