Isaya 2
2
Yehovani opi nyazu ’ba dria ma drilia asi anzuru ma alia
1E’yo Isaya Amosi mvini ndrele e’yo Yuda pini Yerusalemu berisiri.
2 #
Mik 4:1; ’Yeta 2:17; Dan 2:35; Eceza 14:1 Eri nga eca o’du vilerisi ’dini, oni jo Yehova vileriniri ’ba nga ede amboru oni azini ma dria uru, eri nga ovu uru oni azini agazu; azini suru dria nga ra eri vu.
3 #
Zek 8:21; Luk 24:47 ’Ba kakau nga mu ’yo ’dini: Emi emu, ama ma tu uru oni Yehovani dria, Mungu Yakoboniri ma joa; eri nga ama imba geri erini nizu, ama nga ad leti erini ma alia. A’disiku azitani nga efu Zioni ma alia, e’yo Yehovani nga efu Yerusalemua indi.
4 #
Yoe 3:10; Mik 4:3; Yoh 5:22; Hos 2:18 Eri nga e’yo li suru ndu ndu ma eselia, eri nga e’yo ama ’ba karakarau dri; yi nga sei yini di e’buru, aju yini yi nga oja nguleru; suru alu ngani sei enga a’di ’dizu suru azini be dika ku, yi ngani vini omba ma e’yo oni dika ku.
E’yo Yehovani lile ’ba afuru ’diyi ma driari
5 #
’Yeta 26:23
Emi’i, jo Yakoboni, emi emu, ama ma ad diza Yehovani ma alia.
6 #
Azi 18:14
Mini suru mini kulerisi, ori’ba Yakoboni, yini gale tre adriza woko etuni efuzuriarisi, yini andri ndrile ekile ’ba Filistia ’diyilerisi, azini yini ti ecile anzi ’ba juruni berisi.
7Angu yini ga tre dahabu pisi mele be, te lonyi yini ovu kakau asikokoru; angu yini ga tre vini akanyasi, te gari ombani yini ’diyi ovu kakau asikokoru.
8Angu yini vini ga tre wura toko inzile inzi ’diyisi; yi inzi wura yini edele yi ma ngulupi ma drisi ’diyi’i, yi ma drianzini edele ’diyi.
9’Ba tokoni ’diyi ’ba yi ele, ’ba amboru ’diyi oja yi ’ba werele vae’yo ’disi mi ma wu ezata yini ku!
10 #
Eceza 6:15; 2 Tes 1:9 Mi fi oni eselia, mi zi mi irifura ma alia uri Yehovanisi, azini diza okpo ambo erinirini ma drilia indi.
11 #
Isa 12:1, 4; 24:21-23; 25:9; 26:1; Yer 30:7, 8; Yoe 3:18; Amo 9:11; Oba 1:8; Mik 5:10 Yi nga ’ba afu be ’diyi ma mile so va, azini yi nga fe asi afuru ’bani ma avu va; te Yehovani nga ovu a’dule uru inzita be o’du ’dasini.
12O’du Yehova asikari ongulumuruniri nga ovu afa dria ovupi afuru kani asi afusi ’diyi, kani afa dria ’bani ’bale uru ’diyi ma dria, nga yi omvi dria va;
13o’du nde nga eca mario pati izuru Lebanonia ’diyi ma dria dria, ovupi uru, ’bani engale uru ’diyi; azini kumara pati okporu Basania ’diyi ma dria indi;
14azini oni izuru ma dria dria, oni ovupi uru ’diyi ma dria dria;
15jo izuru dria ma dria, abi tole kaliru ’diyi ma dria dria dria;
16oguru Tarisisini ’diyi ma dria, wura yini ndrizaru ’diyi ma dria dria.
17Yi nga fe afu ’bani avu va, azini asi afuru ’bani yi nga ’ba va; te Yehovani nga ovu a’dule uru inzita be o’du ’dasini.
18Te wura toko inzile inzi ’diyi nga avi teketeke ra.
19 #
Hos 10:8; Luk 23:30; Eceza 6:16; 2 Tes 1:9; Zab 7:6; Nah 1:3-6; Hab 3:6; Hag 2:6; Ebra 12:26 Yehova ka enga nyaku oyazu okposi, ’ba yi nga ofi oni ma ojia azini ’bile nyakua ’diyia yi ozizu uri Yehovanisi, diza okpo ambo erinirini ma drilia indi.
20O’du ’dasi ’ba yi nga wura yini dahaburu o’be amve wura meleru yini ’diyi be, ’bani edele yi dri inzizaru ’diyi, yi nga afa ’diyi o’be oyu pi vu ’bi’bia be,
21fizu oni ojia, kani oni yi esipi osi ’diyi ma talaa, uri Yehovanisi, diza okpo ambo erinirini ma drilia indi, eri ka enga nyaku oyazu okposi.
22 #
O’be 23:4
Emi ku ’ba ovupi ava erini be eri ma omvuleari fo! a’disiku ’ba nga onyi erini isu e’yo ngoni ma alia ya?
Bible in Lugbara © United Bible Societies, 1966.