'Ba Ebraniani 4

1 # Zab 95:11 E’yo ’dirisi ama ma ovu urisi, aziza ’bani efizu ani ava liza erini ma aliarini nga aceria indi, ’ba alu emi eseliari kazu e’dazu ekile eri ece rarile ’dini ku. 2Te ’ba olu e’yo bari ama tia ’bo, ekile ndra olule yi ma tiarile tro tro; te e’yo nde yini erileri koni ndra yi ma aza ku, a’disiku e’yo nde ecini i tualu a’ita be ’ba eripi ’diyi ma asia ku. 3#Zab 95:11E’yo ’dirisi ama’i, ’ba e’yo a’ipi ’diyi, ama fi ava liza nde ma alia ra, ekile erini ’yole ’borile, kini,

Ekile mani oyo sole adra manisirile,

Yi ma fi ava liza mani ma alia aluni ku, ka tro azi nde ovu dezaru gbudrio, engazu ewu nyaku eti ’bazuria.

4 # E’do 2:2 Te eri ’yo pari azinia o’du aziriri ma e’yosi ’dinile, Te Mungu li ava o’du aziririsi azi erini dria ma vutia. 5#Zab 95:11Azini dika pari ’dori ma alia eri kini,

Yi ma fi ava liza mani ma alia aluni ku.

6E’yo ’dirisi, ace ’ba azini ma fi alenia ra, te ’ba ndra yini e’yo bari oluzu yi tia oko ’diyi awini ndra fi ku, yini ovule bile kokorurisi, 7#Zab 95:7-8eri pe vini o’duniri indi, ’yozu Daudi ma alia, o’du kakau ma vutia,

Andru, ekile ’yole ’borile, Andru emi ka o’duko erini eri, emi ma ’ba asi emini mbazaru ku.

8 # Azi 31:7; Yos 22:4 ’Dini Yosua ka ndra ava liza fe yi dri ra, vutinia Mungu ngani ndra o’du aziniri ma e’yo ’yo ku. 9E’yo ’disi ava iza sabatoru ace indi ’ba Munguni ’diyi dri; 10#E’do 2:2; Eceza 14:13a’disiku ’ba fipi ava liza Munguni ma alia ’bori, eri ma ngulupi li ava azi ini ma vutia, ekile Munguni ava lile azi ini ma vutiarile,

11E’yo ’dirisi ama ma nda asi driasi fizu ava liza nderi ma alia, ’ba aluni kazu e’dezu eritaako ndra ecele ’darilerisi ku. 12#Yer 23:29; Isa 49:2; Efe 6:17; Yoh 12:48; Eceza 19:15Te e’yo Munguni ovu idriru, azini okpo be, eri cizaru aga sei ciza si be irilerileri ra, eri ’ba so asi pi ma esele cozu orindi be, kicolo pi ma esele cozu odu fala ma aliari be, eri asisile droza pi ma e’yo ni mbele egata asiari be. 13Azini afa Munguni o’bale ’diyi ma azi aluni i e’dapi eri ma milia kuni yo, te afa dria ovu pililiru azini ecezaru,’ba e’yo amanini ovuzu eri vuri ma milia ra.

Yesuni atalau edeta edepi agapi rari

14 # Ebra 3:1; 6:20; 7:26; 8:1; 9:11 Amani ovuria atalau edeta edepiri agapi ra fipi ’bua ’bori be, eri Yesu Mvi Munguniri’i, ama ma bi e’yo e’daza amani ci. 15#Ebra 2:17Te ama ovuni atalau edeta edepi agapi ra ecopi okpoako amani ma candi nipi kuri be ku, te atalau amani ovu ndra obezaru e’yo driasi ekile amale, te ezani ku. 16#1 Yoh 3:21; Rum 3:25E’yo ’dirisi ama ma esi oguna ’yeta anzutirini vu ogogo asi okporusi, ama ma a’i yiki ani, azini ama ma isu ’yeta anzutiri ama aza kozu etu e’yoni ama isuzurisi.

Currently Selected:

'Ba Ebraniani 4: LB66

Highlight

Copy

Compare