Isaya 40
40
E’yo Yehovani ’yole Zioni ma asi omizuri
1Emi omi suru mani ma asi emi omi yi ma asi, Mungu emini ’yo ra.
2Emi ’yo Yerusalemu ma tia asi omizasi, emi oyu eri vu kini, omba erini de i ’bo, wu e’yo onzi erini ’bo, Yehova ofe ofeza eri dri akpakparu iri ezata erini dria vusi.
3 #
Mal 3:1; Luk 1:76; Mat 3:3; Mar 1:3; Yoh 1:23 O’duko ’ba alu e’yo oyupi ururini, kini: Emi ede geri Yehovani angu roko driari ma alia, emi ofa gboko kilili angu didia Mungu amaniri dri.
4Yi nga e’bu alu alu e’dulu uru dria, nga oni amboru alu alu oni were ’diyi be dria ma dri iri ele; yi nga angu goligoliru ede kililiru, nga angu otukoturu ede seresere.
5 #
Efu 16:7; Zab 72:19; Eze 36:23; Luk 2:10 Azini diza Yehovani nga di i e’da ra, ’ba rua ari be ’diyi nga eri ndre dria tualu ani, Yehova ma tileni e’yo ’diri ’yolerisi.
6 #
Yak 1:10-11; 1 Pet 1:24-25 O’duko ’ba aluni ’yozu kini, Mi oyu uru! Te ’ba azini ’yo ra, Ma nga di oyu ngoni ya? ’Ba rua ari be ’diyi dria ovu asele, azini onyi yini dria ovu ekile patifu asearile.
7Ase onyu ra, funi lu ra, ava Yehovani vule eri ma driarisi; ’ba ovu asele ada.
8Ase onyu ra, funi lu ra; te Mungu amani ma e’yoni nga ovu ’dani ’dani.
9Mi’i e’yo bari olupi Zioni ma tiari, mi tu oni izuri ma dria; mi e’yo bari olupi Yerusalemu ma tiari la, mi enga mi o’duko okposi, mi enga eri uru, mi ovu urisi ku; mi ’yo aku amboru Yudaa ’diyi ma tia, Emi ndre Mungu emini!
10 #
Isa 62:11; Eceza 22:12 Emi ndre, Opi Yehovani nga emu okpo be tu, te wu erini nga ’ba dri ce i dri; emi ndre, orodri erini ovu eri be, azini arioti ofeza erini ovu eri ma drilia.
11 #
Eze 34:15, 23; Isa 49:10; Ebra 13:20; 1 Pet 2:25; Eceza 7:17; Yoh 10:11 Eri nga nyaka fe kabilo ini o’biru ’diyi dri ekile ’ba kabilo ocepirile, eri nga kabiloanzi o’du i wua, eri nga yi amvu i agatia, eri nga kabilo andrepi lesu fepi ’diyi ma dri ce e’yere.
Mungu Israeliniri ma onyi ndenini
12A’di o’bi yi mirini i ma driega alusi ranini ya? a’di o’bi angu ’buari ma walani i dri alesini ya? A’di o’bi irifura nyakuari afazu afa o’bizurisini ya? Azini vini a’di o’bi oni amboru ’diyi ma nziza aya afa o’bizurisi, azini oni were ’diyi afa nziza ecepirisini ya?
13 #
Rum 11:34; 1 Kor 2:16 A’di ce Orindi Yehovaniri ma dri, kani a’di ama e’yo eri dri eri imbazuni ya?
14Eri zi e’yo amaza a’di vu ya? A’di imba eri, imba eri geri e’yo lizu kililiruni ya? A’di imba eri nitani onizu, azini a’di ece eri dri geri e’yo vazanirini ya?
15Mi ndre, suru ndu ndu yi ovu ekile yi tiza alu awala ma aliarile, la yi ekile irifura were ’bani ecole o’bile kurile; mi ndre, eri angu i lipi miri ma alia ’diyi 0’du ekile afa gakandiarurile.
16Te Lebanoni funi dri ejaru afa vezasi ku, anyapa eri ma ageia ’diyi cani vini edeta vezani ku indi.
17Suru dria ovu eri ma milia afa tokole, eri ma milia yi ovu afa toko, afa ovupi yorile.
18 #
’Yeta 17:29
Emi nga di Mungu o’bi a’dile ka ya? Emi nga eri o’bi wura ngori be ya?
19Wura siri’baru edele ayasiri! ’Ba azi ngapiri ede ndrani aya akapi acisirisi, onduou e’bura mele eri ma ruaani, eri ede anziriku dahabuni eri dri dahabu akapi acisirisi.
20 #
Yer 10:4
’Ba alioni ndele tu, ecopi afa feza ’dinileri ejizaru kuri pe i dri pati mapi kuri; eri nda ini ’ba azi ngapi onduasiri, eri ma ede wura siri’baru ’bani ngale ojale kuri ani.
21 #
Zab 19:1; ’Yeta 14:17; Rum 1:19 Emi nini ku ya? Emi erini ku ya? ’Ba eceni emi dri drio engazu ndra okorisi ku ya? Emi vani e’yo engazu o’du nyaku ma eti ’bazurisi ku ya?
22 #
E’do 1:1, 6; Yob 9:8; Zab 104:2; Yer 10:12 Eri ripi angu wari driari, ’ba adripi alenia ’diyi ovu eri ma milia ekile kulule; eri aja ndra ’bu ekile bongo ajazarurile, eri aja eri ekile hema ’bani adrizu aleniarile;
23 #
Yob 12:21
eri’i, eri oja opianzi ovuzu tokoru, eri oja ’ba e’yo lipi nyakua ’diyi ovuzu afa yoru.
24Ada, ’ba sani nga yi sa sa ku, ada ’ba rini yi ri ri nyakua ku, ada pati yini soni ola nyakua ku, eri vu ava yi ma dria, yi onyu ra, oliriko ’du yi ekile anyadrilekole.
25 #
Azi 4:15; Isa 40:18; ’Yeta 17:24-29 Emi nga di ma o’bi a’di be, ma ma ovu ani erile trotro beni ya? Mungu Alatararuri ’yoni.
26 #
Zab 147:4
Emi enga di emi ma mile uru, emi ndre: a’di ’ba afa ’diyini ya? Eri’i afa ’diyi ofupi o’biru kalafe yini vusi alu aluri’i. Eri omve yi dria ru yinisi; okpo erini amborurisi, azini erini ovule okpo be turisi, alu avini yi ma eselia ku.
27Yakobo la, mi olu e’yo, Israeli la, mi ’yo kini, Geri mani ovu zizaru Yehova dri, e’yo liza kililiru ma driari avi Mungu mani ma miliarisi, ’dini a’disi ya?
28 #
Zab 147:5; Rum 11:33 Mi nini ku ya? Mi erini ku ya? Mungu ’dani ’daniri, Yehova, Mungu angu ma kala ziri turi ’Bapiri ma okpo funi ku, eri andeni vini ku, ’ba econi e’yo vaza erini ndruzaru ku.
29Eri fe okpo ’ba andepi kairi dri, azini ’ba okpo kokoruri dri eri ere okpo o’diru.
30Ka tro karile ti yi ma ruani nga aka andesi, yi nga ande ra, azini ’ba o’di ’diyi nga o’de va andesi kai kai;
31 #
Yob 17:9; Zab 25:3; Isa 8:17; Imv 3:25; 2 Kor 4:8-10, 16 te ’ba Yehova tepi ’diyi yi nga okpo isu o’diru, yi nga sa uru opilesi ekile ajile, yi nga nzu ra, te yi ngani ande ku, yi nga aci ra, re yi ma rua ngani aka andesi ku.
Bible in Lugbara © United Bible Societies, 1966.