Isaya 26
26
Ongo a’ita ’bale agei teza Yehovani ma aliari ma e’yo ecezu
1O’du ’dasi ’ba nga ongo ’diri ngo angu Yudani ma alia: Ama ovu aku be okporu; eri nga pata ’ba eri dri abi pi paria kali be.
2 #
Zab 118:19; Isa 60:11; Eceza 21:13, 24-27 Emi zi kalitile, suru onyiru e’yo adaru ma ta mbapiri ma fi ani.
3Mi nga ’ba i ma asisile atipi mi ma ta mba ovuzu asi anzurusi ’dani, erini mi a’ilerisi.
4Emi ’ba a’ita Yehova ma alia ’dani, a’disiku Yah Yehova ma alia kata okporu ovupi ’daniri indio
5Erini ’ba adripi uru yi ma akuni ovuzu oni dria ’diyi odrole varisi. Eri ’be eri va, eri asu eri va kpere nyakua, eri ere eri kpere irifura ma alia.
6’Ba nga eri tu va pasi, adaru ’ba alioru ’diyi ma pa, ’ba afa kokoru ’diyi ma pani nga eri otuni.
7 #
Azi 32:4
Geri ’ba kililirurini ovu e’yo kilili; mi’i ovupi kililiruri, mi adri ’ba kililiru ’diyi ma dri ceni.
8 #
Zab 18:22; Isa 64:5; Mal 4:4; Luk 1:6 Adaru, Yehova la, ama te mi geri e’yo liza miniria; orindi amani lu ru mini vu avasi, e’yo nde mini fele ama dri egataruri vu indi,
9 #
Zab 63:6; 83:16; Ong 3:1; Luk 6:12 Ma le mi tu inisi, orindi manisi ra, ada ma nga mi nda o’biti drio drio orindi mani ovupi ma aliarisi. A’disiku e’yo liza mini ’diyi ka ovu nyakua, ’ba ovupi angu wudrikuru ma alia ’diyi, yi e’yo onyini oni ra,
10 #
Ekl 8:12; Rum 2:4; Zab 143:10 Ka asi ndriza ece ’ba azi onzi ’yepiri vu ti, eri ngani onyi oni ku; ka tro eri angu e’yo kililirunia ti, eri nga azi onzi ’ye, eri ngani diza Yehovani ndre ku.
11 #
Yob 34:27; Ebra 10:27 Yehova, mi enga mi dri uru ’bo, te ti, yi ndreni ku. Te yi nga ava mini ’ba mini vuri ndre ra, drinzani nga yi bi ani. Ada, acini nga ari’ba mini ove ra.
12Yehova, mi nga asi anzuru azi ama dri, a’disiku mi ’ye ’yeta amani dria ama dri ’bo.
13 #
Zab 66:12
Yehova Mungu amani la, mi’i a’dule ku te opi azini yi adri ndra ama drilia opiru ra, te kiri misi a’dule ama nga ru mini ma e’yo olu’i.
14Yi’i yi odra yini ’bo, yi ngani di ovu idriru ku; yi odra ’bo, te yi ngani enga ku; e’yo ’disi mi andri yi ’bo, mi ja yi dri ’bo, mi fe egata yini dria ma avi ra.
15Mi fe suru ezu ’bo, Yehova la, mi fe suru ezu ’bo; mi ’ba mi dizaru ’bo; mi ere angu ma kalati dria ma ovu walaru aga.
16 #
2 Sur 33:12; Hos 5:15 Yehova, yi mu mi nda o’du yini ovuzu candisirisi, yi zi zita yini asi driasi o’du cota minini ovuzu yi ma ruaarisi.
17Ekile oku oporovuru o’du erini mva osizuri ka ’ye eca ogogo, erini ovule rua suza be, erini wule rua suza erinisirile, ama ovu ndra ’dinile mi milia, Yehova;
18 #
Zab 17:14
ama ovu ndra oporovuru, ama ovu ndra rua suza be, te afa ndra amani osileri eri olini. Ama ’yeni pata azini nyakua ku, ’ba adripi angu wudrikurua ’diyi e’deni vini va ku.
19 #
Isa 25:8; Hos 13:14; Yoh 5:28, 29; Dan 12:2 ’Ba mini drapi ’bo ’diyi nga adri idriru, avu mani ’diyi nga enga ra. Emi enga ongo ngo, emi ovupi irifuraa ’diyi! Andrali minini ovule andrali ebikobi ma driarilerisi, azini nyakuni nga ’ba drapi ’bo ’diyi ofu amve.
20 #
E’do 7:1; Zab 30:5; 2 Kor 4:17 Emi emu, suru mani, emi fi jo eminia, emi opi jotile emini ci; emi zi emi etu were de nga asi veza agani ku.
21 #
Mik 1:3; Yud 1:14 A’disiku, mi ndre, Yehovani nga efu pari erinia panga fezu ’ba ovupi nyakua ’diyi dri e’yo onzi yinisi, nyakuni ,indi nga ari erini ece, eri ngani ’ba erini ofule ’diyi a’bu dika ku.
Bible in Lugbara © United Bible Societies, 1966.