Isaya 58
58
Nyaka ’dazu geri kililirurisi
1Emi oyu uru, emi ma ku ku, emi enga emi o’duko uru gukale; emi olu suru mani ma tia ezata yini ma e’yo, emi olu e’yo onzi yini ma e’yo ori’ba Yakoboni ma tia.
2Te ti, yi ma nda o’du vusi o’du vusi, yi ovu ayikosi geri mani nizu; ekile suru onyi ’yepirile, ekile suru Mungu yini ma azita avipi kurile, yi nda azita kililiru ma vu, yi ovu ayikosi esizu Mungu vu ogogo.
3 #
Mal 3:14
Yi ’yo ra, Ama ’da nyaka ra, te mi ndreni ku a’di e’yosi ya?
Ama inza orindi amani ra, te mi nini e’yoni ku a’di e’yosi ya? Mi ndre, o’du emini nyaka ’dazurisi, emi isu ayiko emini, emi omi ’ba azi emini ngapi ’diyi dria okposi.
4Emi ndre, emi nyaka ’da e’yo agata gaza pinisi awata be, emini ’ba sizu dri otuza e’yo onzinirisi.
Emi ’dani nyaka andre ’dini emi o’duko ma ovu di erizaru ’bua ani, ’dinini ku.
5 #
Zek 7:5
Nyaka ’daza mani pele ’bori eri ’dini ra ya? O’du ’bani i ma orindi inzazuri eri ’dini ya?
Yini yi dri eluzu va ekile omi yiarile, yini koliba ajazu yi ma etia of uta beri ya?
Emi nga e’yo ’diri omve nyaka ’dazani ya? Emi nga eri omve o’du Yehovani a’le rari’i ya?
6Nyaka ’daza mani pele ’bori ovuni ’dinile ku ya: ’bani afa ombeza e’yo onzini ’diyi otruzu, afa ombeza kulumbuniri ayuzu, ’ba ’bani inzale ’diyi otruzu, kulumbu dria onyozu?
7 #
Mat 25:34; Zab 112:9; O’be 22:9; Ekl 11:1, 2; Dan 4:27; Luk 11:41; E’do 29:14; Neh 5:5; Mat 15:5 Nyaka ’daza adaruri ovuni mini enya mini awazu ’ba abiri be ’diyi ma eselia, emini ’ba alioru ’bani drole amve ’diyi ejizu mi vile joari ku ya?
Mi ka ’ba rua be pililiruri ndre, mi ma su afa eri ma ruaa ci, azini mi ma zi mi ’ba rua be mile ’diyisi ku?
8Ka’dinile etu ’dasi diza mini nga di di ekile o’bitile, rua atiza mini nga efu mbeleru tu; onyi mini nga mu mi drilia, diza Yehovaniri nga ovu mi ngukualeru.
9Etu ’dasi mi nga eri omve, azini Yehovani nga e’yo omvi ani; mi nga wu, te eri nga di ’yo, Ma’do’i.
Mi ka kulumbu nze mi eseliarisi amve, azini mi ka eceta e’yo onzini ecezu drilejosiri nze, e’yo onzi ’yoza be dria,
10 #
Yob 11:17
mi ka afa mi asini leleri fe yikisi ’ba abiri be ’diyi dri, mi ka fe ’ba ’bani inzaleri ma tra ra, ka’dini diza miniri nga di ini ma alia, angu biza miniri nga ovu ekile etu dipi etu agaduarile.
11Azini Yehovani nga mi dri ce etuzu, eri nga fe orindi mini ma tra angu a’wiru ma alia, eri nga fala mini fe mba okporu;
mi di nga ovu ekile amvu anzulerurile, ekile yi a’di yinini nzuzu kurile.
12Azini ’ba engapi mi eselia ’diyi nga pari oku drio andruru ’diyi si dika;
mi nga jo si dika jo ndu a’bianzi kakauni sile drio ’diyi ma dria; ’ba nga mi ru ’da,
’Ba pari asupi vari edepiri’i, ’Ba geri ’bani adrizu alenia ’diyi ofapi dikari.
E’yo sabato inzizuri
13 #
Lev 19:30; Isa 56:2; Mat 12:36 Mi ka mi pa oja kalaa e’yo sabatonirisi, ’dini mi ma ku ’yezu mini lelerile o’du alatararu manirisi la,
mi ka sabato omve o’du ayikoni, mi ka o’du alatararu Yehovani omve o’du inzita beri’i;
mi ka eri inzi, geri mi ngulupini ’diyi ’yezu ku, kani ayiko mi ngulupini isuzu ku, e’yo toko ’yozu ku indi;
14 #
Yob 22:26; Azi 32:13; Isa 1:20; Mik 4:4; Mat 24:3-5 ka’dinile mi di nga ovu mini ayikosi Yehova ma alia, azini ma nga fe mi ma tu uru angu nyakuni uruleru ’diyi ma alia;
te ma nga fe mi ma nya mi a’bi Yakobo ma awita, Yehovani e’yo ’diri ’yole i ma tisirisi.
Bible in Lugbara © United Bible Societies, 1966.