Isaya 6
6
E’yo ndreza Isayani omveta erini be
1 #
1 Opi 22:19; Eze 10:1; Yoh 12:41; Eceza 4:2; 2 Opi 15:7; 2 Sur 26:23 Eli opi Uziani drazurisi ma ndre Opi erini riria oguna dria, uruleru azini ’ba i uru tu; te diza eri ma ageiari ga hekalua tre. 2’Ba serafini so pa eri ma drilesi uru; yi alu alu ovu opile be azia azia: opile irisi yi a’bu yi ma mile, opile irisi yi a’bu yi ma pa, te opile irisi yi sa uru. 3#Eceza 4:8Te serafi yi nga oyu uru yi agyi vu, nga ’yo ra: Alatararu, alatararu, alatararu, Yehova asikari ongulumuruni eri alatararu; nyaku dria ga tre diza erinirisi. 4#Eceza 15:8Te jobile ma eti okporu ’diyi oya yi ’ba ’yopiri ma o’dukosi, azini jo ga tre acikasi. 5Te ma nga di ’yo ra, Candi ma dri! E’yoni ma ndelerisi; mani ovule ’ba tile onzikanyaru berisi, azini mani adrile ’ba tile onzikanyaru be ’diyi ma eseliarisi; a’disiku ma ndre Opi amboro, Yehova asikari ongulumuruni, ma milesi ’bo
6 #
Lev 16:12; Ebra 13:10 Serafi alu nga di esa ma vu, eri ma dria aciolu indi, erini e’dule akpasi engazu pari edeta edezuria. 7Eri elo ma tile aciolu ndesi, nga di ’yo ma tia kini, Mi ndre, afa ’diri elo mi tile ’bo; te e’yo onzi mini ovu nzezaru ’bo, ezata mini ovu wuzaru indi. 8#E’do 1:26Azini ma eri o’duko Opini ’yozu kini, Ma nga a’di ma ti pe ya, azini a’dini nga mu ama drini ya? Ma nga di ’yo tinia, Ma ’do! Mi pe ma ti’i fo! 9#Mat 13:14-15; Mar 4:12; Luk 8:10; Yoh 12:40; ’Yeta 28:26-27Te eri ’yo ra, Mi mu, mi olu suru ’diri ma tia: Erizaruni, emi ma eri ra ada, te emi va ku; nezaruni, emi ma ne ada, te emi ama afa kilili ku.
10Mi ’ba suru ’diri ma asi osoru, mi ’ba yi ma bile dirinyaru, mi opi yi ma mile indi; yi kazu ndrezu yi ma milesi ku, yi kazu erizu yi ma bilesi ku, yi kazu e’yo vazu yi ma asisi ku, yi kazu yi ojazu dika yi ma ovu atizaru ani ku.
11Ma nga di ’yo ani, Opi, o’du ngopi ya? Te eri omvi e’yoni: De nga aku ovuni ezazaru andruru ’ba ovupi alenia ’diyi kokoru ku, de nga jo ovuni ’ba kokoru ku, de nga vini angu ovuni ezazaru teketeke ku,
12 #
Azi 28:64
de nga Yehova jini ’ba nde ’diyi ziri ku, azini pari ’bani kule ’bo ’diyi ovuni karakarau angu ma alia ku.
13 #
Rum 11:5
Te esele mudri ma azi aluri ka ace nga eri ma alia, acini nga eri eve dika, ekile pati masani kani kumarani, yi ma olani adrile indi ’bani yi gazu ’boriarile. ’Dinile indi ori alatararuri ovu ola erini,
Bible in Lugbara © United Bible Societies, 1966.