Isaya 48
48
Egazu Israeli ma dria yini ovule asi adaru be kurisi
1 #
Azi 6:13; Yer 7:9; Zef 1:5 Emi eri e’yo ’diri, emi ori’ba Yakoboni, ’bani omvele ru Israelinisi, efupi yi Yudaniriari la! Emi so oyo ru Yehovanisi, emi Mungu Israelini ma e’yo olu, te emi ’yeni e’yo adarusi ku, ’yeni vini onyisi ku.
2 #
Mik 3:11; Rum 2:17 A’disiku yi ’da yi ma ru kini yi ’ba aku alatararuria ’diyi’i, yi ati yi Mungu Israelini ma ruaa; runi Yehova asikari ongulumuruniri’i.
3 #
Yos 21:45
Ma olu e’yo oko ’diyi engazu drio ’bo, ada, yi efu ma tilia, ma ece yi ’bo; ma ’ye yi mbelekocici, yi ’ye yi ’dinile.
4 #
Efu 32:9; Azi 31:27 Te ma ni mi asi mba tu, mi ombele te ekile onde isu ayarurile, mi andreti ekile molale,
5e’yo ’disi ma olu mi tia engazu drio ’bu, de nga ’yeni yi ku ma ece e’yo nde mi dri, mi kazu ’yozu ku, Wura onzi mani ’ye afa ’diyini, wura mani pale patisiri, wura edele ayasiri be, yi azi e’yo ’dini.
6Mi eri eri ’bo; mi lu afa ’diyi dria; azini emi’i, emi ngani e’yoniri olu ku ya? Ma ece mi dri e’yo o’diru engazu o’du’disi, ada, ma ece afa zizaru mini nile nga ku ’diyi.
7Yi ovu ’bazaru cucuru’do, yi ovuni drio ku; te kpere andru mi erini nga e’yo ’diyi ku, mi kazu ’yozu ku, Mi ndre, ma ni e’yo ’diyi drio,
8 #
Zab 58:3
Ada, mi erini nga ku; ada, mi nini nga ku; ada, engazu drio mi bile zini nga yi ku.
A’disiku ma ni ra kini mi adri ’ba dri ici tu, azini ’ba omve mi ’ba mbupi amveriru engazu mi andri ma opoa.
9 #
Yos 7:9; Zab 106:8 Te ru mani ma e’yosi, ma nga fe aoko mani ma te, inzita mani ma e’yosi ma ngani mi ’ye ku, ma ngani ani mi idri eli agaa ku.
10 #
Zab 66:10; Isa 1:25; Mal 3:3 Mi ndre, ma o’bi mi, ma ’ba mi alaru ’bo, te ekile dahabule ku; ma o’bi mi aci inzataniri ma alia ’bo.
11 #
Azi 32:26; Isa 42:8 Ma nga ’ye ’dinile ma ngulupi ma e’yosi, ada ma ngulupi ma e’yosi. Te eza ma ru ’doni ya? Te ma ngani diza mani fe ’ba azini dri ku.
12 #
Azi 32:39; Isa 44:6; Eceza 1:17; 22:13 Emi co bile ma vu, Yakobo la, azini Israeli mani omveleri la! Ma okori’i, ma vileri’i, ma ’do’i.
13 #
Zab 102:25
Ada, ma dri ’ba ndra nyaku ma votini, ma dri ndiri aja ndra ’buni; ma ka yi omve, yi so pa tualu.
14Emi oku emi, emi dria, emi eri e’yoni! Yi ma eselia a’di ece e’yo ’diyi ’bonini ya? Yehova le eri ra; eri nga e’yo eri asini leleri ’ye Babuloni ma ruaa, dri erini nga ovu ’ba Kalideyaa ’diyi ma dria.
15Ma’i, ma ma ngulupi ’yo e’yo ’bo, ada, ma omve eri ra, ma eji eri ra, eri nga ani i ma geri ’ba drilebaru.
16 #
Zek 2:8, 9 Emi esi ma vu ogogo, emi eri e’yo ’diri! engazu anguni e’doria ma oluni e’yo oyokolosi ku, engazu o’du erini ovuzu indirisi isu de ma ci. Azini curu’do Opi Yehova pe ma ti Orindi erini be.
17 #
Zab 32:8
Yehova mi Onzepiri ’yo ’dini, Mungu Alatararu Israeliniri: Ma Yehova Mungu mini, ma imba mi e’yo ovupi mi dri orodrirurisi, ma ce mi dri geri mani lele mi ma ad aleniarisi indio
18 #
Azi 5:29; Zab 81:13 Mi ka ndra azita mani eri ra, ’yeke Te’do asi anzuru mini ovu ekile yi razale, onyi mini ovu ekile yi mirini mbupi mburile ’bo;
19 #
E’do 22:17; Hos 1:10 te’do ori mini ovu ekile cinyale ’bo, efi ’yaza rua minini ovu kakau ekile okparafile; te’do eri ma ru avini ma miliasi ku, ’ba jani ru nderi ma dri ma miliasi ku.
20 #
Zek 2:6, 7; Efu 19:4; Eceza 18:4 Emi fu Babuloniasi, emi apa ’ba Kalideyaa ’diyi ma drilia, emi ece e’yo ’diri o’duko ongo ngozanisi, emi olu e’yoni, emi eku e’yo ’diri kpere angu tini asiria;
emi ’yo, Yehova onze ati’bo ini Yakoboni ’bo!
21 #
Kal 20:11; Neh 9:15; Zab 105:41; Isa 48:21; 1 Kor 10:4 Eri ka ndra yi ma dri ce geri angu roko driari ma aliasi, yi avijo funi ndra yi ku; eri fe yi ma era yi dri engazu kata ruaa; eri asi kata ra, yi efu ani okposi ra.
22 #
Isa 57:21
Yehova ’yo ’dini: Asi anzuru ’ba azi onzi ’yepi ’diyi dri yo.
Bible in Lugbara © United Bible Societies, 1966.