E’doza 44

Kopo avipiri

1Eri nga e’yo azi ’ba eri ma jo agei tepiri ma tia kini, Mi to nyaka ’ba nde ma gunia ma alia tre tre, yini ecole ’dulerile, emi ’ba ’ba dria alu alu ma silingi gunia erini ma tia dika. 2Mi ’ba vini okelea mani dahabururi pi mva wereari ma gunia ma tia, silingi erini nyakaniri be. Eri nga ’ye ekile Yusufuni ’yole ’borile. 3Angu ka ati o’bitisi, yi nga ’ba nde ’diyi ma ti pe mvizu, yi’i akanya yini be. 4Yi ka fu aku amboruasi ’bo, te ovuni nga ziri ku, Yusufu yo ’ba jo ini ma agei tepiri ma tia, Mi nga, mi bi ’ba nde ma vuti; te mi ka nga yi isu ’boria mi ma ’yo yi tia, Emi le e’yo onzi omvi e’yo onyiru ma paria a’disi ya? 5Afa ’diri ovuni afa opi manini mvuzuri’i ku ya, ovuni vini afa erini e’yo ondrizuri’i ku ya? Emini e’yo ’diri ’yeria emi ’ye onzi.

6Eri nga yi ma vuti bi, nga yi isu ra, nga e’yo ’diyi ’yo yi tia. 7Yi nga ’yo eri tia, Opi mani ’yo e’yo ’dinile ’diyi a’disi ya? Ama ati’ba mini econi ovuzu e’yo ’dinile ’diri ma alia aluni ku fo! 8#E’do 43:21Mi ndre, silingi amani isule gunia amania ma tilia ’diyi ama omvi ndra mi vu dika engazu angu Kananiarisi ra; ka’dini ama eco di afa dahaburu kani meleru oguzaru opi mini ma joarisi ngoni ngoni ya? 9#E’do 31:32’Ba ati’ba mini ma eselia ka a’di’i yani ti, mini afa nde isuzu vuniari, ma drani, azini vini indi ama dria nga ovu opi amani ma ati’baru. 10Eri nga ’yo ira, Ma ovu di e’yo emini ’yolerile agu nde yini eri isuzu eri vuri nga ovu ati’bo mani, te emi nga ovu e’yo kokoru. 11Yi nga di ’ye mbele mbele, yi alu alu nga yi ma gunia ayu o’ba va, yi alu alu nga vini yi ma gunia ma ti ozi ra. 12Eri nga nda ra, eri e’do ’ba okori vu, asizu ’ba werearisi; nga di okelea isu gunia Benyamininiri ma alia. 13#E’do 37:29, 34; Kal 14:6; 2 Sam 1:11Yi nga di bongo yi ma ruaa ’diyi osi ani, ’ba dria nga gunia yini o’ba akanya ma dria nga mvi aku amborua.

14 # E’do 37:7 ’Dini Yuda pi adripi erini be i nga eca Yusufu ma joa; isu eri nga kiri ’daa, yi nga yi eco drilenia va. 15Yusufu nga ’yo yi tia, E’yo emini ’yele ’dini ’diri a’di e’yoni ya? Emi nini kini ’ba ekile maleri eco e’yo ondrizaru ada rari ku ya? 16#Yob 40:4; E’do 44:9Yuda nga ’yo ra, Ama di ’yo ngoni ya opi maniri vu? Ama di a’di e’yo olu ya? Ama nga ama tru ngoni ngoni ya? Mungu isu ati’ba mini ’diyi ma e’yo onzi ’bo; mi ndre, ama ovu opi ma ma ati’ba, ama’i ’ba yini okelea nde isuzu eri vuri pie indio 17#Yos 22:29; 1 Sam 12:23; Luk 20:16; Rum 3:4, 6; 1 Kor 6:15; Gal 2:17Te eri nga ’yo ra, Ma econi e’yo ’dinileri ’yezu aluni ku Agu yini okelea isuzu eri vuri nga ovu ati’bo manini; te emiruni, emi nga mvi emi ati vu asi anzurusi.

Yudani matu ’bazu Benyaminisiri

18 # E’do 18:30, 32; Efu 32:22; O’be 19:12; E’do 41:40 Yuda nga di esi eri vu ogogo, nga ’yo ra, Opi mani la ma zi mi tia, kirikiri mi fe ati’bo mini ma ’yo e’yo alu mi bilea fo! Mi fe aoko ma ve mi asi ati’bo mini ma ruaa ku; mini ovule tro tro Faraulerisi, 19Opi mani zi ndra ati’ba mini ’diyi ma tia kini, Emi ovu ata be, kani adrizi be indi ya? 20#E’do 37:3Ama omvi ndra mi tia ra, opi mani, kini, Ama atini indi, de ’bo, mva erini tile de driari indi, eri werearu; adri dra ra, ace ayianiria a’dule, ati le eri tu, 21#E’do 42:15, 20Mi ’yo ndra ati’ba mini ’diyi ma tia, Emi eji eri ma vu, ma ma ne eri ma milesi indi, 22Ama ’yo ndra opi amani ma tia, Mva nde econi ati erini kuzaru ku, a’disiku eri ka nga i atini ku ra, atini nga dra ra. 23#E’do 43:3, 5Te mi ’yo ndra ati’ba mini ’diyi ma tia, Emi ngani ma mile ndre dika ku, emi adri wereari ka emu emi be kuria, 24Te ’dini, ama ka ndra eca ma ati ati’bo miniri vu, ama olu eri tia e’yo nde opi manini ’yoleri. 25#E’do 43:2Ama ati nga ’yo, Emi mu ’bani nyaka je dika were. 26Te ama ’yo ra, Ama econi sizaru muzaru ’dale ku; ama adri wereri ka ovu ama eselia indi ama nga si ’dale ra; a’disiku ama econi agu nde ma mile ndrezaru ku, ama adri wereari ka ovu ama be kuria. 27#E’do 46:19Ma ati ati’bo miniri nga ’yo ama tia, Emi ni ra oku mani oti ma dri anzi iri; 28#E’do 37:33aluri ku ma ra, ma ’yo ra, Oce eri kpi kpi ada; engazu ’dasi ma ndreni eri dika ku. 29#E’do 42:36, 38Te emi ka vini mva ’diri ’du ma vurisi indi, e’yo onzi ka nga eri ’ye ra, emi nga di ma se ozoforo ma driari be ’bilia candi be emi’i. 30#1 Sam 18:1E’yo ’dirisi ma ka nga di eca ma ati ati’bo miniri vu, te mva ka nga ovu ama be ku, a’disiku eri ma idrini i ecile mvaniri berisi, 31eri nga eca ’dini, eri ka nga ndre mva ovuni ama be ku, eri nga di dra ra, azini ati’ba mini nga ama ati ati’bo miniri se ozoforo eri ma driari be ’bilia candi be ama’i. 32#E’do 43:9Te ati’bo mini ’yo ndra ma ati tia e’yo mva ma ta mbazu ma ovu ini, ’yozu kini, Ma ka nga eri omvi mi vu ku, ma atini ’nga e’yo onziniri ’ba ma dria ’dani ’dani. 33#Efu 32:32Te di curu’do, ma zi mi tia, mi ku ati’bo mini ma te ’doa opi mani ma ati’boru mva ma paria, mva ma mu di i adripi be fo! 34Te ma nga tu mu ma ati vu de mvari ma be yo, ngoni ngoni ya? ma kazu onzi ngapi ecapi ma ati ma ruaari ndrezu indi ku.

Currently Selected:

E’doza 44: LB66

Highlight

Copy

Compare